«Almaty halyqaralyq áýejaıy» AQ júkterdiń qozǵalysyn baqylaýdyń jańa júıesin engizdi, dep habarlaıdy Qamshy.kz aqparat agenttigi.

Jolaýshylardy tasymaldaýdy uıymdastyrý qyzmetiniń basshysy Anatolıı Iýzefovıchtiń aıtýynsha, bul júıe qazir testilik rejimde jumys jasap tur.

Aıta ketý kerek, buǵan deıin júkti áýejaı qyzmetkerleri ózderi jaıǵastyratyn. Sondaı-aq, bagajdyń qaıda bara jatqanyn anyqtaý múmkin emes edi.

«11 shildeden bastap júıe testilik rejimde jumys jasap tur. Osy ýaqyt aralyǵynda belgili bir aqaýlar bolsa jóndep jatyrmyz. Bizdermen 25 áýe kompanıasy jumys jasaıdy. Ár kompanıamen olardyń tirkeý nómiri men BRS (Bag Reconciliation System) júıesiniń sáıkestigin tekserip, kelgen telegrammalardy óńdep jatyrmyz», - dedi «Almaty halyqaralyq áýejaıy» AQ jolaýshylardy tasymaldaýdy uıymdastyrý qyzmetiniń basshysy Anatolıı Iýzefovıch.

«Almaty halyqaralyq áýejaıy» AQ Feısbýktegi paraqshasynda jarıalanǵan aqparatqa sáıkes, BRS (Bag Reconciliation System)  júıesi tirkelgen júkterdiń  ushaq bortyna enýin baqylap otyrady. Jańa júıe júkterdiń joǵalýyn azaıtyp, áýejaıdaǵy júk jetkizý jumysyn jedeldetýge septigin tıgizbek.