Almatyda jolaqysynyń dıfferensıaldy tarıfin engizý týraly baspasóz máslıhaty ótti, dep habarlaıdy Qamshy.kz aqparat agenttigi.

Osydan birneshe apta buryn ákimdik Almatyda jolaqysy qymbattaıtyny týraly qaýly shyǵarǵan bolatyn. Qaýly qazir qoǵamdyq talqylaýda jatyr. Qoǵam tarapynan maquldanǵan jaǵdaıda qaýly ádilet organdarynda tirkelip, bekitiledi. 

Búgin qalalyq Jolaýshylar tasymaly kóligi men avtomobıl joldary basqarmasynyń ókilderi atalǵan máselege baılanysty túsinikteme berdi.

«Dıfferensıaldy tarıf engizýge 1 jyldan astam ýaqyt jumsadyq. Parlamentte qujat maquldandy, Prezıdent qol qoıdy. Mundaı tarıftiń óz artyqshylyqtary bar. Avtobýspen sırek júretin adamdar 10, 20 ret júrýge jaraıtyn kartochka ala alady. Turaqty jolaýshylarǵa dıskont engizbekpiz. Bolashaqta oblystan adam tasymaldaıtyn avtobýstar da osy tarıfke kóshedi. Bir saǵattyń ishinde basqa kólikke otyrsa, jolaqysy tegin bolatyn bolady. Elektrondy bıletke kóshý tasymaldaýshy kásiporyndardyń tabysyn naqtylaýǵa kómektesedi. Bul óz kezeginde demeýqarjyny durys esepteýge septigin tıgizedi», - dedi basqarma basshysy Maqsut Isahov.

Jańa júıege sáıkes endi jolaýshylar bir márte jol júrisi úshin qolma-qol aqsha tólese, 150 teńge beretin bolady, al eger «Ońaı» kartasymen bolsa 80 teńge kóleminde qalady. Aılyq jol júrý bıleti men jeńildikter de saqtalady.

Tek metroda ǵana jol aqysy 80 teńge bolyp qalady.

Mamandardyń aıtýynsha, keı kezderi «Ońaı» apparattary da isten shyǵyp qalady.

«Statısıka boıynsha isten shyqqan termınaldar týraly aqparattyń 15-25 paıyzy rastalmaı shyǵady. Júrgizýshiler ózderi óshirip tastaıdy nemese qasaqana isten shyǵarady. Eger apparat jumys jasamasa, jolaýshy tegin júrýge quqyly. SMS tólemge kelsek, uıaly operatorlar da turaqty jumys jasamaıdy, biraq onyń bárin qalpyna keltirip jatyrmyz», - dedi «Almaty kólik holdıńi» JSHS dırektory Sadır Hamraev.

Onyń aıtýynsha, kartalardy Karavan, Daýys, Azbýka svázı jelisi dúńgirshekterinde, metro kasalarynda satyp alýǵa bolady.

Qazir qaýly barlyq arnaıy prosedýralardan ótti. Máslıhat sheshimimen, Qoǵamdyq keńestiń usynysymen bekitildi.