Belgili tenor Plasıdo Domıngo óziniń Facebook jáne Instagram paraqshasynda qazaqtyń ulttyq kıimi shapanmen túsken fotosyn jarıalap, astyna «Jergilikti dástúrdi saqtaý...Qazaqstan – keremet el» dep jazǵan.

Esterińizge sala keteıik, ıspandyq opera ánshisi, dırıjór Plasıdo Domıngo Qazaqstanǵa kelip, EKSPO-2017 halyqaralyq kórmesin tamashalady. Sonymen qatar, «Astana Opera» teatr sahnasynda óner kórsetti. Shapandy oǵan Qazaqstanǵa kelgen kezde syılady.

Qazaqtyń shapany kim-kimge bolsa da jarasa ketedi. Qazaq halqy shapandy syıly adamdarǵa japqan. Urpaqtan-urpaqqa mıras bolyp kele jatqan bul úrdis áli kúnge deıin kúshin joımaǵan. Bul jaǵdaı kóńilge jylý syılaıdy. Sebebi kóp ulttyń óz dástúrinen, mádenıetinen ajyrap qalǵanyn kórgende eriksiz qynjylasyń. Sebebi ulttyq qundylyqtar tamyry tereńge boılaǵan, jyl tipti ǵasyr ótse de, qandaı tabıǵı qubylys bolsa da topyraǵynan ajyramaıtyn alyp tamyr ispettes. Ol dáriptelgen saıyn, tamyry da tereńdeı túspek.

Ádemi oıýlarmen órilgen, kózdiń jaýyn alatyn shapan jabý úlken mártebe. Qazaq halqy qonaǵyna shapan jabý arqyly oǵan degen qurmetin, erekshe syılastyǵyn bildirgen.

Qazaqtyń ulttyq kıimi – túgel ulttyń mádenıeti. Sonyń ishinde shapan Qazaqstannyń ǵana emes Orta Azıa halyqtarynyń da ulttyq kıimi. Onyń birneshe túri bolady. Shapannyń tek er azamattarǵa ǵana emes, áıelderge arnalǵan túri de bar. Máselen, qımaly shapan. Onyń tigilý ádisi de erekshe keledi.

2017 jyly Qazaqstan tarıhynda aıtýly datalarmen este qalary sózsiz. Sebebi bıyl «Alash Ordanyń» qurylǵanyna 100 jyl toldy. Sonymen qatar, Halyqaralyq EKSPO-2017 kórmesi Qazaqstanda ótip jatyr. Bul el úshin úlken mártebe, jaýapkershilik jáne múmkindik. Álemdik deńgeıdegi is-sharaǵa dúnıejúzine tanylǵan álemdik juldyzdar keldi. Onyń ishinde Plasıdo Domıngo men qatar gollıvýdtyq akter Nıkolas Keıdje de bar.

Oǵan da syı, qurmet retinde shapan jabyldy. Mundaı tosyn syıǵa daıyn bolmaǵan akterdiń shapan kıgizgendegi bet-beınesi áleýmettik jelide keńinen tarap, ázil sýretter de paıda bolǵan edi.

Jeli qoldanýshylary akterge aldyn-ala qazaqtyń shapan jabý dástúri bar ekenin eskertý kerek edi degender de kóp boldy. Dese de shetelgen kelgen qonaqqa shapan jabý arqyly óz dástúrimiz ben mádenıetimizdi tanystyrǵanymyzdy umytpaıyq.