Qoǵamda áli kúnge deıin bir sheshimi tabylmaı kele jatqan, ýshyǵyp turǵan máselelerdiń biri – pedofılızm derti. Kúndelikti álem boıynsha birneshe myńdaǵan kishkentaı búldirshinder pedofılızm dertine shaldyqqan adamdardyń qurbanyna aınalýda. Bul máseleniń sheshimi tabylǵan emes, tipti, ol kúnnen-kúnge órshý ústinde. Statısıkalyq málimetterge sáıkes, ár 2 mınýt saıyn álemde bir bala seksýaldy zorlyqtyń qurbany bolady, dep jazady Qamshy.kz aqparat agenttigi.

Bul máselege qatysty dárigerler, quqyq qorǵaý organdary, psıholog mamandar kóptegen saqtyq sharalaryn qatań ustanyp, qazirgi tańda kishkentaı búldirshinderdi bir sátke de qaraýsyz qaldyrmaýdy qatań eskertedi. Sonymen qatar, kez kelgen orta jastan asqan jaqyn tanys nemese dos, otbasy múshesi bolsyn, tolyǵymen senim bildirip, kúdikti adamdarmen balalardy jalǵyz qaldyrmaýdy suraıdy. Sebebi, mamandardyń aıtýynsha, balalar kóbinde otbasylarynyń jaqyn tanysy nemese dostary tarapynan zorlyqqa ushyrap jatady eken.

Mamandar pedofılderdi anyqtaýdyń da birneshe joldaryn nusqap, adamdarmen aralasýda óte muqıat bolý kerektigin aıtady. Pedofılder kishkentaı balalarǵa óte áýes, erekshe jaqyn bolyp keledi eken.

Ózderiniń qumarlaryn kishkentaı balalar arqyly qandyratyn qanypezer qylmyskerlerdi quryqtaý, ádette, bolar is bolǵannan soń oryn alyp jatady. Olardy tutqyndaǵanmen, tym kesh bolady.

Al, áleýmettik jelide taralǵan mynadaı aqparatty kórip, tipti, jaǵamyzdy ustadyq: Ulybrıtanıada kishkentaı balalardyń keıpinde jasalǵan seks-qýyrshaqtar satyla bastapty. Ia, rasymen de sumdyq jaǵdaı. Pedofılıa dertiniń aldyn alýdyń ornyna, kerisinshe, ony odan ári órshitýdiń joly ekendigi anyq. Eń soraqysy, ózderiniń qumaryn qandyrý úshin kishkentaı búldirshinderdiń taǵdyrymen oınap, aram pıǵyldaryn astyrtyn iske asyratyndardyń bul qýyrshaqqa degen suranysy tipten kóbeıgen.

Jergilikti BAQ málimetterine súıensek, mundaı seks-qýyrshaqtar Ulybrıtanıada keńinen taralyp, kóp suranysqa ıe bolǵan. Olardyń bir danasy 1000 fýntqa baǵalanady eken.

Brıtandyq keden qyzmetkerleri bir jyldyń ishinde 123 qýyrshaqty tárkilep, olarǵa tapsyrys berýshilerdi quryqtaǵan. Olardyń qatarynda bir aı buryn abaqtyǵa jabylǵan er adam bolǵan. Jynystyq músheleri egjeı-tegjeıli jasalǵan bul qýyrshaqtardy psıhologıalyq aýytqýshylyǵy bar adamdar tapsyrys berip, ózderiniń túrli qıaldaryn sol arqyly iske asyrady eken.

Belgili bolǵandaı, mundaı qýyrshaqtar Qytaıda jasalyp, Ulybrıtanıaǵa jetkiziledi eken jáne de ol elde mundaı qýyrshaqtarǵa degen suranys óte kóp bolyp tabylady. Brıtandyq polısıa qyzmetkerleri mundaı qýyrshaqtarǵa tapsyrys bergen adamdardy tutqyndap, kóptegen pedofılderdi quryqtaǵan.

Qazirgi tańda Ulybrıtanıa bıligi mundaı qýyrshaqtardy elge kirgizýge tyıym salyp, múldem kózin qurtýdyń joldaryn qarastyryp jatyr.

Ózderiniń oń-solyn áli tanyp úlgermegen kip-kishkentaı búldirshinderdiń taǵdyrymen oınap, olardyń appaq kirshiksiz ómirine daq túsiretinderdiń sanyn azaıtyp, qoǵamdaǵy úlken máseleniń aldyn alý qajet. Pedofılderge arnaıy kishkentaı balalar keıpindegi seks-qýyrshaqtardyń shyǵýy – bul derttiń ábden asqynǵanyn kórsetkendeı. Mundaı arsyzdyqtyń aldyn alyp, kishkentaı búldirshinderimizdiń bolashaǵyn qorǵaý úshin árqashan da óte saq ári muqıat bolýymyz qajet.

Nazerke Labıhan