«Túrkistan – túrki áleminiń 2017 jylǵy mádenı astanasy» aıasynda kóptegen ıgi sharalardy uıymdastyryp júrgen «Áziret Sultan» memlekettik tarıhı-mádenı qoryq-mýzeıinde ult-azattyq qozǵalysynyń basshysy, ataqty batyr Syrym Datulynyń týǵanyna 275 jyl tolýyna oraı óńirlik ǵylymı-praktıkalyq konferensıa bolyp ótti, dep habarlaıdy Qamshy.kz aqparat agenttigi "Áziret-Sultan" qoryq-murajaıynyń baspasóz qyzmetine silteme jasap.

Jıynǵa tóraǵalyq etken qoryq-mýzeı dırektory Jandos Áýbákir mýzeıler arasyndaǵy sabaqtastyqty, tarıhı tulǵalardy tanyp bilýdegi bul konferensıanyń mańyzdylyǵyna basa nazar aýdarý qajettigine jurt yqylasyn aýdardy.

Konferensıada bas qosqandar Syrym Datulynyń shejiresi men tarıhy, Syrym bastaǵan ult-azattyq qozǵalysynyń bastalýy jáne onyń barysy, sheshendik tulǵasy syndy taqyryptarda baıandama oqydy.

Atap aıtsaq, «Áziret Sultan» memlekettik tarıhı-mádenı qoryq-mýzeıiniń bas redaktory Ábdikerim Manapov «Syrym Datuly jáne qazaq halqynyń sheshendik óneri», «Áziret Sultan» qoryq-mýzeıi ǵylymı zertteý bólim meńgerýshisi Ǵanı Iskakov t.ǵ.k., «Syrym Datuly – qazaq ult-azattyq kóterilisiniń jetekshisi», N.Tórequlov mýzeıiniń meńgerýshisi D. Kerimbekova «Syrym sheshendik ónerdi damytýshy», «Áziret Sultan» qoryq-mýzeıiniń arheologıa jáne tarıhı eskertkishterdi qorǵaý bóliminiń meńgerýshisi M.Tuıaqbaev «Qoja Ahmet Iasaýı kesenesinde jerlengen batyrlar» taqyryptarynda mazmundy baıandamalar jasady.

Jıyn sońynda konferensıaǵa kelýshiler arnaıy uıymdastyrylǵan «El bastaǵan kósem, sóz bastaǵan sheshen» taqyrybyndaǵy kórmeni tamashalap, óz oılaryn ortaǵa saldy. Qatysýshylarǵa «Áziret Sultan» qoryq-mýzeıiniń atynan sertıfıkattar tabystaldy.