Sońǵy ýaqyttarda ınternet arqyly elimizde ýaǵyz aıtatyn ımam-ustazdardan kimderdiń ýaǵyz-nasıhatyn tyńdaýǵa bolady degen mazmunda tizimdelip jasalǵan túrli vıdeolar taralyp jatyr. Atalmysh vıdeolarda elimizdegi birshama ımam-ustazdardyń esimi men sýretin kórsetip, osy kisilerden dinı baǵytta bilim úırenip, ýaǵyz-nasıhattaryn tyńdaýǵa bolady delingen. Alaıda belgili bolǵandaı, QMDB bul tizimderden beıhabar bolyp shyqty jáne de mundaı aqparattardy ruqsatsyz taratý – musylmandyq ádepke jat dep topshylaıdy, dep habarlaıdy Qamshy.kz aqparat agenttigi QMDB resmı saıtyna silteme jasaı otyryp.

"Sońǵy kezderi áleýmettik jeliler arqyly elimizde ýaǵyz-nasıhat aıtýyna ruqsat etilgen din mamandarynyń tizimi taralýda. Bul tizimdi Qazaqstan musylmandary dinı basqarmasy jasamaǵanyn eskertemiz!" – delingen habarlamada.

Tizimde QMDB-ǵa qarasty ımamdar men ǵalymdardan bólek dinı bilimi joq tilshiler men qoǵam qaıratkerleriniń de esimderi jazylǵan. Tipti, dinı bilimdi qaıdan alǵany belgisiz adamdardyń da aty-jóni kórsetilgen.

«QMDB Mýftıat ustazdar tizimi! QAZAQSTANDA ÝAǴYZDARYN TYŃDAÝǴA RUQSAT ETİLGEN (KMDB)nyń AHLI SÝNNA USTAZDARY», – dep bastalatyn (mátin sol qalpynda berildi) jazbany Qazaqstan musylmandary dinı basqarmasynyń ishki jumystarynan habary joq adamnyń jazǵany baıqalady. Dinı basqarmanyń resmı ruqsatynsyz jazylǵan aqparattyq tizim jamaǵat arasynda túsinbeýshilik týdyrýy múmkin. Osy rette ýaǵyzshylar tizimin jazǵan tulǵanyń bul áreketi musylmandyq ádepke jat ekenin jetkizemiz.

QMDB mamandary bul suraq tóńireginde kez kelgen azamattyń saýalyna jaýap beredi. QMDB el azamattarynan múftıatqa qatysty aqparat taratpaýdy talap etedi», – dep jazylǵan QMDB resmı saıtyndaǵy habarlamada.