Búgin Úkimettiń baspasóz ortalyǵyndaǵy brıfıń barysynda QR bilim jáne ǵylym vıse-mınıstri Bıbigúl Asylova «Nurly jol» ınfraqurylymdy damytýdyń memlekettik baǵdarlamasyn iske asyrý barysy týraly málimdedi. Bul týraly Qamshy.kz aqparat agenttigi Premer-mınıstrdiń baspasóz qyzmetine silteme jasap habarlaıdy.

Bıbigúl Asylova «Nurly jol» memlekettik baǵdarlamasyn iske asyrý barysynda «Bilim berý salasynyń ınfraqurylymyn damytý» baǵyty boıynsha bıyl Ulttyq qordan barlyǵy 71,7 mlrd. teńge bólingenin habarlady, olardyń ishinde: 26,5 mlrd.tg 2016 jyly bastalǵan 53 mekteptiń qurylysyn aıaqtaýǵa, 45,2 mlrd. tg jańa 56 mekteptiń qurylysyna bólingen.

«1 tamyzdaǵy jaǵdaı boıynsha ákimdikterge 41 156 mln. teńge aýdarylǵan, olardyń 38 606 mln. teńgesi nemese 94%-y ıgerilgen.

Vıse-mınıstrdiń aıtýynsha, 1 tamyzdaǵy jaǵdaı boıynsha 7 mektep paıdalanýǵa berilgen, Almaty, Jambyl, Qaraǵandy oblystarynda 1 mektepten, OQO-da 4 mektep jáne Mańǵystaý oblysynyń Jańaózen qalasynda 320 orynǵa arnalǵan balabaqsha paıdalanýǵa berildi. 2017 jyldyń sońyna deıin 80 mektepti ótkizý josparlanǵan.

«Búginde Ulttyq bilim berý derekter bazasy boıynsha elimizde 64 apatty mektep pen úsh aýysymda oqytatyn 127 mektep bar. Olardyń qatarynan 41 apatty mektep pen úsh aýysymda oqytatyn 62 mektep 2015 jyldan qalǵan jáne taǵy 23 apatty mektep pen úsh aýysymda oqytatyn 65 mektep anyqtaldy», –  dedi Bıbigúl Asylova.

2017-2018 jyldardyń qorytyndysy boıynsha apatty mektepterdiń ornyna 51 mektep paıdalanýǵa beriledi jáne 90 mektep úsh aýysymdy bilim berýdi joıady, olardyń ishinde 116 mektep Ulttyq qor esebinen turǵyzylady.