Qurban aıtqa sanaýly kúnder qaldy. Allanyń razylyǵynan úmittengen jandar qurbandyqqa soıatyn maldy tańdaýda óte muqıat bolýy qajet. Qurbandyqtyń Allanyń quzyrynda qabyl bolýynyń musylman úshin mańyzdylyǵyn eskersek, birinshi yqylas-nıet durys bolýy, ekinshi soıylatyn mal jaramdy bolýy kerek dep jazady QMDB Ýaǵyz-nasıhat bóliminiń meńgerýshisi Ershat Ońǵarov óziniń Facebook paraqshasynda.
Múftıattyń resmı saıtynda: "Eshkiniń jáne qoıdyń jasy bir jyldan asyp ekinshi jylǵa kirgeni, sondaı-aq alty aılyq marqa qozy (úlken qoı sekildi) iri, qońdy bolsa qurbandyqqa jaramdy. Sıyrdyń eki jasqa tolyp, úshinshi jylǵa kirgenin, al túıeden jasy bes jyldan asyp, altynshy jylǵa kirgenin qurbandyqqa shalýǵa bolady. Sonymen qatar soıylatyn maldyń kemshilik, kináraty bolmaýy kerek" delingen (fatua.kz). 
Qoıdyń bir jasy shamamen 6 aı. Sebebi, saýlyqtarynyń býazdyq merzimi 145 – 155 táýlikke sozylady, ıaǵnı ortasha eseppen 5 aı 10 kún (kk.m.wikipedia.org). Sol úshin sharıǵatta alty aıdan asqan toqty qurbandyqqa jaramdy delingen.
Osy oraıda eskertkim kelgeni, bıylǵy toqtylardyń barlyǵy qurbandyqqa jaramaıdy. Óıtkeni toqtynyń jasy kem degende alty aıdan asqan jáne iri bolýy shart. Dálirek aıtqanda, aǵymdaǵy jyldyń naýryz aıyna deıin týylǵan tól bolýy tıis. Elimizdiń birneshe óńirlerinde saqman sáýir aıynda bastalatyny belgili. Ásirese ortalyq jáne soltústik aımaqtarda.
Sondyqtan qurban malyn satýshylar men tutynýshylar osyny eskerse eken deımin.
Kele jatqan Qurban aıt qutty bolsyn! Qurbandyqtaryńyz qabyl bolsyn! «Eshbir qul Qurban kúni Allanyń quzyrynda qurbandyq qanyn aǵyzǵannan artyq jaqsy amal jasaı almaıdy. Óıtkeni shalynǵan maldyń múıizi, qyly jáne tuıaqtary Qıamet kúni mol saýap ákeledi. Shalynǵan qurbandyqtyń qany jerge aqpastan buryn Allanyń quzyrynda joǵary mártebege jetedi. Olaı bolsa, shyn kóńilmen qurban shalyńyz» (xadıs).