Londonda ótken "Qazaqstan-Ulybrıtanıa" strategıalyq dıalogy sheńberinde eńbek jáne halyqty áleýmettik qorǵaý mınıstrligi men Ulybrıtanıanyń eńbektegi qanaý men zańnamany buzýǵa qarsy is-qımyl qyzmeti arasynda yntymaqtastyq týraly memorandýmǵa qol qoıyldy. Qujat taraptardyń eńbek kóshi-qony salasyndaǵy ózara is-qımylyn kózdeıdi.

Memorandýmǵa syrtqy ister mınıstriniń orynbasary Roman Vasılenko men Ulybrıtanıanyń Eýropa, Soltústik Amerıka jáne shet elder isteri jónindegi memlekettik mınıstri Stıven Daýtı qol qoıdy.

Qujat boıynsha taraptar kelisimi:

• Ulybrıtanıa aýmaǵynda Qazaqstannyń azamattaryn ýaqytsha jumysqa ornalastyrý sharttary men rásimderi týraly aqparat almasý;
• Qazaqstannan eńbek qyzmeti úshin Ulybrıtanıaǵa jumyskerlerdi jiberetin jeke jumyspen qamtý agenttikteriniń qyzmeti týraly aqparat almasý, sondaı-aq qabyldaýshy memlekettiń zańnamasyna sáıkes olardyń qyzmetin rastaý;
• Qazaqstan azamattarynyń Ulybrıtanıa aýmaǵyndaǵy eńbek qyzmeti kezeńinde, onyń ishinde Tier-5 maýsymdyq jumys vızasy (seasonal worker visa) sheńberinde eńbek jáne áleýmettik quqyqtaryn qamtamasyz etýge jáne qorǵaýǵa baǵyttalǵan ózara yntymaqtastyq;
• Suranysqa ıe jumysshy mamandyqtary jáne Qazaqstan azamattarynyń qajetti kásiptik daıarlyǵy týraly aqparat almasý.

Memorandýmǵa qol qoıý – Qazaqstan men Ulybrıtanıa arasyndaǵy eńbek quqyqtaryn qorǵaý salasyndaǵy yntymaqtastyqty nyǵaıtý jolyndaǵy mańyzdy qadam.