Abaı oblysynda sút óndirisi qarqyndy damyp, aımaǵymyzdyń ekonomıkasynyń mańyzdy salalarynyń birine aınalyp otyr. Óndiris kólemin arttyrý jáne saladaǵy ózekti máselelerdi talqylaý maqsatynda oblys ákiminiń orynbasary Qýanysh Súleımenov bastaǵan jumys toby Besqaraǵaı aýdanyndaǵy «Qalıqanuly» sharýa qojalyǵynda boldy.
Steklánka aýylynda ornalasqan sharýashylyq búginde oblystyń iri sút óndirýshileriniń biri. Munda 800-den astam iri qara mal bar, onyń 500-ge jýyǵy saýyndy sıyrlar. Kásiporyn táýligine 8 tonna sút óndiredi, shyǵarylatyn taza tabıǵı ónim oblystyń ár óńirine jetkizilip, turǵyndardyń tutyný suranysyn qamtamasyz etedi.
Salaǵa memlekettik qoldaý kórsetilýde. Ótken jyly «Qalıqanuly» sharýa qojalyǵy «Agroónerkásiptik keshendegi ınvestısıalyq jobalarǵa nesıe berý» memlekettik baǵdarlamasy aıasynda 1 mlrd teńge kóleminde qarjylandyryldy. Bul qarajat sútti-taýarly fermany keńeıtýge baǵyttalǵan.
Kásiporyn basshysynyń aıtýynsha, sharýashylyq 16 jyl buryn qurylǵan. Alǵashynda Steklánka aýylynda shaǵyn baza satyp alýdan bastalǵan bıznes 2011 jyly Qytaıdan sút óńdeý sehyn ákelip, Semeı qalasynda iske qosýmen keńeıdi. Sonymen qatar, «Sybaǵa» baǵdarlamasy arqyly 150 basqa arnalǵan nesıe alynyp, Reseıden «Dalalyq qyzyl» asyl tuqymdy sıyrlar jetkizildi.
Oblysta aýyl sharýashylyǵyn damytýǵa erekshe kóńil bólinýde. Jergilikti bılik ókilderi salaǵa ınvestısıa tartý, zamanaýı tehnologıalardy engizý jáne ónim kólemin arttyrý baǵytynda jumystar jalǵasatynyn atap ótti.
• «Óndirisimiz jandanyp, sapa artqan saıyn biz ony ári qaraı damytýǵa bar kúshimizdi saldyq. Ónimimiz jaqsy shyqqan saıyn, mal basyn kóbeıtý qajettiligin tereń túsindik. Osylaısha, “Damý” baǵdarlamasy aıasynda Halyq bankinen alǵan nesıege 2024 jyly 600 bas saýyn sıyrǵa qol jetkizdik. Búginde ónimderimiz halyqtyń suranysyna saı, keńinen satylyp jatyr. Tabıǵı sút óndirý – bizdiń basty baǵytymyz, ol úsh kúnnen keıin ashıdy. Alaıda, ashyǵan sútti qaıta óńdep, súzbe, aq irimshik, qyzyl irimshik, sorpa sıaqty joǵary sapaly ónimderge aınaldyramyz», – deıdi «Qalıqanuly» sharýa qojalyǵynyń basshysy Marat Qalıhanov.
Búginde jerlesterimizdiń súıikti ónimine aınalǵan jáne jergilikti naryqta suranysqa ıe «Aısha» saýda belgisimen tanymal seh, endi «Qaz Milk Semey» ataýymen óz ónimderin shyǵaryp otyr.
Sehta 32 túrli ónim óndirilip, onyń 17-si sút ónimderi bolyp tabylady: sút, aıran, qurt, irimshik, qyzyl irimshik, maı jáne basqa da qunarly ónimder. Sonymen qatar, shujyq ónimderinen 15 túrli ónim shyǵarylyp keledi. Qazirgi ýaqytta ABU ýnıversıtetimen birlesip, sarysýdy qosý arqyly kvas ázirleý prosesi pysyqtalýda, al bolashaqta chechıl irimshigin óndirisqa engizý josparlanyp otyr, – deıdi sehtyń sharýashylyq tehnology Álı Maratuly.
Sharýashylyqtyń aldaǵy maqsattary aıqyn – ónim kólemin ulǵaıtyp, óńir turǵyndaryn ǵana emes, búkil respýblıka jurtshylyǵyn tabıǵı taza ónimmen qamtamasyz etý. Bolashaqta sút pen shujyq ónimderin tek oblysymyzdyń shekarasynan asyryp, basqa aımaqtarmen saýda-sattyq aıasyn keńeıtý arqyly joǵary sapaly taýardy keń tutynýshylarǵa jetkizý kózdelýde.
