Áleýmettik jelide belsendiler Almatydaǵy Abdýlla Rozybakıev kóshesin Muhtar Maǵaýın atyna aýystyrýdy usynyp jatyr.

Bul bastamany jeli qoldanýshysy Bota Dn Facebook-tegi jazbasy arqyly jetkizdi. Ol jazýshynyń eńbekteri nasıhattalyp, esimi el arasynda aıtylyp júretindeı bolýy kerek deıdi. 

"Almatynyń shetindegi, baıaǵy pereselenderdiń salǵan japyraıǵan usqynsyz úıleri ornalasqan qısyq, sholaq kóshesiniń birine emes, ortalyqtaǵy kósilip jatqan dańǵyldardyń birine, mysaly, uzyndyǵy 7000 metr Rozybakıev atyndaǵy kósheni Muhtar Maǵaýın dańǵyly dep aýystyrýǵa kúsh salyp, nátıjesin shyǵarar. Rozybakıev degen ultqa qandaı eńbegi sińgeni belgisiz bireý", - deıdi ol. 

Sondaı-aq belsendi Almatyda Maǵaýın ortalyǵyn ashý kerektigin aıtty. Atalmysh bastama kelesi ǵasyr jetegine ketpeı, "temirdi qyzǵan kezinde soqtyǵa" basyp, jaqyn arada iske asyrylsyn deıdi ol. 

"Jarqyratyp Maǵaýın ortalyǵyn ashtyrsyn. Almatynyń kórnekti jerine Batys Eýropa skýlptýra úlgisindeı, kórgen adam óte shyqpaı, burylyp toqtap qaraıtyndaı, tarıhı jádiger, erekshe kórkem qundylyǵy bar eskertkish qoıǵyzsyn. Kitabyn qolyna ustap kórmegen aq, qara, sary násildiler "bul kim eken?" dep, eń qurymasa vıkıpedıany ashyp qaraýy sózsiz, ary qaraı qyzyǵyp oqyp, sanasynan sańylaý ashylýy da múmkin. Nasıhattalsyn. Muhtar Maǵaýınniń árbir sóılemi óz aldyna ómir súre alatyn qanatty, maǵynaly. Mektep oqý baǵdarlamasyna engizilip, taldanyp, oqytylsyn. Óshpes eńbekteri ekrandalsyn. Qatty tolǵanǵandardyń ishinde bılikte bolǵan, jaqyn júrgender de az emes. Demek, kópire salmaı, shyndap, qulshyna kirisse, iske asyrýǵa bolatyn shara. "Temirdi qyzǵan kezinde soq" deıdi ǵoı, búgingi isteıtin jumysty erteńge qaldyrmaý kerek. Sıyrquıymshaqtanyp ketip, Jańa Qazaqstandy quryp júrgende, HH ǵasyr enshisine qalyp keter", - dep bólisti belsendi.