Úkimet otyrysynda sóılegen sózinde mınıstr vedomstvo qolǵa alǵan kelesi qadam – ósimdik sharýashylyǵyn qadaǵalaýdyń jańa aqparattyq júıesin engizý ekenin aıtty.

"Qazirgi júıede ósimdik sharýashylyǵy ónimderiniń qadaǵalanýy tek partıaǵa ilespe qujattar berý kezinde júzege asyrylady, bul tolyq qadaǵalaýdy qamtamasyz etpeıdi.

Jańa sıfrlyq júıe aýyl sharýashylyǵy ónimderiniń óndiris sıkly men shyǵý tegin "egisten dastarqanǵa deıin" qaǵıdaty boıynsha baqylaýǵa múmkindik beredi, sondaı-aq tasymaldanatyn ónimderdiń qaýipsizdigi men qadaǵalaýyn qamtamasyz etedi. Sonymen qatar, ósimdik sharýashylyǵy obektileriniń pasporttaý júıesin engizý josparlanyp otyr: egistik alqaptary, tarıhı derekter, ónimdilik, saqtaý kólemderi – osynyń barlyǵy ónimniń shyǵý teginiń ashyqtyǵyn qamtamasyz etedi", – dep túsindirdi Saparov.

Mınıstrdiń aıtýynsha, jyl basynan beri mınıstrlik Aqmola oblysynda jobany tehnıkalyq synaqtan ótkizýge kirisken.

"Júıeni tolyqqandy iske qosý úshin shamamen 714 mıllıon teńge qajet, bul soma tehnıkalyq tapsyrmaǵa engizilip, Sıfrlyq damý jáne aeroǵarysh ónerkásibi mınıstrligimen kelisilgen ınvestısıalyq jobada kórsetilgen. Osyǵan baılanysty, Oljas Abaıuly (Bektenov – esk.), úkimetten osy júıeni júzege asyrý úshin mınıstrlikke qosymsha qarajat bólýdi qoldaýdy suraımyn", – dep Úkimet basshysyna úndeý jasady Aıdarbek Saparov.