Qazaqstandyqtarǵa beriletin 10 sottyq tegin jer endi tek ınfraqurylym tartylǵan aımaqtardan ǵana úlestiriledi. Osylaısha sý men jaryq kelmegen jerlerge úı salýǵa ruqsat joq.

Málimetterge sensek, jeke turǵyn úı qurylysyna arnalǵan jerler sý qubyry men elektr jelisi tartylǵan aýmaqtardan ǵana beriledi. 

Buǵan deıin mundaı talap bolǵan joq. Sáıkesinshe, 4 mıllıonnan astam qazaqstandyq ózi qalaǵan aımaqtan jer belgilep, ótinish bergen. Endi olardyń kórsetken aýmaǵynda dál osy jeliler tartylmasa, kezek jyljı bermek. Atalǵan aýyl, aýdanda mindetti túrde sý men jaryq bolýy kerek.

Aýyl sharýashylyǵy mınıstrliginiń dereginshe, burynǵy kezekte turǵan azamattardyń kezegi saqtalady. Qaıta ótinish berýdi qajet etpeıdi. Kezekte turǵandardyń tizimi jergilikti atqarýshy organnyń avtomattandyrylǵan jumys ornynda, arnaıy esepke qoıylýyna qaraı qalyptastyrylady.

Sonymen qatar erejede jer ótinish arnaıy esepke qoıylǵannan keıin beriledi delingen. Al arnaıy esepti jergilikti atqarýshy organdar júrgizedi. Eger aımaq úı salý maqsatynda paıdalanylmasa, jer telimi memleket menshigine qaıtarylady. Aıta keteıik, jańa talaptardyń ózgerýi azamattarǵa jer kezeksiz berilmeýi úshin jasalyp otyr.