Qyrǵyzstannyń ulttyq qaýipsizdik memlekettik komıteti ánshi Qaırat Prımberdıevti qamaýǵa alyp, onyń elden shyǵýyna tyıym saldy. 

Óner ıesi «ultaralyq arazdyqty qozdyrýǵa» baǵyttalǵan málimdeme jasaǵany úshin ustalǵan.

Qazirgi ýaqytta tıisti tergeý jáne prosesýaldyq sharalar júrip jatyr. Qyrǵyzstan zańnamasyna sáıkes, «ultaralyq, dinı nemese aımaqaralyq arazdyqty qozdyrýǵa baǵyttalǵan áreketter» úshin 10 jylǵa deıin bas bostandyǵynan aıyrý jazasy qarastyrylǵan.

Eske sala keteıik, Qaırat Prımberdıev «Airan» YouTube-arnasyna bergen suhbatynda Kenesary hannyń basyn alý oqıǵasyn qozǵap, osy jaǵdaı úshin qazaq halqynan óz atynan keshirim suraǵan edi. Keıinnen Qyrǵyzstannyń mádenıet vıse-mınıstri Marat Taǵaev bul jaǵdaıǵa qatysty pikir bildirip, qyrǵyzdar óz jerin qorǵaǵan Ormon hannyń áreketi úshin keshirim suramaýy kerek ekendigin málimdedi.