Sıfrlyq damý, ınovasıalar jáne aeroǵarysh ónerkásibi mınıstrliginiń buıryǵyna sáıkes, endi 24 naýryzdan bastap uıaly baılanys abonenttik qurylǵylaryn tirkeý erejeleri jańartylady. Endi IMEI kody joq nemese GSMA halyqaralyq qara tizimine engizilgen qurylǵylar buǵattalady.

Mınıstrlik eldegi uıaly telefondar úsh deńgeıde: aq, sur, qara tizim qoldanylatynyn jetkizdi. Aq tizimge tekserýden sátti ótken jáne derekqorǵa engizilgen qurylǵylar kiredi. Al sur tizimde qosymsha tekserýdi qajet etetin, biraq jelide 30 kúnge deıin ýaqytsha jumys isteýge ruqsaty bar qurylǵylar bolady. Qara tizimge qate nemese ózgertilgen sáıkestendirý kody bar, zaýyttyq IMEI kody joq nemese GSMA halyqaralyq qara tizimine engizilgen qurylǵylar jatady.

Endi uıaly baılanys operatorlary abonenttik qurylǵynyń sáıkestendirý kody men abonenttik nómirdiń ıesiniń tirkelgen derekterimen sáıkestigin tekseredi. Sonymen qatar ony Qazaqstan Respýblıkasynyń uıaly baılanys jelilerinde paıdalanýdyń zańdylyǵyn rastaıtyn derekqorlarda aqparattyń bolýyn qaraıdy. 

Operator ıelerine olardyń qurylǵylarynyń mártebesi týraly habarlaýǵa mindetti. Máselen, sur tizimge ense smartfondy paıdalanýdyń zańdylyǵyn rastaý qajettigi týraly ıesine eskertý kerek. Al eger ıesi verıfıkasıany belgilengen merzimde ótpese, qurylǵy avtomatty túrde qara tizimge kóshiriledi jáne mobıldi jelige kirý buǵattalady.

"Sáıkestendirý kodtary derekqorynyń operatory tekserýdi aıaqtaǵan soń, teris nátıje bolǵan jaǵdaıda 3 jumys saǵaty ishinde qurylǵy týraly málimetterdi qara tizimge kóshiredi. Keıin uıaly baılanys operatorlaryna tıisti habarlama jiberedi. Al uıaly baılanys operatory qurylǵy ıesine tyıym salý negizderin kórsete otyryp, baılanys qyzmetterin usynýǵa tyıym salynǵany týraly habarlaıdy", – delingen habarlamada. 

Sonymen qatar jóndeýden ótken qurylǵylardyń tirkelýin baqylaý qosymsha kúsheıtildi. Ýákiletti qyzmet kórsetý ortalyqtarynda IMEI-di aýystyrý kezinde derekter GSMA halyqaralyq bazasy (ǵalamdyq uıaly baılanys júıesi qaýymdastyǵynyń derekqory) arqyly rastalýǵa tıis.

Buıryq resmı jarıalanǵan soń 60 kúnnen keıin kúshine enedi.