Baq pen sor da, taq etip taıqy mańdaıǵa qonary daýsyz. Sodan bolar mańdaıǵa jazǵan jartyńdy kezdestirgende ne baq, ne soryń sýyrylyp aldyńnan shyǵary. Menińshe, jaryńdy jańylmaı tapsań baǵyń da, jaza bassań soryń. Sondyqtan da qabyrǵańnan jaratylǵan qymbattyńdy kózben kórip, kóńilmen ólshep kúdik pen kúmánnan arylǵan soń baryp sezimińdi sezdir.

Óz basym ony jolyqtyrǵanda, on oılanyp, san tolǵanyp toqeteri toıǵa tirelgende dıalog bylaı bastalǵan edi: 
─ Altynym meniń, alǵashqy aıtarym, er jigit áıelin aýystyrsa aýystyrar, biraq áke-sheshesin eshkimge aıyrbastaı almas. Kesetip alarym, kelispeı qalsaq eń qıyny men seni tastap ekinshisin, bolmasa úshinshisin alarmyn. Al ata-anamdy tastaı almaımyn. Sondyqtan anamdy syıla, áke-shesheme syıly bol!
─ Árıne!
─ Qalqam meniń, qazaqta, qyz balaǵa qaratyp «Er jigittiń eteginen usta» degen sóz bar. Men qaıda barsam, sonda bolasyń. Ómirdiń ystyǵy men sýyǵyn qaımyqpaı, qabaq shytpaı birge kóresiń. 
─ Árıne!
─ Kúnim meniń, basynan aıtaıyn basymda baılyǵym joq. Biraq seni jylatpaı asyrarlyq aqylym bar. Baqyt baılyqta emes, qanaǵat pen shúkirshilikte. Qaraqat kózińe tamshy jas ildirmeı baqytty etýge qajyr-qaıratym men jigittik sózim bar.
─ Túsindim.
─ Aqyldym meniń, eregesseń jeńilesiń, erkeleseń jeńesiń. Aıtar sózińdi aıǵaı-shýsyz ebin taýyp jetkize bil. Ár nárseni aqylǵa sal. Atymdy atama, «siz de». Siz degen jerde syılastyq bar.
─ Maqul. 
─ Qymbattym meniń, qara shańyraqqa kelin bolyp túskennen keıin kelimdi-ketimdi kisi kóp. Qabaǵyńmen qarsy al. Peıilińmen shyǵaryp sal.
─ Jaraıdy.
─ Sáýlem meniń, eshqashan aılyǵymdy alaqanyńa ákep salmaımyn. Úıdiń qarjysyn óziń esepteısiń, qarajatyn menen alasyń. Qosymsha óziń tapqan tabysyń óz erkińde. "Joq" dep jylamaısyń. Bardy ysyrap etpeısiń.
─ Árıne!
─ Aq mańdaılym, jigittik jigerimdi muqaltyp, erkektik namysymdy jyrtyp, ózge bireýdi oılaý túgili ózgeshe qaraýǵa da qaqyń joq. Ondaı jaǵdaıda arty ajalmen aıaqtalady!
─ Bilemin.
─ Aqyldym meniń, ótirik aıtpa, tek shyn sóıle. Adam qateliksiz bolmaıdy, ondaı jaǵdaıda shynshyl bol. Men qalaı bolsa da, shyn sóılegen adamdy keshire alamyn. Al jalǵan sóılep, sońynan bilinip jatsa, ondaı adamdy eshqashan keshire almaımyn.
─ Jaraıdy.
─ Jan-jarym meniń, sen qalaı osynyń bárin adamgershilikpen minsiz atqarsań, men de saǵan bar meıirimdi tógemin. Ómirimniń sońyna deıin qabaǵyńa kirbiń túsirmeýge, alaqanymda aıalap ustaýǵa ant etemin!
─ Raqmet! Meniń de sizge aıtar bir shartym, bir tilegim bar...
─ Aıta ǵoı...
─ Esh ýaqytta aldymen anańyzdy qýantpaı turyp, maǵan syılyq ákelýshi bolmańyz! Aldymen anańyzǵa syılańyz. Sebebi tapqan anasyn umytyp, janyndaǵy áıeliniń sózinen shyqpaıtyn ezder maǵan unamaıdy. Óıtkeni bolashaq ulymyz sizden úlgi alady. Sol jaǵdaıdyń súıgen jaryńyzdyń basynda qaıtalanbaýy úshin saq bolyńyz. Al tilerim ekeýmiz uzaq ómir súrgesin siz menen buryn ómirden ozyńyz.( árıne kimniń qashan óletinin Alla biledi) dese de men solaı tileıtin edim.
─ Shartyńdy oryndaımyn, tilegińdi túsinbedim...Sonda sen basqa shalǵa tıip ketpeksiń be? – dep kúldim. Ol da jymıyp kúldi.
─ Men sizdi artymda japadan-jalǵyz qaldyrǵym kelmeıdi. Qartaıǵan shaǵyńyz da men bolmasam, kıimińizdi kim jýyp berer, shaıyńyzdy kim qaınatyp, shúıirkelesip dastarqanda otyrar. Al men ústimdi ózim jýyp, tamaǵymdy ózim jasap jeı alamyn. 
Onyń bir sharty men bir tileginen-aq, úlken dúnıeni ańǵardym...

Oǵan degen mahabbatym burynǵydan da bekı tústi. Árıne, biz bul sharttarmen júz paıyz júre almasaq ta, nıetimiz aq, adal bolǵan soń baqytty bolarmyzǵa kámil sendim. Alla taǵalanyń ádildigi sheksiz. Pıǵylyńa qaraı beredi, nıetińe qaraı ómir súresiń. Ár qazaqtyń alǵash kótergen aq otaýynda baqyt pen shattyq ornasyn!

Jarqynbek Jumadil