Rohındja musylmandaryna jasalǵan zorlyq-zombylyq isterine baılanysty Mánma basshysy Aýn San Sý Chıge kóptegen elderden narazylyqtar kúsheıe túskendikten, ol BUU Bas Assambleıasynyń isterine qatystyrylmaıtyn boldy dep habarlaıdy Qamshy.kz aqparat agenttigi sheteldik BAQ-qa silteme jasaı otyryp.

BUU-nyń Qaýipsizdik keńesi búgin Mánmadaǵy qandy qyrǵynǵa qatysty kezekten tys májilis ashty. Halyqaralyq qaýymdastyqtyń málimetine súıensek, rohındja musylmandaryna qarsy áskerı áreketten 400-den astam adam qaza bolyp, 370 myń halyq Bangladeshke bas saýǵalap qashyp barǵan. Sonymen birge aımaqta keıbir aýyldar túgelimen órtenipti.

BUU osy jaıttarǵa baılanysty, Mánma úkimetin etnıkalyq qyrǵynǵa jol bergeni úshin aıyptady. Al Mánma úkimeti bolsa ózderiniń rohındjanyń búlikshi kúshterimen kúresip jatqanyn, qarapaıym halyqtyń zardap shegip jatpaǵanyn aıtýda. Alaıda Mánma úkimeti ne dese de, turǵyndarynyń basym kóbi býddıstterden turatyn Rakhaın shtatyndaǵy musylmandarǵa jasalǵan qysymdy jasyra almaıtyny belgili. Ári Rohındja musylmandary birneshe jyldan beri Mánmada ómir súripkele jatqanyna qaramastan Mánma úkimeti olady bosqyn retinde sanap kelgen. Álemdik qaýymdastyq jáne kóptegen eldiń úkimetteri Mánma basshysyn "qyrǵyndy toqtatyp, musylmandardy qorǵaýǵa eshqandaı áreket etpedi" dep aıyptap otyr.

Aıta ketetin bolsaq, Aýn San Sý Chı osydan eki jyl buryn bılik basyna kelgen. Odan buryn demokratıany qoldaý kezindegi áreketteri úshin 15 jyl úı qamaǵynda bolypty. Osy úshin de oǵan Beıbitshilik Nobel syılyǵy berilgen.