Almatyda 1 tamyzdan bastap qoǵamdyq kólikterde saralanǵan tarıf engizilgen bolatyn. «Ońaı» JSHS búgin avtoparkterge túsetin 1 mlrd. teńgeden astam túsim kóleńkeli aınalymnan shyqqanyn málimdedi, dep habarlaıdy Qamshy.kz aqparat agenttigi.

Almatylyqtar arasynda «OŃAI» kartasyn qoldanýshylar sany 3,5 esege artqan. «Ońaı» JSHS-niń málimdeýinshe, saralanǵan tarıf engizilgeli beri bir jarym aı ishinde avtoparkterge 2 mlrd. teńgege jýyq túsim túsken. Qyrkúıektiń 1-i men 12-si aralyǵyndaǵy tranzaksıalardyń jalpy kólemi 28,2 mln. teńge boldy. Bul shilde aıyndaǵy kórsetkishten 139 paıyzǵa (11,8 mln. teńgege) joǵary.

Osy aıdyń 12 kúninde avtoparkter túsimi 543 mln. teńgege jetip, «OŃAI» kartasymen jasalǵan tranzaksıalar kólemi 9 mıllıonǵa jýyqtaǵan.

«Sońǵy málimetter saralanǵan tarıf engizý sheshiminiń qanshalyqty mańyzdy bolǵanyn dáleldep otyr. Qazir avtoparkterdiń shynaıy qarjylaı aınalymy men jolaýshylar tasymalynyń naqty kólemin kórip otyrmyz. Qala ákimshiligine jiberiletin bul málimetter Almaty qalasynyń qoǵamdyq kólik salasyn damytýǵa septigin tıgizedi», - dedi «Almaty qalasynyń kólik holdıńi» JSHS dırektory Sadır Hamraev.

Saralanǵan tarıf engizilgenimen, 80 teńge kólemindegi negizgi jolaqy baǵasy ózgerissiz qalyp, barlyq jeńildikter sol qalpynda saqtaldy.

Eske salsaq, 1 tamyzdan bastap Almatynyń qoǵamdyq kólikterine saralanǵan tarıf engizildi. «Ońaı» kartasyn qoldanýshylar 80 teńge tólese, qolma-qol esep aıyrysý 150 teńgeni quraıdy. Bul rette, «Ońaı» kartasy arqyly barlyq jeńildikter saqtalǵan.

Aıta keter bolsaq, Almatylyq kompanıaǵa “Onaı” tólem júıesi qoldanysqa túsken alǵashqy bes kúnde 140 mln teńge tabys ákelgen bolatyn. 

Saralanǵan tarıf engizilgen eki aptanyń ishinde «Ońaı» kartasy arqyly 7 584 651 tranzaksıa jasalǵan. Bul saralanǵan tarıf engizilgenge deıingi  kórsetkishpen salystyrǵanda eki esege artyq boldy. Sondaı-aq jańa tarıf engizilgennen beri beri qolma-qol esep aıyrysý tórt esege azaıǵan.

Karta paıdalanylǵan alǵashqy úsh kúnde qalalyq jolaýshylar tasymaly ókilderi kiristerin 60 paıyzǵa tómendetip alǵan. Avtopark jetekshisiniń aıtýynsha, “ońaıdyń” aınalymǵa shyǵýy olardy bankrotqa ushyrata jazdaǵan.

Jańa tólem júıesin engizý arqyly qala basshylyǵy avtobýstar men troleıbýster parkin jańartyp, jolaýshylardyń qarjysyn jeke park basshylyǵy men júrgizýshilerdiń qaltasyna emes, joldardy abattandyrýǵa baǵyttaǵan bolatyn.

Bul karta qoǵamdyq kóliktiń barlyq túrine jaramdy bolyp tabylady. Mektep oqýshylary, stýdentter men zeınetkerler úshin jeńildikter qarastyrylǵan. Olar jol aqysynyń 50 paıyzyn ǵana tóleıdi. Al jasy 75-ten asqan qarttar men soǵys ardagerlerine tegin. Qazir 50 paıyz jeńildigi bar biryńǵaı kartalardyń 214 myń satylǵan. Biraq bul tólem júıesine kóńili tolmaıtyndar da bar.