Salalyq qaýymdastyqtar men kompanıalarǵa jalǵan lotoreıalar men aqsha utysy bar ınternet-oıyndarynyń zıandy áseri týraly, sondaı-aq zańsyz oıyn bıznesimen aınalysatyn tulǵalardyń, jalpy aýmaqta sondaı oıyn avtomattaryn ornalastyrý úshin orynjaıdy jalǵa berýshiler men olardyń ıeleriniń qylmystyq jaýaptylyǵy týraly kezekti ret habarlandy dep jazady Qamshy.kz aqparat agenttigi.

Bul máseleler Almaty qalasy kásipkerler palatasynyń alańynda Konsýltasıalyq keńestiń otyrysynda aıtyldy.

«Ekonomıkalyq tergeý qyzmetiniń málimeti boıynsha 2017 jyldyń 8 aıy ishinde 50 oıyn mekemesiniń zańsyz jumysy toqtatyldy. Onyń ishinde 43 mekeme elektrondy kazınomen aınalyssa, 7 – oıyn apparatynyń zaly. 617 kompúterlik tehnıka, 246 teledıdar, 117 elektrondy termınal, 21 oıyn avtomaty men shamamen 6 mln teńge aqshalaı qarjy alyndy», – dep habarlady Almaty qalasy Memlekettik kirister departamentiniń basshysy Asqar Tynysbekov.

Departament basshysy búdjetke túsetin salyq pen ózge de tólemderdiń boljanǵan kórsetkishin de baıandady. Almatyda 183 754 kásipker (jumys istemegenderdi eseptemegende)  jumys isteıdi, onyń ishinde 74,9 myńy zańdy tulǵa jáne 108,9 myń – jeke kásipkerlik. Osy jyldyń 27 qyrkúıeginde málimet boıynsha Almaty qalasy búdjetiniń kiris bóliginde 103%-ǵa oryndalǵan, ıaǵnı 1 206 058 mln teńge josparynda 1 246 762 mln teńge túsim eseptelgen. Ótken jylmen salystyrǵanda 112% nemese 132 533 mln teńgege artyq.

«Konsýltatıvtik-keńes berýshi organnyń aldyńǵy otyrysynyń qorytyndysy boıynsha bıznestiń saýalyna qatysty «Qazaqtelekom» AQ elektrondy shot-faktýra aqparattyq júıesi kanaly operatorynyń ótkizý qabiletin arttyrý týraly usynys joldady. Nátıjesinde kanaldyń júgi turaqtaldy jáne 500 mbıt/s deıin retteldi. Zańnamaǵa kedendik tazalaý kezinde sheteldik valútada operasıany qaıta esepteýde paıda bolatyn tıyn aıyrmashylyǵyn esepteýge qatysty ózgertý engizý usynysy boıynsha joǵaryda atalǵan jaǵdaılardy zańnamanyń buzylǵany dep qaramaý jáne kameraldyq baqylaý júrgizgende ákimshilik jaýapkershilikke tartpaý sheshimi qabyldandy», – dep atap ótti Asqar Tynysbekov.

Kezdesý barysynda elektrondy shot-faktýrany berý kezinde qaıtalanatyn qatelikter, ASTANA-1 aqparattyq júıesin engizý máseleleri qaraldy.

Konsýltatıvtik keńes otyrysynyń maqsaty – kásipkerlik sýbektileri men salyq jáne keden isteri salasynda qyzmet atqaratyn tulǵalarǵa kómek berý, salyq jáne kedendik retteýdi jetildirý, ákimshiliktendirýdiń tıimdi tásilderin engizý, elimizde bıznes júrgizý úshin qajetti jaǵdaılar jasaý.