Otbasy, ásirese ana men balanyń densaýlyǵy -  ult  saýlyǵynyń kepili.  Batys Qazaqstan oblystyq densaýlyq saqtaý mamandary demografıaǵa dúmpý ákeletin  urpaq órbitýge qabiletti áıelderdiń densaýlyǵyn jiti qadaǵalap keledi.   

Óńirde názik jandylardyń ishindegi 169256-sy   urpaq órbitýge qabiletti eken. Olarǵa oblys boıynsha medısınalyq uıymdarda  30-ǵa jýyq otbasyn josparlaý kabıneti jumys jasaıdy eken. Bul kabınette qyz-kelinshekter júktilikti josparlaýdyń mańyzdylyǵyn uǵynyp, túrli tuqym qýalaıtyn aýrýlar, týa paıda bolatyn aqaýlar, juqpaly jáne taǵy basqa dertter boıynsha keńes ala alady. Oblystyq densaýlyq saqtaý basqarma basshysynyń orynbasary Nurdanat Berkinǵalıdyń málimetinshe, óńirde júkti áıelderdiń 8 %-y qanazdyq dertimen esepte turady eken. Bul kelinshekter QR Densaýlyq saqtaý mınıstrliginiń 2011 jylǵy 4 qarashadaǵy №786 «Tegin medısınalyq kómektiń kepildik berilgen kóleminiń sheńberinde ambýlatorıalyq deńgeıde belgili bir aýrýlary bar  halyqty tegin qamtamasyz etý úshin dárilik zattardyń jáne medısınalyq maqsattaǵy buıymdardyń jáne mamandandyrylǵan emdik ónimderdiń tizbesin bekitý týraly» buıryǵyna sáıkes temir súlfaty preparattary men askorbın qyshqyly, folı qyshqyly sekildi dári-dármekterdi tegin paıdalanýda. 

Sonymen qosa  óńirdegi densaýlyq saqtaý mamandarynyń aıtýynsha, qyz-kelinshekterdiń arasynda beleń alǵan gınekologıalyq dertterdiń  ishinde jatyr moınynyń jarasy, anabez qosalqysynyń qabynýy, jatyr mıomasy jıi kezdesedi eken. Atalmysh dertterge jynystyq jolmen taraıtyn ınfeksıalar, durys tamaqtanbaý, nervtik stressterden bolatyn endokrındik aýytqýlar, ekologıa jáne  jynystyq seriktiń kóp bolýy sebep bolady eken. Atalmysh sala mamandary názik jandylarǵa gıgıena saqtap, jylyna kem degende bir ret gınekolog dárigerge qaralyp, inshik súrtindisin tapsyrýǵa keńes beredi.

Gúlim AQAP,

Batys Qazaqstan oblysy