Álemdik basylymdarda jaryq kórgen basty jańalyqtarmen tanys bolyńyzdar. Sholýdy Qamshy.kz aqparattyq agenttigi Azattyq saıtyna silteme bere otyryp jazady.
Qytaıdyń Komýnıstik partıasy prezıdent Sı Szınpındi partıanyń negizin qalaýshy áke Mao Szedýn deńgeıine deıin kóterdi, onyń aty-jóni men teorıasyn partıa Jarǵysynyń mátinine engizdi dep jazady New York Times. Bul «tarıhı sheshim» eldiń barlyq sheneýnikterine Sı Szınpın men onyń saıasatyn synaý budan bylaı ıdeologıaǵa qarsy kelý bolyp esepteletinin eskertedi. «Endi onyń teorıasy men urandary mektepterde, BAQ-ta, memlekettik mekemelerde paıda bolýy múmkin», dep atap ótedi basylym.
«Men Saýd Arabıaǵa birqalypty ıslamdy qaıtaramyn», - dep málimdedi The Guardian gazetine bergen suhbatynda taq murageri, hanzada Mohammed ben Salman. Onyń sózderinshe, sońǵy 30 jylda Saýd Arabıada Irandaǵy Islam revolúsıasy áserinen óte qatal ilimder paıda boldy. “Bizdiń el G20-ǵa kiredi. Bizde álemdegi eń iri ekonomıka bar. Biz úsh kontınenttiń ortasynda ornalasqanbyz. Sol sebepten Saýd Arabıa jaqsy jaǵynan ózgerse, aımaq ta, álem de ózgeredi. Biz bárinen qoldaý tabamyz dep úmittenemiz», - dep málimdedi ben Salman. Osynyń aldynda taq murageri Saýd Arabıa, Iordanıa jáne Egıpet arasynda táýelsiz ekonomıkalyq aımaq qurý jobasyn málimdegen. «Saýd Arabıa úkimeti bul jobaǵa 500 mıllıard dollar quıýdy qarastyryp otyr», dep jazady The Guardian.
Túrikterdiń atasy Mustafa Kemal Atatúrik qaıtys bolǵannan keıin 80 jyldan soń Túrkıada „barlyq túrikterdiń anasy“ paıda bolýy múmkin. Últraultshyl saıasatker Meral Aksenerdiń jaqtastary ony osylaı dep ataıdy dep jazady Frankfurter Allgemeine Zeitung nemis gazeti. Qyzýqandy Aksener 25 qazanda jańa partıa qurýǵa nıetti ekenin málimdedi. Onyń maqsaty 2019 jyly ótetin prezıdent saılaýynda jeńiske jetý.
AQSH Hermitage Capital qorynyń basshysy jáne "Magnıtskıı zańy" bastamashysy Ýılám Braýderge Reseı ony Interpol tizimine engizgennen keıin, Amerıkaǵa vızasyz kirýge ruqsat berdi dep jazady Washington Post. Basylym Kreml Braýderdi túrmede qaza tapqan zańger Sergeı Magnıtskııdiń qurmetine reseılik búdjetten urlanatyn qyrýar qarjynyń syzbasyn ashyp kórsetti. Ótken aptada Kanada «Magnıtskıı akti» dep atalatyn jobany jarıalady. Onda Reseıde adam quqyqtaryn buzyp kelgen sheneýnikterdiń tizimin jarıalaǵan. “Pýtın meni álemdegi birinshi jaýy retinde sanaıdy, óıtkeni men onyń osal jerin taptym”, - deıdi basylymǵa Ýılám Braýder.
Katalonıa úkimeti Madrıdtiń aımaqta merziminen buryn saılaý ótkizý josparyn qarap jatyr dep habarlaıdy El Pais "Halyq birligi kandıdatýrasy" (CUP) solshyl partıanyń tóraǵa orynbasary Karles Rerdiń sózderine silteme jasap. Kóptegen separatıstik partıanyń lıderleriniń biri merziminen buryn ótetin saılaý - «bul Katalonıa táýelsizdigine núkte qoıatyn ıadrolyq qarý” dep atady. Tarıhta birinshi ret Ispanıa úkimeti eldegi provınsıanyń biriniń avtonomıasyn shekteýdi sheshti. Úkimeti Konstıtýsıaǵa súıenip, «aımaqtyń biri memleket aldyndaǵy mindetterin oryndamaı otyr, bul Ispanıanyń ulttyq múddesine qaıshy. Úkimet senattyń maquldaýymen bul jaǵdaıdy túzeý úshin zań aıasynda kez kelgen shara qoldaýy múmkin» dep jarıalaǵan.
