2017 jyldyń 29 qarashasy kúni saǵat 16. 00-de Shyǵys Qazaqstan Óner mýzeıinde Nıkolaı Pavlovıch Ashtemanyń «Meniń Otanym - Qazaqstan» atty mereıtoılyq jeke kórmesiniń ashylý saltanaty ótedi, — dep habarlaıdy Qamshy.kz aqparat agenttigi Shyǵys Qazaqstan óner mýzeıiniń baspasóz qyzmetine silteme jasaı otyryp. Kórme Qazaqstan Respýblıkasynyń Tuńǵysh Prezıdenti kúnine arnalady.    

Óskemen sýretshileriniń arasynda Nıkolaı Pavlovıch Ashtemanyń esimi erekshe jáne laıyqty qurmetke ıe. Ol – metr, kásipqoı, Qazaqstan Sýretshiler odaǵynyń múshesi, shyǵarmashylyq toqyraý degenniń ne ekendigin bilmeıtin keskindemeshi jáne grafık. 1986 jyly N.P.Ashtema Bakýde ótken «Kaspıı mańy respýblıkalarynyń bıennalesi» halyqaralyq baıqaýynyń laýreaty atanady, al 1986 jáne 1987 jyldary onyń jumystary Máskeýde ótken kórmege qoıylady. 1991 jyly onyń kartınalary Harkovte ótken halyqaralyq grafıka jáne plakattar kórmesinde, 1993 jyly Torontodaǵy mınıatúralar kórmesinde atap ótiledi. 1987 jyly Nıkolaı Pavlovıchti KSRO Sýretshiler odaǵynyń músheligine qabyldaıdy. Sodan beri onyń ómir jolynda qanshama kórmeler boldy deseńizshi! Tek Almatyda ǵana jıyrmadan astam kórmede ekspozısıalary kórsetildi. 2003 jyly ol shyǵysqazaqstandyqtar arasynda birinshi bolyp Prezıdenttik mádenı ortalyǵynda (Astana) óziniń jeke kórmesin ashty. Jalpy, qylqalam sheberi óziniń árbir mereıtoıyn jeke sýret kórmesin ótkizýmen atap ótip keledi. Bıylǵy kórmesi sýretshiniń jetpis bes jasqa tolýyna arnalyp otyr. Óziniń dúnıetanymy men shyǵarmashylyq ólshemin kórsetetin bul kórmesin sýretshi «Meniń Otanym – Qazaqstan» dep atady. Osy oraıda, bul kórmeniń Tuńǵysh Prezıdent kúnine arnalyp otyrýynyń ózi kezdeısoqtyq emes ekendigin, ekspozısıanyń  kórme mazmunyna sáıkes keletinin aıta ketý kerek.  Elimizdiń búkil qoǵamdyq jáne saıası ómiriniń reformatory retindegi memleket basshysynyń obrazy kóptegen jyldardan beri sýretshini tolǵandyryp keledi, al N.Á.Nazarbaevtyń portretin ol birneshe ret salyp, oqtyn-oqtyn túzetýler engizip otyrdy.

 Nıkolaı Pavlovıch Ashtema – Ýkraınanyń týmasy. Ol 1942 jyly 5-jeltoqsanda Kırovograd oblysynyń Chervonnaıa Dolına selosynda týǵanymen, sýretshiniń búkil shyǵarmashylyq ǵumyry Qazaqstanmen baılanysty. 1979 jyly ol Almatydaǵy N.V.Gogol atyndaǵy kórkemsýret ýchılıshesin bitirip, Óskemen qalasyna keledi. Osyndaǵy kórkemsýret-ónerkásiptik sheberhanalarynda L. Ageıkın, P. Shıshov, V. Rapoport, B. Fransýzov, G. Merqasımov syndy qylqalam sheberlerimen birge jumys istegen. 1980 jyldan qazirge deıin ol eresekterge arnalǵan beıneleý óneri stýdıasyna jetekshilik etedi. Nıkolaı Pavlovıch D.Serikbaev atyndaǵy Shyǵys Qazaqstan memlekettik tehnıkalyq ýnıversıtetiniń, Shyǵys gýmanıtarlyq ınstıtýtynyń, Shyǵys Qazaqstan aımaqtyq ýnıversıtetiniń stýdentterine sýret jáne keskindemeden sabaq bergen.

  Bul kórme – sýretshiniń kópjyldyq shyǵarmashylyq jáne pedagogıkalyq qyzmetiniń qorytyndysy. Úsh zalda ár janrdaǵy keskindeme jáne grafıkalyq jumystary ornalasqan. Sizder portretter, peızajdar, natúrmorttar, sújettik sýretterdi tamashalaı alasyzdar. Olardyń kópshiligi alǵash ret qoıylyp otyr. Sýretshi áli kúnge deıin baspa stanogy men lıtografıa, ofort, messotınto sıaqty baspa grafıkasynyń kóne tásilderi men qupıalaryn saqtap keledi. Gýash – onyń plenerdegi jumys kezinde qoldanatyn súıikti tehnıkasy. Sýretshiniń akvareli men pasteliniń aıqyndyǵy men kórkemdigi onyń maıly boıaýynyń sapasynan eshbir kem emes. N.P.Ashtemanyń kezkelgen janrdaǵy shyǵarmalary óte joǵary, mýzeılik deńgeıde salynǵan. Alaıda, oǵan naǵyz tanymaldylyqty onyń patrıottyq taqyryptaǵy janrlyq kartınalary ákeldi. Qazaq handyǵynyń 550 jyldyǵyna arnalǵan  respýblıkalyq grafıkter baıqaýynda birinshi oryn alǵan sol kartınalary úshin sýretshi úkimettik nagradalarmen - «QR Sýretshiler odaǵynyń 80-jyldyǵy» medali men Ábilhan Qasteev atyndaǵy medalmen marapattaldy. Kórmede sizder, aty ańyzǵa aınalǵan Tomırıs zamanynan búginge deıingi táýelsiz Qazaqstannyń tarıhyn kóre alasyzdar!

Bizdiń sýretshige klasıkalyq turǵydan jetpis bes jas degenińiz tipti úılespeıtin sıaqty. Onyń ómirge degen qyzyǵýshylyǵy men eńbeksúıgishtigi, shyndyǵynda, jasóspirimdikindeı. Plenerde taý-tasta júgirip júrý, shabyty kelgende túni boıy jumys isteý – Nıkolaı Pavlovıchtyń úırenshikti ómir salty. Barlyq ekonomıkalyq, saıası jáne ishki daǵdarystaryn óz sheberhanasynda, kenep-boıaýlarynyń janynda ótkizedi. Ol únemi shákirtteriniń ortasynda. Onyń zeınetker zamandastarymen birge áńgime soǵyp, sákide otyrǵanyn elestetý tipti múmkin emes, Meıli, árdaıym solaı bolǵaı! Naǵyz sýretshiniń  ómirinde «qurmetti demalys» degen uǵym bolmaıdy.