Qazaq tilin latyn álipbıine kóshirý reformasy elimizde áli de talqylanyp jatyr. Elimizdiń ár óńirinde qoǵam belsendileri, ult zıalylary, til mamandary, jastar uıymdary jáne qarapaıym turǵyndarǵa deıin óz oılaryn aıtyp, usynystaryn jetkizýde. Dál osylaı usynys aıtqan Almatydaǵy Azamattyq avıasıa akademıasynyń jastary bas qosyp, ǵylymı konferensıa ótkizdi.
«Latyn álipbıi – memlekettik til tiregi» dep atalǵan jıyn «Memlekettik til – meniń bolashaǵym» atty aqparattyq nasıhattaý sharasy aıasynda ótkizilip otyr. Sondaı-aq, el Prezıdenti N.Á.Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasynda aıtylǵan qazaq tilin latyn álipbıine birtindep kóshirý jobasyn talqylaý maqsatynda stýdent pen ustaz pikiriniń basyn qosty.
Konferensıa barysynda akademıanyń belsendi stýdentteri latyn álipbıine kóshýdiń tıimdiligi men qajettiligin aıtyp, óz oılaryn ǵylymı turǵyda dáleldeýge tyrysyp jatty.
- Esterińizde bolsa, osydan birneshe jyl buryn kez-kelgen jastyń smartfonynda «Agent» degen áleýmettik messendjer boldy. Sol jeliniń keń qoldanysta bolǵan ýaqytynda barlyǵy derlik latyn qarpimen hat almasatyn. Iaǵnı, búgingideı tehnologıa ónimderiniń qaryshtap damyǵan ýaqytynan buryn da latyn árpin qoldaný bar bolatyn. Sondyqtan, latyn álipbıin qoldanysta erkin bolýy asa úlken qıyndyq týdyrmaıdy dep oılaımyn. «Zamanyna qarap bórkińdi kı» - degendeı, bul jańashyldyqty qoldap, tezirek qoldanysqa engizýdi usynǵan durys sekildi, - deıdi Azamattyq avıasıa akademıasynyń stýdenti Janbolat Zákirov.
Jıyn barysynda jastar tilge qatysty ánder men jyr joldaryn da aıtýdy jón kórdi. Kákimbek Salyqovtyń «Tilińdi qorǵa qazaǵym» atty óleń shýmaǵyn oqyǵan stýdenttiń oryndaýy da tipti taqyrypty asha túsip, qatysýshylardyń rýhyn oıatqandaı boldy.
- Elimiz úshin latyn qarpine kóshý qaı jaǵynan alyp qarasaq ta qolaıly. Biz negizinen Ahmet Baıtursynov aıtqan nusqany alyp otyrmyz. Áli de ózgerister bolady. Qatań, uıań dybystardy túsinip oqý, halyqqa yńǵaıly bolý úshin arnaıy komısıa quryldy. Oǵan qosa halyq arasynda orystardyń jáne basqa ózge ulttar ókilderiniń til syndyryp qazaqsha úırenýine jol ashady – deıdi Qazaqstan tarıhy jáne áleýmettik-gýmanıtarlyq pánder kafedrasynyń meńgerýshisi Bolatbek Shókenov.
Shara kezinde Azamattyq avıasıa jastarynyń latyn árpine kóshýdi tolyǵymen qoldaıtyndyǵy týraly shaǵyn beınerolık kórsetildi.
- Latyn álipbıine kóshý, ana tilimizdiń bolashaǵyn oılap, qoldanys aıasyn odan ári keńeıte túsýge múmkindik jasap qana qoımaı, ony osy zamanǵy aqparattyń tiline aınaldyrady. Ári latyn qarpi qazaq elin álem memleketterimen jaqyndastyryp, jarqyn bolashaqqa bastaıdy dep úmittenemiz. Sondyqtan, Qazaq alfavıtin 2025 jylǵa qaraı latyn grafıkasyna kóshirýge daıyndyq jumysyn osy bastan bastaıyq dep Azamattyq avıasıa akademıa stýdentteri men ujymy osy sharany ótkizip otyr – deıdi oqytýshy Áshirgúl Seıdildaeva.
Jıyn sońy stýdent jastardyń «Kók týdyń jelbiregeni» ánin birge shyrqaýymen aıaqtaldy.
