Sh.Aımanov atyndaǵy «Qazaqfılm» kınostýdıasynda «Elbasy joly» kınoepopeıasy «Beıbitshilik kindigi» atty kınokartınasynyń qoıylymdyq qorǵalymy ótti. Qorǵalym barysynda fılmniń rejıseri Aqan Sataev kınostýdıanyń Eksperttik keńesine daıyndyq kezeńinde atqarylǵan jumystar týraly aıtyp, túsirilim tobyn tanystyra otyryp, toptyń túsirilimge daıyn ekenin jetkizdi, dep habarlaıdy Qamshy.kz aqparat agenttigi "Qazaqfılm" kınostýdıasynyń baspasóz qyzmteine silteme jasap.

«Beıbitshilik kindigi» fılmi Aqmolanyń qarapaıym qaladan jas orda – Astanaǵa aınalýy men kúni búginge deıingi kezeńi týraly baıandaıdy. Kartınada 1994 jyly astananyń Aqmolaǵa aýysyp, Astananyń qysqa merzim ishinde kún sanap damyp kele jatqanyn jáne úzdik álem astanalary qataryna engenin kórsetedi. 

- Bizdiń fılmimiz saıasat pen saıasatkerler týraly. Sol sebepten de biz PKQ, Prezıdent hattamasynan, keńsesinen keńester alyp jatyrmyz. Astananyń turǵyzylý kezinde túrli qıyndyqtar oryn alǵany jáne prezıdent pen onyń aınalasyndaǵylardyń olardy qalaı eńsergenderi týraly kóp aqparat aldyq. Fılmdegi negizgi dramatýrgıalyq qaqtyǵys ta osy jaıynda bolmaq. Bizge Almaty men Astananyń barlyq mekemeleri qol ushyn sozýda. Sol sebepten de fılm óte shynaıy shyǵady dep bilemiz. Eń bastysy jaqsy fılm jasaımyz degen senimimiz bar. Onyń ústine, «Qazaqfılm» kınostýdıasy kameralarǵa arnalǵan zamanaýı obektıvterin satyp aldy. Endi túsirilgen materıaldyń sapasy joǵary bolady, - dedi rejıser.


Qorǵalym kezinde túsirilim toby fılmde qoldanylatyn barlyq zattar men kostúmderdi ákep, kórme uıymdastyrdy. Eksperttik keńes aldynda fılmniń atqarýshy prodúseri Álıa Meńdiǵojına men kastıng-dırektor Jaına Ábdıeva sóz alyp, túsirilim alańdary jáne akterlermen jumys jasalý barysyn aıtyp berdi. 

- Túsirilimder Almaty men Astanada ótedi. Birinshi túsirilim blogy jeltoqsan aıynda Almatyda bolady. Sosyn qańtar aıynda Astanada túsiremiz. Ol jaqtan qaıtqan soń, qaıtadan Almatyda jalǵastyramyz. Sondaı-aq, jazǵy mezgilinde túsiretin epızodtarymyz da bar. Fılmge sheteldik grım jónindegi sýretshini shaqyrttyq, ol kıno salasynda kóptegen júldelerdiń ıegeri – Mark Kýler, - dedi Álıa Meńdiǵojına.

- Biz qazir akterlerdiń plasıkasy jáne sóıleý mánerimen tyǵyz jumys istep jatyrmyz, óıtkeni olardyń somdaıtyn keıipkerleri ómirde bar kisiler. Biz kóptegen muraǵattyq materıaldardy akterlerge kórsetip jatyrmyz, bul akterdiń óz róline enýine yqpal etedi, - dedi kastıng-dırektor Jaına Ábdıeva.

Daıyndyq kezeńi barysynda fılmniń basty jáne ekinshi plandaǵy akterleri bekitilgen. Ekranda N.Á.Nazarbaevty teatr jáne kıno akteri Murat Ahmanov somdaıdy. Sonymen qatar, fılmde Erkebulan Daıyrov, Jan Baıjanbaev jáne kóptegen kıno maıtalmandary boı kórsetedi. 

- Basty rólge akter izdegende biz úshin portrettik uqsastyǵynan góri, onyń akterlik sheberligi mańyzdyraq boldy. Fılmde 14 aýyr grım bolady, ony Mark Kýler jasaıdy. Sonyń kómegimen akterdiń Elbasymen portrettik uqsastyǵyn keltiremiz. Al ekinshi plandaǵy akterlerdi negizenen túr-álpeti prototıpke uqsaıtyndaryn tańdadyq, - dep qosty A.Sataev.  


Sondaı-aq, qorǵalym kezinde Aqan Sataev derekti sahnalar bolatynyn aıtyp ótti:
- Biz Elbasynyń jáne konstıtýsıalyq bestiktiń qatysýymen Aqordada túsirilimder jasadyq. Bul Astananyń 20 jyldyǵyn atap ótý týraly jınalys sahnasy. 

Joba qorǵalymynda Eksperttik keńes músheleri – tanymal kınematografıster jáne kınostýdıa Prezıdenti Baqyt Qaıyrbekov boldy. Kınostýdıa basshysy shyǵarmashylyq topqa sáttilik tileı otyryp, óz oıyn aıtty. 
- «Shyǵarmashylyq top pen seniń boıyńda fılmdi jasaýǵa degen senimiń mol bolǵany quba-qup. Áli esimde, 1997 jyly qatty aıaz bolǵan, odan keıin ondaı aıaz bolmady-aý deımin. Menińshe, sol bizdiń bárimizge jaratqannyń jibergen synaǵy dep oılaımyn jáne sol qıyn belesti biz bárimiz de eńsere bildik», - dedi Baqyt Qaıyrbekov. 

•    Fılmniń qoıýshy-operatory qazaq jáne qyrǵyz kınosynyń metri – Hasanbek Qydyrálıev («Kóshpendiler», «Mońǵol», «Anaǵa aparar jol» «Baýyrjan Momyshuly» jáne basqalar). 
•    Kórkemdik bóligine jaýapty qoıýshsýretshi Nazıra Baıbekova («Qara shańyraq», «Baýyrjan Momyshuly», «Brıgada», «Anaǵa aparar jol», «Raıony» jáne basqalar). 
•    Sondaı-aq, brıtandyq sýretshi-vızajıst jáne protez makıajy boıynsha sarapshy – Mark Kýler shaqyrylǵan. Ol «Grand Býdapesht oteli» fılmine jasaǵan úzdik makıaj úshin «Oskar» júldesin jáne «Temir ledı» fılmine jasaǵan úzdik makıaj ben shash úlgisi úshin 87-shi Brıtan kıno Akademısynyń BAFTA syılyǵyn ıemdengen. 

«Elbasy joly. Beıbitshilik kindiginde» fılminiń shyǵarmashylyq toby túsirilimge aǵymdaǵy jyldyń sońyna qaraı shyǵady. Al fılm qalyń kórermenderge  2018 jyldyń jeltoqsan aıynda jol tartady dep josparlanýda. Fılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdıasy men «Sataıfılm» kınokompanıasy túsiredi. 


Óndirisi: Sh.Aımanov atyndaǵy «Qazaqfılm» AQ, «Sataıfılm» kınokompanıasynyń qatysýymen
Senarı avtorlary: Ádilbek Jaqsybekov, Tımýr Jaqsylyqov 
Redaktory: Aıdar Espenbetov
Qoıýshy-rejısseri: Aqan Sataev
Qoıýshy-operatory: Hasanbek Qydyrálıev
Qoıýshy-sýretshi: Nazıra Baıbekova
Kostúm jónindegi sýretshi: Álıa İsmaǵulova
Grım jónindegi sýretshi: Álıa Shmanova
Grım jónindegi shaqyrylǵan sýretshi: Mark Kýler
Kastıng-dırektory: Jaına Ábdıeva
Atqarýshy prodúser: Álıa Meńdiǵojına
Fılmniń prodúseri: Aqan Sataev

ANOTASIASY: Fılm 1994 jyldyń shilde aıynda Nursultan Ábishuly Nazarbaevtyń plenarlyq otyrysta astananyń Almatydan Aqmolaǵa aýystyrylatyny týraly jarıa etkenimen bastalady. Fılmniń sońy 1998 jyldyń 10 shildesi kúni qala kúnin toılaýmen aıaqtalady. Prezıdenttiń dittegen jospary boıynsha jańa astana táýelsiz Qazaqstan memleketiniń nyshany bolýy tıisti. Prezıdent aldynda oryndalýy múmkin emes másele – qysqa merzim ishinde asqaraly Alataýdan, Saryarqanyń keń dalasyna astanany aýystyrý turady. 

Anyqtamalyq aqparat: Murat Noıanbaıuly Ahmanov 1959 jyly 1 maýsymda Almaty oblysy Uzynbulaq aýylynda dúnıege kelgen. 1984 jyly Almaty teatr-kórkemsýret ınstıtýtyn (qazirgi Qazaq ulttyq óner akademıasy) akterlik, 1998 jyly rejıserlik bólimin bitirgen. Akter, Qazaqstannyń eńbek sińirgen artısi (1998). “Qurmet” ordeniniń ıegeri (2012). respýblıkalyq festıválderdiń 4 dúrkin bas júldelerdiń ıegeri.

1976 jyly Qazaq án-bı ansambilinde bıshi. 1984-1993 jyldary -Taldyqorǵan oblysy drama teatrynda akter, qoıýshy-rejısser qyzmetin atqarǵan. 1999-2001 jyldary Jezqazǵan mýzykalyq drama teatrynyń bas rejıseri. 2001-2005 jyldary Batys Qazaqstan oblysy drama teatrynyń bas rejıseri. 2005 jyldan Almaty oblysy drama teatrynyń dırektory – kórkemdik jetekshisi. Qazirgi tańda Ǵ. Músirepov atyndaǵy Qazaq Memlekettik Akademıalyq balalar men jasóspirimder teatrynda eńbek etedi.

M.Ahmanov 30-ǵa tarta rólde oınap, 20-dan astam spektakldi sahnalady. Ol qoıǵan S.Asylbekovtiń «Bir túngi oqıǵa» spektakli – VI respýblıkalyq, Á.Tájibaevtyń «Altyn kúmbez» tarıhı dramasy X respýbılkalyq festıválde bas júlde aldy.