«Nur Otan» partıasynyń «Baqytty otbasy – baqytty balalyq shaq» partıalyq jobasy aıasynda qurylǵan Batys Qazaqstan oblysyndaǵy sarapshylar toby otbasylyq úlgidegi balalar aýylyna baryp, búldirshinderdiń jaǵdaılarymen tanysty.
Oral qalasynyń Zashaǵan kentinde ornalasqan balalar aýylynda úsh jarym jastan 18 jasqa deıingi 73 bala tárbıelenýde. Onyń 16-sy jetim búldirshinder bolsa, qalǵany – ata-ananyń qamqorlyǵynan aıyrylǵandar. On shaqty záýlim úıdiń árbireýinde 7-8 baladan turady. Mundaǵy balalar jalpy orta bilim beretin qalalyq №20, №30 jáne №13 mektepterde bilim alýda. Sondaı-aq ótken jyly balalar aýylynyń 18-23 jastaǵy túlekteri úshin arnaıy Jasóspirimder úıi ashylǵan bolatyn. Atalmysh úıde balalar úıiniń túlekteri nemese arnaýly, joǵarǵy oqý ornyn bitirip, jumysqa kiriskenshe tura alady. Búgingi tańda bul úıde 11 jasóspirim ornalasqan.
- Bul mekemede eki jyldan beri qyzmet atqaryp kelemin. Balalarǵa otbasylyq jylý men tárbıe berip, qoǵamda óz isine jaýap bere alatyn tulǵa retinde qalyptastyrý úshin eńbektenip kelemiz. Balalar aýylynda ustazdarmen birge psıholog, logoped, defektolog, dıetolog mamandary da qyzmet etedi. Memleket tarapynan balalardyń kúndelikti tamaǵy men maýsymdyq kıimi qamtamasyz etiledi. Munda balalardyń basty tárbıesimen ana tárbıeshi aınalysady. Ana tárbıeshi aptasyna bir kún ǵana demalys ala alady. Talap boıynsha olardyń jeke ómiri mazalamaýy kerek jáne on segiz jasqa deıingi balalary bolmaýy qajet. Táýlik boıy ózine senip tapsyrylǵan búldirshinderdiń isher tamaǵyn, kıer kıimin qadaǵalaıdy. Ana tárbıeshi demalysqa ketkende ornyn apa tárbıeshi almastyrady. Mundaǵy balalardyń barlyǵy derlik úıirmelerge qatysady. Kitaphana, akt zaly, medısınalyq kabınet, shaǵyn sporttyq jattyǵý bólmesi, shyǵarmashylyq bólme, relaksasıalyq bólme úzdiksiz balalarǵa qyzmet atqaryp turady. Alaıda bir ókinishtisi, balalar aýylynda sporttyq alań joq. Balalar jazda syrtta júgirip jattyqsa, qysta shańǵy, kónkı tebedi. Voleıbol, basketbol, fýtbol sekildi sporttyq oıyndardy oınaýǵa múmkindik joq, - deıdi atalmysh mekemeniń dırektory Saǵynysh Ótebalıeva.
Záýlim úıdiń qaı-qaısysyna kirseń de, tap-tuınaqtaı jınalǵan sóreler men qyry shyǵyp tegistelgen tósek ornyna kýá bolasyz. Balalarǵa baýyrsaq pisirip júrgen Shynar esimdi ana tárbıeshini sózge tarttyq. Ol bul mekemede 2003 jyldan beri qyzmet atqarady eken.
-Qazir bul úıde segiz jan turamyz. Jýyrda kishkentaı qyz balany januıaǵa asyraýǵa alyp ketti. Múmkindigimshe balalarymdy ómirge ıkemdep shyǵarǵym keledi. Ásirese, qyzdarym kir jýǵanda, tamaq pisirgende qasymda kómektesip júredi. Sondaı-aq is tigý, qolóner sekildi túrli úıirmelerge qatysady. Balalar úshin munda barlyq jaǵdaı jasalǵan. Olar bes mezgil tamaǵyn ishedi. Oqý bitirip ketken túlekterim Qazaqstannyń ár qalasynda bilim alýda. Aıta ketsek, ótken jyly jalpy orta bilim alǵan Almas esimdi túlegim Almaty qalasynda oqyp júr. Qysqy demalysta kelip ketti. Oqý bitirip ketken túlekterim mundaǵy balalarǵa habarlasyp, konkýrstarǵa qatyssa, aǵalyq, ápkelik kómekterin berip jatady. Turmysqa shyqqan qyzdar bir-birine qonaqqa barady. Meni de meıram kúnderi «Anashym» dep habarlasyp, quttyqtap jatady. Balalarymnyń oqý úlgerimderi jaqsy, - deıdi Shynar Samatqyzy.
Sol sátte ana tárbıeshisimen birge tamaq daıyndap júrgen boıjetken qyzǵa kózimiz tústi. Aqjarqyn qyzdyń esimi Gúljanel eken. Ekinshi synyp oqyp júrgen kezinde anasy qaıtys bolǵan. Sodan osy mekemeni jaǵalaǵan.
- Ákeme bizdi ósirip baǵý qıynǵa soqty. Ana tárbıeshimiz bizge kir jýýdy, tamaq pisirýdi, kıim tigýdi, útikteýdi, banka jabýdy úıretti. Úlken ápkem Almaty qalasynda magıstratýrada oqyp júr. Al aǵam M. Ótemisov atyndaǵy Batys Qazaqstan memlekettik ýnıversıtetin qyzyl dıplommen bitirmekshi. Oqý bitirgen soń ápkem meni Almatyǵa alyp ketedi. Bolashaqta tilshi bolǵym keledi, - deıdi Gúljanel.
Kezdesý sońynda oblystyq maslıhattyń depýtaty Lána Tursynova atalmysh mekemeniń dırektory Saǵynysh Jambylqyzyna balalarǵa beriletin taǵamdardyń bekitilgen mázirge saı daıyndalýyn jiti qadaǵalaýdy tapsyrdy.
Gúlim AQAP,
Batys Qazaqstan oblysy
Pikir qaldyrý