Otbasy-qoǵamnyń basty baılyǵy. Memlekettiń irgetasy jáne adam balasynyń ósip-ónetin, qanat jaıatyn altyn uıasy. Sondyqtan qoǵamda otbasynyń alar orny erekshe. Óńirdegi otbasy mártebesin ósirip, olarǵa qoldaý kórsetý, halqymyzdyń dástúrli ónerin damytý maqsatynda Batys Qazaqstan oblysynyń mádenıet, arhıvter jáne qujattama basqarmasynyń qoldaýymen, oblystyq halyq shyǵarmashylyǵy ortalyǵynyń uıymdastyrýymen oblystyq qazaq drama teatrynda oblystyq «Óner shamshyraǵy» otbasylyq ansámblder baıqaýy ótti. Keshte tatýlyq pen birlikti bıik ustap, oblys aýdandarynyń namysyn arqalaı kelgen  10  otbasylyq ansámbl baqtaryn synady.

Eń aldymen  aýdanaralyq baıqaýdan top jaryp kelgen  otbasylar  berilgen erejege sáıkes «jandy» daýysta jáne «mınýs» fonogramsy men aspaptardyń súıemeldeýi arqyly 10 mınýttan konserttik baǵdarlamalaryn kórsetti.

Baıqaý barysynda kópshiliktiń kóńiline shattyq uıalatqan otbasy músheleri ózderin ár qyrlarynan tanytyp, qalyn qaýymdy tamsandyra tústi, ıaǵnı biri qazaqtyń qasıetti qara dombyrasy, ekinshisi estradalyq janr, baıan, al úshinshisi ónerin bımen órip,súısindirdi.

Óner dodasyna Qazaqstan Respýblıkasynyń Halyq aǵartý isiniń úzdigi, «Eren eńbegi úshin» medaliniń ıegeri, halyqaralyq, respýblıkalyq baıqaýlardyń laýreaty, halyqtyq Qabıevtar januıalyq ansambliniń jáne «Qyz Jibek» termeshiler ansambliniń jetekshisi, sazger, ánshi-termeshi Baıan Qabıeva jáne «Eren eńbegi úshin» medaliniń ıegeri, Qazaqstan kompozıtorlar odaǵynyń múshesi, Ǵ.Qurmanǵalıev atyndaǵy oblystyq fılarmonıanyń ánshi-kompozıtory Jaskeleń Ǵaısaǵalıev, sondaı-aq QR eńbek sińirgen qaıratkeri, qazaq drama teatrynyń aktrısasy Baqtygúl Jaqypova, halyqaralyq baıqaýlardyń laýreaty, Ǵ.Qurmanǵalıev atyndaǵy oblystyq fılarmonıasy «Nazerke» halyq bı ansambliniń jetekshisi Aqmaral Tasbolatova, Ǵ.Qurmanǵalıev atyndaǵy oblystyq fılarmonıasynyń  «Oral sazy» fólklorlyq ansambliniń jetekshisi Asqar Kenjeǵalıevter tórelik etti.

Qazynaly qazaq ónerin joǵaltpaı, ulttyq óner jelisin atadan-balaǵa jalǵastyrýshy otbasylyq  ansámblderdiń eń júırikteri anyqtalyp, júldeli oryndar men dıplom, alǵys hattarmen marapattaldy.

Baıqaý qorytyndysy boıynsha bas júlde jánibektik Kárimovterge,               İ oryndy  qaztalovtyq Hasanovtar,  İİ oryndy zelenovtyq aǵaıyndy Sısenovter, qaratóbelik Baıtemirovter ıelense, İİİ oryn terektilik Qabıevter, shyńǵyrlaýlyq Baıǵalıevtar, bórlilik Botashevtar otbasylyq ansamblne buıyrdy.

Gala konsert shymyldyǵyn "Mereıli otbasy - 2016"  oblystyq baıqaýynyń jeńimpazdary halyqtyq Bıǵalıevtar otbasylyq ansambli ashsa, keıin otbasylyq ansámblder baıqaýynyń jeńimpazdary konsertik baǵdarlamalarymen jalǵastyrdy. 

Gúlim AQAP,

Batys Qazaqstan oblysy