Almatyda Halyqaralyq TÚRKSOI uıymy jáne ál-Farabı atyndaǵy Qazaq Ulttyq ýnıversıteti, Ystanbul ýnıversıteti men A. Baıtursynuly atyndaǵy Til bilimi ınstıtýtynyń birlesip uıymdastyrýymen «Qazirgi zamanǵy túrkitaný» atty halyqaralyq ǵylymı-teorıalyq konferensıa ótti.

Túrki halyqtarynyń tereń tarıhy men ortaq mádenıeti, tili men ádebıetine qatysty máseleler qarastyrylǵan bul konferensıaǵa túrkitildes respýblıkalardyń Qazaqstandaǵy elshilikteri men konsýldyqtary, Qazaqstan halqy Assambleıasy janyndaǵy túrkitildes mádenı ortalyqtar ókilderi men túrkitaný salasyn zerttep júrgen beldi ǵalymdar men izdenýshiler qatysty.

Keleli jıynnyń ashylý saltanatynda Túrki akademıasy halyqaralyq uıymynyń (TWESCO) basshysy Darhan Qydyráliniń arnaıy quttyqtaý hatyn uıymnyń ǵylymı qyzmetkeri Janat Momynqulov oqyp berdi. 

Konferensıada qazirgi fılologıanyń ózekti máseleleri jáne aýdarma teorıasy; rýhanı mádenıet jáne fılosofıa men tarıhqa zamanaýı kózqaras; shet tilin oqytý ádistemesiniń ınovasıalyq tehnologıalary taqyryptaryna arnalǵan baıandamalar jasaldy. Sondaı-aq, Qazaqstan Prezıdenti N.Á. Nazarbaevtyń «Rýhanı jańǵyrý» baǵdarlamasynda kórsetilgen latyn álipbıiniń keıbir túrkitildes respýblıkalarda qoldanylý erekshelikteri, qazaq tilin latyn álipbıine kóshirýdegi ózekti máseleler de osy jıyn barysynda talqylandy.

Aıta ketý kerek, konferensıaǵa usynylǵan maqalalar men baıandamalar arnaıy ǵylymı jınaq retinde jaryq kóredi.