Almatyda QR Tuńǵysh Prezıdenti arhıvinde «Qalyptasqan memlekettiń strategıalyq serpilisi: «Qazaqstan - 2030-dan» «Qazaqstan-2050» - ge» atty taqyrypta dóńgelek ústel otyrysy ótti.
Jıyn Táýelsiz Qazaqstannyń alǵashqy baǵdarlamasy - «Qazaqstan -2030» strategıasynyń qabyldanǵanyna 20 jyl tolýyna oraı ótkizildi.
QR Tuńǵysh Prezıdenti arhıviniń bas dırektory Borıs Japarov Táýelsizdik qazaq halqynyń san ǵasyrlyq armanynyń oryndalýy ekendigin atap ótti.
«1990 jyldardyń birinshi jartysynda anyqtalǵan qazaqstandyq memlekettilikti qurýdyń strategıalyq mindeti myqty prezıdenttik bıligi bar egemendi memleket retinde damý edi. Bul mindetter elimizdiń Prezıdentiniń 1992 jylǵy «Qazaqstannyń egemendi memleket retinde qurylý jáne damý strategıasynda» oryn aldy. Qazaqstan Táýelsizdik jyldarynda qaryshty damyp, álemniń damyǵan 50 eliniń qatarynan oryn aldy, Qazaqstan-2030 strategıasyn merziminen buryn oryndap, Qazaqstan-2050 strategıalyq baǵdarlamasy men Ult Jospary «100 naqty qadam: zamanaýı memleket bári úshin» baǵdarlamasyn júzege asyrýǵa kiristi»,-dedi Borıs Japarov.
Sondaı-aq ol sózinde 26 jyl - tarıh úshin kóp ýaqyt emes ekendigin, alaıda birneshe jyldar da ǵasyrlardyń ornyn basatynyn, kóptegen urpaq taǵdyryn sheshetindigin aıtty.
«Táýelsizdigimizdiń dál osy 26 jylynda ekonomıkada, saıasat ben qoǵamdyq qurylysta zor ıgilikterge qol jetkizdik. Kóp etnıkalyq halqy bar elimizde beıbitshilik pen turaqtylyq tolyqtaı ornap, ulttyq qurylystyń qazaqstandyq modeli dúnıejúzine úlgi boldy. Kez-kelgen qazaqstandyq elimiz jetken jetistikterdiń kýási, óz Otanynyń patrıoty. Bul kezeń búkil álem moıyndaǵan Qazaqstannyń memleket retinde qalyptasýymen tarıhta qalady», - dedi Borıs Japarov.
Jıyn barysynda QR Prezıdenti janyndaǵy Qazaqstandyq strategıalyq zertteýler ınstıtýtynyń Almaty qalasyndaǵy bólimshesiniń basshysy, saıası ǵylymdarynyń kandıdaty Madına Nurǵalıeva, QR Prezıdentiniń Arhıvi dırektorynyń orynbasary, tarıh ǵylymdarynyń doktory Qaırat Shákárimuly Álimǵazınov baıandama oqydy.
Sonymen qatar «Qazaqstan - 2030-dan» «Qazaqstan-2050- ge» taqyrybynda mańyzdy tarıhı qujattardyń kórmesi ótti.
Qazaqstan Respýblıkasynyń Táýelsizdik kúnine oraı belsendi qyzmet kórsetken Arhıv qyzmetkerleri Alǵys hattarmen marapattaldy.
