Almaly aýdany ákiminiń apparaty Uly Otan soǵysynyń ardageri Áben Tursynbaıulyn 100 jasqa tolý mereıtoıymen quttyqtady. Almaly aýdany ákiminiń orynbasary Aınur Bekjanova bul erekshe merekede ardagerdi quttyqtaı otyryp, oǵan myqty densaýlyq pen uzaq ómir tiledi!
Mundaı oqıǵa ár adamnyń ómirindegi eń keremet jáıt dep aıtýǵa bolady. Óıtkeni, 100 jyl ómir súrý bul – 1 ǵasyrdyń tiri tarıhy. Áben ata qonaqtardy úıde jyly qarsy aldy jáne kezdesý barysynda ótken ómirin eske alyp, qyzyqty jaıttar týraly qonaqtarǵa aıtyp berdi.
Berdenov Áben Tursynbaıuly 1917 jyly 7 qarashada Qaraǵandy oblysy, Ulytaý aýylynda dúnıege kelgen. Ol soǵystyń alǵashqy kúnderin sol baıaǵydaı esinde saqtaǵan. Maıdanǵa 1941 jyldyń 15 tamyzynda 24 jasynda Qazaq pedagogıkalyq ınstıtýtynyń sońǵy kýrsynda oqyp júrip, sessıasyn endi japqan kezde alynady. 1938 jyly ol Almatydaǵy QazPI hımıa-bıologıa fakýltetiniń birinshi kýrsyna túsken eken.
1941 jylǵy jeltoqsan aıynda birinshi ret jaralanyp, gospıtalǵa jóneltiledi. Odan soń Batys shebinde 449-shy atqyshtar polkinde bolady. 1942 jyly Rjev mańynda ekinshi ret jaralanady. Oq júregin janaı ótken eken, komandır ony qaıtys boldy dep oılap, úıine «qara qaǵaz» jóneltedi, biraq Áben Tursynbaıuly aman qalady. Uly Otan soǵysynyń eń qandy bóligi – Stalıngrad túbindegi shaıqasqa qatysqan. 1941 jyly Áben ata óziniń Máskeýdi qorǵaǵany úshin 1-estelik ordenin, Otan aldyndaǵy sińirgen erligi úshin Qyzyl Juldyz ordenin jáne 1-dárejeli Uly Otan soǵysy ordenin ıelenedi.
Áben Tursynbaıulynyń tósbelgileri men marapattary óte kóp. 1945 jylǵy 15 qarashada ol áskerden qaıtarylady, biraq Otanyna tek 1,5 aı ótkende ǵana oralady. Soǵys aıaqtalǵan soń ınstıtýtty aıaqtap, eńbek jolyn Áben Tursynbaıuly qatardaǵy oqytýshy bolyp bastap, mektepte oqý isiniń meńgerýshisi, dırektor qyzmetin atqardy. 1977 jyldan bastap eńbegi sińgen zeınetker. Qarıa jeti balany tárbıelep ósirip, búginde nemere men shóbere súıip otyr.
