"ArselorMıttal Temirtaý" kompanıasynyń bas dırektory Paramjıt Kalon "shahta jumysyn toqtatyp, jer astynda ruqsatsyz otyrý - máseleni sheshpeıtinin" aıtyp, ereýildep jatqan kenshilerdi shahtadan shyǵýǵa shaqyrdy dep Azattyqqa súıene otyryp jazady Qamshy.kz aqparat agenttigi.
Kompanıa men Qaraǵandy oblystyq ákimdiginiń habarlaýynsha, 13 jeltoqsanda Qazaqstan premer-mınıstri Baqytjan Saǵyntaev pen Lakshmı Mıttal telefonmen sóılesken. "Jergilikti bılik organdarynyń qatysýymen birlese jumys istep, dıalogty jalǵastyrý kerek. Biraq ol dıalog sizder [shahtadan - red] jer betine shyqqan kezde ǵana bolady.
Osynsha ýaqyt jer astynda otyrý óte qaýipti jáne densaýlyqtaryńyzǵa keri áser etedi. Sizderdi birlesip, taıaý ýaqytta ońtaıly sheshim tabýǵa shaqyramyn" delingen "ArselorMıttal Temirtaýdyń" bas dırektory Paramjıt Kalonnyń kenshilerge úndeýinde. Qaraǵandy oblysy ákimdiginiń málimetinshe, 11 jeltoqsanda túngi aýysymnan soń shahtadan shyǵýǵa bas tartqan 600-den astam kenshi áli jer astynda otyr.
Ákimdiktiń habarlaýyna qaraǵanda, bastamashyl top ókilderimen keshe ótken kezdesýde "ArselorMıttal Temirtaý" basshysy kompanıa kenshiler ókilderimen shahtalardaǵy barlyq kenshiler taıaý ýaqytta jer betine shyqqan jaǵdaıda ǵana kelissóz bastaýǵa daıar ekenin aıtty. "Bul talap oryndalǵan jaǵdaıda jumys berýshe qandaı da bir jazalaýdyń bolmaıtynyna kepildik beredi" dep habarlady oblys ákiminiń baspasóz qyzmeti. Keıbir aqparattar boıynsha, bastamashyl top osy kezdesýden keıin jer astyndaǵy kenshilermen sóılesý úshin shahtalarǵa ketken. Kenshilerdiń kelissóz júrgizý úshin jer betine shyǵýǵa keliskenin, ıa kelispegenin bilý ázirge múmkin bolmaı tur. Júzdegen kenshi tórt táýlikten astam ýaqyt jer astynda otyr.
Kenshilerdiń málimetinshe, "ArselorMıttal Temirtaýdyń" tórt shahtasynda 700-den astam adam ereýildep tur. Jer betine shyǵýdan bas tartqan kenshiler birneshe talap qoıyp otyr. Olardyń eń bastylary - jalaqyny 100 paıyzǵa kóbeıtý, zeınetkerlikke 50 jastan shyǵarý, eńbekke jaramsyzdyq paraǵy boıynsha tólemdi 100 paıyzǵa deıin tolyq tóleý, 2017 jyldyń "13-aı jalaqysyn" tóleý.
"ArselorMıttal Temirtaý" - Qaraǵandy metalýrgıalyq kombınaty Qaraǵandy kómir baseıniniń shahtalaryna ıe bolat quıý jáne taý-ken qyzmetimen aınalysatyn kompanıa. Ol Úndistannan shyqqan brıtandyq bıznesmen Lakshmı Mıttalǵa tıesili transulttyq "ArselorMıttal" metalýrgıalyq toby quramyna kiredi. "ArselorMıttal Temirtaý" quramynda qurysh, kómir, bolat quıý jáne qubyr departamentteri bar.
