Almatyda Táýelsizdik tańy monýmentinde gúl shoqtaryn qoıý rásimi ótip, dúnıeden ótken jeltoqsanshylardyń rýhyna Quran baǵyshtaldy, dep habarlaıdy Qamshy.kz aqparat agenttigi QazAqparatqa silteme jasaı otyryp. 

Búgin Almatyda Jeltoqsan kóshesinde ornatylǵan «Táýelsizdik tańy» monýmentine gúl shoqtaryn qoıý rásimi ótti. Alǵash bolyp, gúl shoqtaryn Almaty qalasy ákimdiginiń atynan Baýyrjan Baıbek bastaǵan memlekettik qyzmetshiler qoıdy. Odan keıin 1986 jyly jeltoqsan qozǵalysyna qatysqandar jáne Qazaqstan Jastar uıymdarynyń atynan bir top jastar gúl shoqtaryn qoıdy. Osydan keıin, Qazaqstan Musylmandar Dinı basqarmasynyń ımamy 1986 jyly Jeltoqsan qozǵalysy kezinde dúnıeden ozǵan bozdaqtardyń rýhyna arnap Quran baǵyshtady. Sharadan keıin Almaty qalasyndaǵy «Juldyz» meıramhanasynda as berildi.

«Jeltoqsan bir jaǵynan qasiretpen eske alsaq, bir jaǵynan qýanyshpen qarsy alamyz. Elimiz egemendigin alǵanyna qýanamyz. 31 jyl buryn men osy jerde bolǵanmyn. Jigittermen men qyzdarymyz ómirden ótip ketti. Men Dáýletbaı batyrdyń urpaǵymyn, ákemniń ákesi repressıaǵa ushyraǵan. Bul bizdiń ata-babalarymyz ańsaǵan kún. Elimizdi soǵystan saqtasyn. Qazaq eli qazir tynysh, sol úshin qazaq baqytty. Qazaq jastary, sporttan, mádenıetten, qaı saladan bolsyn Kók baıraǵymyzdy jelbiretip jatyr», — dedi jeltoqsanshy Serik Muhamedalın.