«Qazposhta» AQ «Estelik jáne mereıtoılyq datalar» serıasy boıynsha «Qazaq anımasıasyna 50 jyl» taqyrybynda poshtalyq marka shyǵardy. Poshta aınalymyna engizilip otyrǵan bul markada qazaq múltıplıkasıasynyń atasy atanǵan rejıser-anımator Ámen Qaıdrov túsirgen «Qarlyǵashtyń quıryǵy nege aıyr?» múltfılminiń kadrlary beınelengen dep habarlaıdy Qamshy.kz aqparat agenttigi. 

- 50 jyl buryn VGIK túlegi (Búkilodaqtyq Memlekettik kınematografıa ınstıtýty), jas sýretshi Ámen Qaıdarov kórermen nazaryna óziniń dıplomdyq jumysy – «Qarlyǵashtyń quıryǵy nege aıyr» múltfılmin usyndy. Sol kezderi ol qazaq kıno óneriniń jańa bir salasy – qazaq anımasıasynyń negizin qalaǵanyn bilmegen de shyǵar. Alaıda, sol kezderden beri bul janr kóptegen belesterdi baǵyndyryp, qıyndyqtardy da bastan keshirdi. Sondyqtan da, qazaq kınematografıasynyń órkendeýine úlken úles qosqan has sheberlerdiń qurmetine osyndaı is-sharalar kóptep ótkizilýi tıis,- dedi «Qazaqfılm» AQ prezıdenti Baqyt Qaıyrbekov.

Bir paraǵynda 6 markasy bar estelik poshta marka tórt boıaýly ofsetti baspada jasalǵan, perforasıasy jotaly. Jalpy markanyń ólshemi 140h80 mm, nomınaly – 100 teńge. Markalardyń taralymy – 6000 dana. Atalǵan markany poshtanyń barlyq bólimderinen, sonymen qatar «Qazposhta» AQ saıtynan satyp alýǵa bolady.

Sondaı-aq, Qazaqstan Respýblıkasynyń Ulttyq Banki nomınaly 500 teńgelik «Qarlyǵashtyń quıryǵy nege aıyr» eskertkish kúmis monetasyn aınalysqa shyǵardy.

Kınokadr retinde jasalǵan monetalar 925 synamdy kúmisten jasalǵan. Nomınaldyń sol jáne oń jaǵynda ulttyq oıý-órnek elementteri ornalasqan. Monetanyń joǵarǵy bóliginde memlekettik tilde «Qazaqstan Respýblıkasy» jáne orys tilinde «Respýblıka Kazahstan» degen jazba bar. Tómengi bóliginde moneta daıyndalǵan metaldy, onyń synamyn jáne massasyn bildiretin «Ag 925 24 g.» degen jazba jáne Qazaqstan teńge saraıynyń taýar belgisi beınelengen. Sol jaǵynda monetanyń jıeginde anımasıalyq fılmniń ekranǵa shyǵý jyly – «1967», oń jaǵynda moneta soǵylǵan jyl – «2017» ornalastyrylǵan.

Monetanyń ekinshi jaǵynda anımasıalyq fılmniń túrli tústi kadry ornalasqan. Sol bóliginde monetanyń jıeginde memlekettik tilde «Qarlyǵashtyń quıryǵy nege aıyr» jáne orys tilinde «Pochemý ý lastochkı hvost rojkamı» degen jazba ornalasqan. Túsi túrli tústi basý tehnologıasy arqyly oryndalǵan. Monetanyń taralymy – 500 dana. Monetalar 2017 jylǵy 29 jeltoqsannan bastap Ulttyq Bankiniń barlyq fılıaldarynda satylymǵa túsken.

Nomınaly 500 teńgelik eskertkish monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý úshin jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady. Monetalardy «Qazaqstan Respýblıkasy Ulttyq Bankiniń Qazaqstan teńge saraıy» sharýashylyq júrgizý quqyǵyndaǵy respýblıkalyq memlekettik kásiporny daıyndaǵan.

Monetalardy Qazaqstan Respýblıkasy Ulttyq Bankiniń barlyq fılıaldarynda, sondaı-aq «Monetalardyń Internet-dúkeni» www.nationalbank.kz  Qazaqstan Respýblıkasy Ulttyq Banki saıtynyń ınternet-dúkeni arqyly satyp alýǵa bolady.

Esterińizge sala ketsek, Ámen Qaıdarovtyń múltfılmi «Qarlyǵashtyń quıryǵy nege aıyr?» ertegi jelisi boıynsha jasalǵan. Bul múltfılm eń alǵash 1967 jyly Máskeýde kórsetildi.  Baldyrǵan ul-qyzdarymyzdy adaldyq pen meıirimdilikke tárbıelegen kórkem shyǵarma álemniń 48 elderinde kórsetilip, kóptegen halyqaralyq festıválderde júldeli oryndardan kóringen.

Múltfılm Lenıngrad qalasynda ótken İİİ Búkilodaqtyq kınofestıvaldiń júldesimen, al 1975 jyly Nú-Iorkte ótken Halyqaralyq múltfılmder kınofestıvalinde qola Praksınoskop júldesimen marapattalǵan. Daryndy sýretker Ámen Qaıdarovtyń qolynan shyqqan «Aqsaq qulan», «Quıyrshyq», «Qurylysshy Qojanasyr», «Kún sáýleli qoıan», «Qyryq ótirik» syndy basqa da týyndylary qazaq anımasıasynyń tarıhynda altyn áriptermen jazylǵan.

2011 jyly qyrkúıek aıynda ótken VII Halyqaralyq «Eýrazıa» kınofestıvali sheńberinde «Qazaqfılm» kınostýdıasynyń terıtorıasynda ornalasqan Juldyzdar Aleıasynda sýretshi, kınorejısser, Qazaq KSR eńbek sińirgen qaıratkeri, Qazaq KSR Memlekettik syılyǵynyń laýreaty, «Tarlan-2002» Táýelsiz júldesiniń ıegeri, KSRO kınematografıster odaǵynyń múshesi, sýretshiler odaǵynyń múshesi, profesor Ámen Qaıdarovtyń qurmetine estelik taqta ornatylǵan.

2013 jylydyń 18 qyrkúıeginde IX Halyqaralyq «Eýrazıa» kınofestıvali aıasynda Sh.Aımanov atynday «Qazaqfılm» AQ shyǵarǵan Ásıa Baıǵojınanyń «Ámen Qaıdarov. Ertegi hıkaıalary» atty derekti fılm jaryq kórdi. Sol jyly jeltoqsan aıynda Ámen Qaıdarovqa «Qazaq anımasıasynyń damýyna qosqan úlesi jáne jetken jetistikteri úshin» «Altyn adam» júldesi tabystaldy. Talantty rejıser 2015 jyly 92 jasynda dúnıeden ótti.