Búgin «Ksell» AQ men «Ulttyq aýdarma búrosy» qoǵamdyq qorynyń (buryǵyn – WikiBilim) birlesken «Qazaqstannyń ashyq ýnıversıteti» jobasy tanystyryldy, dep habarlaıdy Qamshy.kz aqparat agenttigi. Jobanyń maqsaty – Qazaqstanda memlekettik tildegi ashyq onlaın bilim berýdi damytý.

Oǵan Q.Sátbaev atyndaǵy QazUTZÝ, QBTÝ, AlmaU, SDU, Matematıka jáne matematıkalyq modeldeý ınstıtýty sıaqty jetekshi joǵarǵy oqý oryndary seriktes boldy.

Búginde «Qazaqstannyń ashyq ýnıversıteti» - OpenU.kz bilim berý platformasynyń dáristerin 1000-nan astam adam tyńdaǵan. Jobany «Ulttyq aýdarma búrosy» QK men «Ksell» AQ byltyr qolǵa alǵan edi. «Qazaqstannyń ashyq ýnıversıteti» portalynda JOO oqytýshylarynyń onlaın-dáristeri kez kelgen adamǵa qoljetimdi.

2018 jyldyń 10 qańtarynda onlaın-platformaǵa tirkelgen adamdardyń sany 1013-ke jetken. «Bul – óte jaqsy kórsetkish», - deıdi «Ulttyq aýdarma búrosy» QK atqarýshy dırektory Raýan Kenjehanuly. Onyń aıtýynsha, joba qazaqstandyqtardyń ǵylymı-tehnıkalyq salalar men naryqqa qajet ózge de mamandyqtar boıynsha tegin bilim alýyna jaǵdaı jasaıdy.

«Bizdiń «kez kelgen adamǵa ashyq sapaly bilim» degen mısıamyzdy OpenU dál aıqyndap berdi. Ashyq ýnıversıtet platformasyn jasaý qara bastyń qamy emes, ol – bilim sapasy men qoljetimdigin qamtamasyz etetin qural, kún saıyn jaqsara túsetin, ashyq bola túsetin qural», - degen Raýan Kenjehanuly jobany qoldaǵan «Ksell» kompanıasyna alǵysyn bildirdi.

Jobanyń bas seriktesi – «Ksell» kompanıasy. Q.Sátbaev atyndaǵy QazUTZÝ, QBTÝ, AlmaU, SDU, Matematıka jáne matematıkalyq modeldeý ınstıtýtynda qyzmet etetin jetekshi mamandar dáristerge arnalǵan materıaldardy daıyndaýǵa úles qosqan. Olardyń qatarynda akademık Asqar Jumadildaev, Arman Súleımenov, Ásel Aryn, Ardaq Shalqarbaıuly, Jasdáýren Dúısebekov syndy mamandar dáriske qatysýshylar úshin arnaıy materıaldar daıyndady.

«Ksell» AQ komýnıkasıalar bóliminiń jetekshisi Natalá Eskova qazaqstandyqtardyń ashyq digital-platformalar arqyly bilim alýǵa daıyn ekenin aıtyp, «Ksell» kompanıasynyń jobany áli de qoldaı beretinin jetkizdi.

Qazir portaldan mynadaı kýrstardy tańdaýǵa bolady: «Aqparatty taratý júıesi», «Bıznes-josparlaý», «Java tilindegi kompúter ǵylymdaryna kirispe», «Matrısalar men anyqtaýyshtar», «Memlekettik-jekeshelik áriptestik», «Robototehnıka», «Fýre taldaýy», «Python tilinde baǵdarlamalaý negizderi», «Scratch baǵdarlamalaý tilimen anımasıa jáne oıyn qurý», «Web-baǵdarlamalaý negizderi».

Onlaın-dárister nesimen tıimdi?

«Ulttyq aýdarma búrosy» QK atqarýshy dırektory Raýan Kenjehanulynyń aıtýynsha, stýdentter onlaın-dáristerdi tegin ári úıinde otyryp-aq tyńdaı alady. Iaǵnı ýnıversıtetke barmaı-aq, aýdıtorıadaǵy dáristerge qatyspaı-aq ınternet arqyly bilim alýǵa múmkindik bar. Semestr aıaqtalǵanǵa deıin ýnıversıtet qabyrǵasynda boı kórsetpeı, emtıhandy da onlaın rejimde tapsyra alady.

Al «stýdentterim bilim alsyn» dep kúnde jumysqa baratyn muǵalimderdiń kúıi ne bolmaq? Kez kelgen stýdent, tipti kez kelgen adam ózi úshin tıimdi joldy tańdaýǵa umtylady. Tıimdisi – árıne, onlaın-dárister arqyly bilim alý. Ondaı jaǵdaıda óz nápaqasyn taýyp otyrǵan muǵalimderdiń qoǵamdaǵy róline nuqsan kelmeı me degen oı da mazalamaı qoımaıdy. Buǵan qatysty Kenjehanov bylaı dep jaýap berdi:  

«Bul jobany jasaýǵa qatysyp jatqan barlyq oqý orny úshin ózekti másele. Búginde bilim berý júıesindegi muǵalimniń róli ózgerip jatyr. Bilim burynǵydaı muǵalimniń tóńireginde júrmeıdi. Bizge unasyn, unamasyn – jaǵdaı ózgerdi. Sondyqtan ustazdyq kásipti tańdaǵan adamnyń jańa zamanǵa beıimdelýine týra keledi. Biraq muǵalimniń keregi joq deýden aýlaqpyz. Ustaz – shákirtke durys baǵyt berýshi. Kerisinshe, mańyzdylyǵy arta túsken sekildi.

Oqý oryndarynda kafedra qashan da kerek. Ýnıversıtet atynan onlaın-dáris alýshy stýdenttiń jetekshisi bolady, ol stýdentke tapsyrmalar beredi jáne oryndalý barysyn úzdiksiz qadaǵalap otyrady. Sol sebepti muǵalimder mindetti túrde qajet. Múmkin kafedra muǵalimderiniń sany azaıar. Ol jaǵyna biz jaýap bere almaımyz, oǵan oqý oryndary jaýapty. Alaıda biz kelisken joǵary oqý oryndary bul jobany qoldap, qyzyǵýshylyq tanytyp otyr».

Aıta keteıik, bul joba «Rýhanı jańǵyrý» baǵdarlamasy aıasynda qolǵa alyndy.