(Qazaq handyǵy - 550 jyl shyǵarmashylyq báıgesine )

  Aı astynda Ǵun babam Almas qylysh oınatqan. Arlan batyr Attıla Aldynda jaýyn jaıratqan. Altyn qazyq qaqtyryp Arǵymaǵyn baılatqan. Kúlimdese kún týyp, Kúrsingende Aı batqan. Orhon boıyn jaz jaılap Otyz kún oıyn oınatqan. Qyrymnyń qyryn qystaý ǵyp Qyryq kún toıyn toılatqan. Juldyzdaı shyraq jandyryp Juldyzdyń astyn jaınatqan.   Samal jelge erkelep Sary dalada Saq babam. Seldiretip dushpandy Seń sekildi qaptaǵan. Topty jaýy kez bolsa Tarpań syndy taptaǵan. Kúmispenen kúptelgen Altynmenen aptalǵan.   Torǵyn beldeTonykók Toptastyrdy ultymdy. Bilge haǵan biregeı Biriktirdi jurtymdy. Kúrkiretken kún astyn Kúltegindeı ul týdy.   Altyn orda Ulysy En jaılady Edilde. Batys shebi Qyrymda Shyǵys sheti Emilde. Ulys bolyp uıysty Uly dala belinde. Tulpar syndy tulǵaly ult Tektilik bar teginde!   Kereı menen Jánibek: Er paryz uly is dep. Aq ordany kóterdi, Qazaq atty Ulys dep. Shańyraǵyn altyndap, Keregesin kúmistep...   Oń jaǵyna ordanyń Otyz rý qondyrdy. Sol jaǵyna ordanyń Sansyz aýyl qondyrdy. Shurqyratyp Shý boıyn Shubyrǵan malǵa toltyrdy. Egeýli naıza saby dep Emennen syryq jondyrdy. Edil men Ertis arasyn Erý jortar jol qyldy.   Alash ata balasy Tý túbine jıyldy. Qazaq degen uly ataý Handyǵyna buıyrdy. Shýǵa qaraı jan-jaqtan Shubyryp kósh quıyldy. Shalqaıǵanǵa shalqaıdy, Eńkeıgenge ıildi. Berekege baılandy, Tatýlyqqa túıildi.   Kereı menen Jánibek: Ulys máńgi bolsyn dep, Tuǵyrǵa tikti týymdy. Jelkildegen baıraǵym Jańbyrmenen jýyldy, Kún nurymen jylyndy. Qalaýymen Allanyń Qazaq eli quryldy.   Qos han qurǵan Ulysym Uly kúnge umtyldy. Sol jaǵynan Aı týdy, Oń jaǵynan kún týdy. Bekzat uly bestideı Besiginde bulqyndy. Seń sekildi bógettiń Seldirep sheti jyrtyldy. Júzikteı kúnge shaǵylǵan Júzine jurttyń nur tundy.   Jalań qylysh asynǵan Jasaqty erte saılady. Bes qarýy belinde, Beldeýge tulpar baılady Aıshylyq jerge estildi Aıbaty men aıbary.   Kúltóbeniń basynda Kúnde bıler keńesti. Yntymaqshyl Ulystyń Yrys, baǵy teń ósti. Asqaq Alash úlynyń Aıdarynan jel esti. Aımańdaıly jas qulyn Arǵymaqqa teńesti.   Jazırly jeriniń Jabaǵysy qulandaı. Jas qozysy bulandaı. Suńqar qusy qyrandaı. Jas shybyǵy shynardaı. Qyzy bitken qyrmyzy Uly bitken ulandaı. Qarashasy hanǵa teń. Qoıy qońyr ańǵa teń. Qońyr keshi tańǵa teń. İshse qymyz, balǵa teń. Jese jaıa, jalǵa teń.   Kereı menen Jánibek Kerege tasty shyń boldy. Judyryqtaı jumylyp Juldyzdan kóp myń boldy. Kún batqanda Aı boldy, Aı batqanda kún boldy. Kerisip ketken dushpany Kúlin tasyp, kúń boldy.   Qos qyrany jerimniń Kereı menen Jánibek! Qos bulaǵy belimniń Kereı menen Jánibek! Qos shyraǵy tórimniń Kereı menen Jánibek! Qos pyraǵy belgimniń Kereı menen Jánibek!   Kereı menen Jánibek: Keleli keńes qurǵanda Kósheli oılap kósilgen. Sheshendigi tógilip Sheber sóılep sheshilgen. Jigitte sultan degizip Jibekteı bir esilgen. Kemeńgerim, kemelim Kete me, qazaq esinen?   Asyl zatty Kereı han Asyp týǵan arystan. Jeteli han Jánibek Jete týǵan danyshpan. Qos sultannyń aqyly Bir arnada toǵysqan. Bolashaǵyn boljaǵan Alty myń jyl alystan. Birine biri tirek-ti Jaýmen qatar alysqan. Betegeli belderde Birge jylqy baǵysqan. Birge kóship, bir qonyp Qazyǵyn qatar qaǵysqan. Erlikpenen eldikte Ortaq oıda tabysqan. Turqy bólek qos tulpar Tuıaǵynan shań ushqan.   Kereı menen Jánibek! Keńdigińdi jyrlaıyn. Uıystyrǵan Ulysty Eldigińdi jyrlaıyn. Ulaǵatty ultyma Teńdigińdi jyrlaıyn. Ózgege tizgin bermegen Órligińdi jyrlaıyn. Erý jortyp qol bastar Erligińdi jyrlaıyn.   Tolaǵaı talaı er ótken Tor kóz saýyt jamylyp. Juldyzǵa qarap jol taýyp Jortty qansha sabylyp?. Qulymyn dep Allanyń Qudiretine baǵynyp. Jalaýly naıza qolynda Jalań qylysh taǵynyp. Joryqtan esen oralsa Jolyqqan jurty saǵynyp.   Qasqa joldy Qasym han Qasarysqan qas jaýǵa Qarǵa adym jer bermeı, Eńsegeı boıly Esim han Eregesken essizge Eli súıem bel bermeı, Qanjardaı ótkir Haqnazar Qaptap kelgen dushpanǵa Jaǵalasqan jeń bermeı, Tarlan syndy Táýke han Topty kelgen tobyrdy Toz-toz qylǵan teńgermeı. ...Erlerdiń isi bitken be?. Eregesken eserdi Er ústine óńgermeı.   Abylaıdyń kezinde: Qarys súıem jer úshin! Qan men tókken ter úshin! Qapy ketken er úshin! Beder beder bel úshin! Qaıqy qylysh sýyryp Qalmaqpenen qyrqysty. Shúrippeli myltyq asynyp Shúrshitpenen julqysty. Jan beristi, jan aldy Jaǵa men jyrtysty.   Keshegi ótken Kenekem Aq semseri qolynda. Sarjan oǵyn saılaǵan Sardarlary sońynda. Er ústinde kún keshken Erkindiktiń jolynda: Aı týǵansha aıqasqan Kún batqansha kúresken. Naızasy aıǵa shaǵylǵan Namysty erler ilesken. Tasqyn sýdaı tasyǵan Seń sekildi siresken. Qabylandaı qarǵysa Qalyń jaýdyń úni óshken.   Azat elim qazaǵym Berekemen bel asqan. Uly da kishi ulttarǵa Qos qushaǵyn keń ashqan. Tórim meniń baıtaq jer! Tóbem meniń kók aspan!   Kóktiń júzin torlaǵan Kóbesin bulttyń Aı tilip... Bes júz elý beleste Alashtyń asyl jurtyna Alty aı saýyn aıtylyp. Oshaǵymda shoq tutap Ottaı jandy qaıta úmit...   Jetkenime qanaǵat! Ótkenime salaýat! Eńsesi erdiń túspesin, Elim bolsyn salamat! Keleshegim keremet, Bolashaǵym ǵalamat! Azattyǵym atadan Alashqa qalǵan amanat!   Aı symbatty Astana Tańda kúnmen talasqan. Beıbit bizdiń baıtaq el Berekesi jarasqan. Alty qurlyq arasy Alashpenen sanasqan. Baıandy bolsyn baqytyń Bar Ulystan baǵy asqan!. AQTAI Áskerhan – aqyn, dramatýrg. Birneshe halyqaralyq jáne respýblıkalyq jyr saıystarynyń júldegeri