Sózi aspanda İsi jerde, Qaýyshpady-aý, Eshqashan. Baı, myrzanyń ulyndaı, Kedeı qyzǵa Sóz salǵan.   Sózi aspanda İsi qaıda? Jer sıpattyń, Urylardaı tis qaqqan.   Jemtik kórse – Qarǵalar Darpyldatyp Qanattaryn jaıady. «Sıqyrlanǵan» Adamdar Ańdyp basyp aıaǵyn...   Uıqy sergek, Oı qýań. Segizinshi múshelinde Qart adam. Dúnıeniń qyzyǵy Ol úshin – Jármeńkeniń bazaryndaı tarqaǵan...   Óleń! Óleń! Óleń! – dep, Appaq qardaı basy anaý. Óeńge ol aınalyp Ketken joq pa!? Tamsanady aınalaǵa tań qalyp. Bir nársege jetpegendeı – Ańsaǵan.   Óleń degen Ol úshin Úırenisken «jaý» emes pe – Burynnan. Óz-ózine kúbirlegen shalyna Báıbishesi oılady: «Múmkin muny jyn urǵan»...  

Kúbiri men sybyry Anyq sózge aınaldy. Onyń «jynyn» biledi Tek bir Qudaı Eshkim ýáj Aıta alsyn ba baılamdy.   Óleń! Óleń! Óleń! Baqsyń ba? Álde, Sorsyń ba? Basyma kep Qonypsyń ǵoı Qorsynbaı...   Qaıran jastyq Et-teriniń Arasyndaǵy jelik pe eń!?... Kelispeske kelistik Bıshigine baǵynyp, Bıligimen júrgendeı-aq Jer ústi...   «Bıligimen» Júrgendeı-aq Jer ústi. Óleń be? – dep, Dal urdyq. Kóz jetkisiz Kók munar Kóz jetkisiz keńistik.  

Eshkimdi de Alymsynbaı ot keýde. Kóktem! Kóktem! Shúlen nuryn tókkende...   Shaǵala – shabyt Sharq uryp, Jyryń da aspan. Jyryńmenen juldyzdar – Jymyńdasqan.   Qas qaǵym sát, Kóktem be balbyraǵan! Qas qaǵym sát Qustardyń qanatynda – Qalqyǵan án...   Tuıaq qaqpas Sekildenip ótkelder. Ot keýdeniń – Jalynysh-aı! Sıaqtanyp Jer jahanda Bizden basqa Joq pende...   Uıań qyzdyń júzindeı Úlbiregen kóktemder Náziktik pen páktikti Senen aldy-aý ot keýde... Bár-bárin de, Bár-bárin de, Berdińder Kók saǵym kóshken kóktemder, Seniń púlis shymyldyǵyń Meniń kúmis kúlkimdi... Jasyrdy. Jasyrdy ǵoı Kókpeńbek!!!   O, kóktemder! Kók belder! Senderge Esh ókpem joq.  

Ádira qalǵandaı Baılyq, Mánsap, Mártebe. Sezildi onda Aldamshydaı – Álde ne...   Talaılardyń Baq juldyzy Janyp, Sónip, Joǵaldy. Bes músheli Qalammenen kúzettim, Kúzettim dúnıe – qoǵamdy.  

Kóńil – dúrbi Kórip bárin ashyndym. Qysaǵasy qyshytqan Buzaýlarsha Qasyndym...   O, dáýren-aı! Bizder úshin Qolyndaǵy ómir desin. Dónen ıtteı Kergitken. Qarańǵynyń Aınalaryn jaryqqa, Júregimniń kózimenen Men kútkem...   Sol kúnderde Keldi-aý, áıteý Men kútken!! Jyldarymnyń qamqasyn Ádiptedim ár jerden Áshekeılep zer jippen.  

Kóńilde tur Barlyǵy da jarasyp. Keltiresiń ómirge Ár tań saıyn «balasyn».   Bolmasa «eneń» Sarkidir báıbishe. Shyrqyraıdy «sábıiń» İshi keýip, Jaýyryny jabysyp, Mine osynda Bar «qyzyq».  

Ómir degen ordanyń Myqshıyp bel Otyn-sýyn Kóteresiń arqalap. Óleń – sábı, Óleń! Óleń! Baby kúshti qart adam...   Otashynyń qolyndaı Qolyń seniń Ornyna dál Túsire alsa synyqty. Júredi jurt alǵystap. Teris salsań, Kóz ashpaısyń Qarǵystan.   Bári ótedi qolyńnan Kúırep jatqan «qańqalar». Ómirińe bir qarap Bálkim ishteı tamsanar. Altyn menen kúmisteı Qoly jetken er quıyp. Al, bireýler Kirpish soǵyp, Tam salar. Jolyqsyn-aý, Qaıda kúnde «Qansonar».   Ónerińe qolyn soqsa – Alty alash. Shemen bolǵan Sheriń qalaı tarqamas.  

Jurttan buryn, Kóp nárseni túsinip... Ýaqyttyń ýyn iship, Balyn jurtqa usynyp.   Júresiń sen Júrgen maldaı jersinbeı, Qaıda qashyp barasyń, Tıgennen soń enshińe!   Biz, Ine, Jip, Saýsaqtaryn tozdyrǵan Etikshiniń kúıin keship, Turady ylǵı ot-jalyn Jeldeı bolyp mıyńda esip...   Jerine jetpeı mejeli, Jel qaıyǵyń toqtamas. Qaraý baıdyń Sekildisiń qoıshysy «Qoı» joǵalmaı, Sen ólmeı, Ol da seni joqtamas. Sen jegildiń – Arbasyna. Arba synbaı, Ógiz ólmeı, Tursa boldy Joq talas. Biri synyp, Biri ólmeı Seni eshkim de Joqtamas.   Aqyn, aqyn bolar ma edi, Qolpashtasa – Dúıim jurt!?... Júrek qanym jóńkilip Muhıttarǵa quıyldy...  

Omyrtqasyn opyryp, Jarylyp jalpy súıegi... Shyǵyp esten mıhynat, Umytshaqtyq aýrýyna shaldyqqan Analardaı Balalaryn shubyrtqan.   Buldaǵy bir qumarlyq, Óz basyna túspese Muńymyzdy Uǵar kim?!...   Joq izdegen pendedeı Jolǵa shyǵam, İzin kesip, Tabýǵa ony qumarmyne Men óleńmen Turǵyzdym-aý, Bultpen kórshi Munar shyń!!!  

Júnshe tútip júıkeńdi Júdetedi – Aınalańda daǵdarys. Kórsetkendeı Iir-qıyr, Kúdir-kúdir Joldy alys...   Kóńil kózben Kórip tursyń Sory shyqqan Soqpaǵy kóp Joldy alys. Jas sıyrdyń buzaýyn Jalmap jatyr jolbarys...   Bara jatyr Mama sıyr Jelinderi Jer syzyp. Qashyp júrgen daladan Ras bizdiń el qyzyq!!...   Taý-dalaǵa shashylyp, Jatpaı ma, áne, qoı syımaı, Aýasynyń daýasyn-aı aýyldyń!! Tar qalada – Quz jartasqa Uıa salǵan qustarsha, Otyrmaı ma «oıshyldar»...   Qaıbir saıtan Sańǵytty eken – Sanaǵa!?... Aýyl degen – Jer uıyqtan jırkenip, Qamalǵany-aı qalaǵa!!!   Jeti atadan jerge sińgen Tamyrlaryn keldi úzip... Tamyrsyzdar – Qalaı kóktep Jaıqalar. Osy bizdiń el qyzyq!!!  

Men kórgeli Bul aspan Ashyq Ári Tuńǵıyq. Shyn túsinip Shashbaýynan Kótersin-aý Kimdi-kim!!   Múlt jibermes Múdde seniń óz oıyńdy. Osy jolda Aıaıdy deısiń Kimdi – kim. Jer betiniń – Jyrtqyshyna aldyrmas, Al, biraqta Qanattylar aıaǵan ba, Bir-birin...   Solyqtaǵan dúnıe Bir-biriniń Talap, Tartyp, Jemtigin. Tolyqtaǵan dúnıe Bir-birimen, Bir-biriniń kemtigin.   Baýyrmaldyq Óti me eken aıýdyń?!... Tapqan áıteý, Kóp izdep... Sozyla tartsań shanańdy, Ala jazdaı jumystaǵy Muqyl múıiz ógizdeı.   Jeter sharýa, Kóktem, Jaz, Kúz, Qysty kún. Jumysyńa al, seniń Pesh qasynda – Otqa qyzǵan mysyqtaı Qaraıdy ómir syqsıyp...   Sapar shalǵaı Sabaý qamshy Salt attydaı Tartý kerek tótelep. Serýenińmen júrgenińde Bala-shaǵa kerýenińdi Ketedi eken jetelep...  

Men óleńniń Soǵyp aldym, Qabylan, Qasqyr, Túlkisin. Qaqpany qandy Men bolamyn Bolsa eger bir kisiń...   Keler bálkim Báz bireýdiń kúlkisi. (Ol shyrǵalap Túsirgen be ed qyr qusyn!?). Aq jaýynǵa jýynyp Boıyn sozǵan aspanǵa Óleń múmkin tik shynar. Talaı úıdiń – Taǵan tasyna tartylǵan, Óleń – shunyr jip shyǵar.   Óleń degen emes pe, Maıy jonnan siresken – Bizder uzaq kútken kúz. Keıbireýdiń oılary Jaıdaq sýdaı İship keter It pen qus.   Qansha jerden Aıbar sheksin Qaıdan qasqyr Bola alsyn-aý tóbetter... Keı aqynnyń óleńi Sý sekildi qoı ótken...  

Shyndyq dese ujdanym – Turdy ishimde shyjaqtap... Tizginimdi Baılady da jalyma. Tań asyrdy jyldarym Jaılaýdaǵy qur attaı...   Ómir meni jylatsa da, Men eshkimdi jylatpaı. Maza bermedi oılarym Tastan-tasqa Sekiretin laqtaı.   Shekshek ata – Tuqymynyń tuıaǵy-aı! Magnıtteı jabysqan!!... Qońyr oılar – Qoı sekildi momaqan. Tıgizbesteı júgen, quryq. Arǵymaq oı kisinep Aryndady alystan...   Toqal ógiz sekildi Zábiri joq nıetim. Sol úshin de Aınalam Maǵan basyn ıetin...   Poezıa uqsamaıtyn shyǵar Jylaý Joqtaýǵa. Uqsaıtyn bolar myltyqqa – Tańdaıyn oq salǵan.   Poezıa uqsaı qoımas, Aıǵaı Attan Daýystarǵa shyńǵyrǵan. Til qatar Sulýlardaı syńǵyrlap.   Ol sóıleıtin shyǵar Sábılerdeı byldyrlap. Kenelgen bolar Ishara Kúbir Sybyrǵa.   Kók teńizdiń jaǵasy: Taýdaı, Taýdaı, Kókke shapshyp Soǵylysqan tolqyndar – Tabyt berdi... Ólmedim. Shabyt syılap Sol jyldar...   Súıekke etiń ilingendeı Oıhoı, jyldar! Ol jyldar! Ony oılasam Bas lyqyldap Eki shekem solqyldar.   Jyrsyz ótken Aı, kúnderiń Shyǵyn, á!? Saparyńa jetý úshin dittegen Keıde ómirdiń Jyǵylasyń yǵyna.   Ómir! Ómir! Qyzyq penen qıyndyq, Áýel bastan sen de egiz. Sen sekildi Men de egiz... Kósemsımiz Kórmegendeı eshteńe, Jylqy minez pendeńiz...  

Alda kúnniń qamy úshin, Qumyrsqadaı eńbektenipe – Tynbaımyn. Juldyzshydaı otyramyn Qadaǵalap jyl jaıyn...   Almas qylysh Soǵar usta. Onyń sýyn Tabýdy aıt. Ákki jaýǵa Osal jerden, Shabýdy aıt!!!   Jurttan asqan Bolmasa – Aıla – amalyń. Poezıa aldyrsyn ba qamalyn!?...   Qazynasy qaınaǵan Bolsyn qaıdan taý bitken!? Tekti aıǵyrlar Shapqanynda bıege Úıirinen shetteı qashar sáýrikter...   Asyp, Tasyp, Býlanyp, Dáýrikkeniń Bola berse bári aqyn. Mynaý álem Qaǵyp alyp, (Qıdan jısyn qanatyn).   Hosh ısti gúlderden Kóńil hosh bop – Tapqanyńda rahat. Sulý jyrdan Boı sozbaı ma munara!   Laǵyl Merýert Marjan – Sózder - ádep-qut. Ýysyna túspegen soń «Aqyndar-aı!» Ózindaǵy, Ózgeni de Álek qyp...  

Arpalysqan ómirge Jarasar ma, Jaı ekpin!? İrimshik, qurt Qaıdan bolsyn qunarly, Jasalǵanda máıeksiz.   Poezıa asqaqtaıdy ajary – Serilik pen saldyqpen. Kórinbeı me aınasynan kóńildiń Syry ǵajap, Jyljyp jatqan táýlikter.   Tóselesiń babymen – Kempirdeı bop Shal kútken. Qalt jibermeı Ár qımylyn, Otyrasyń ańdyp sen.   Keıbireýler Saldyr-salaq Bolǵany úshin aıypty. Kúzetesiń ómirdi Kúzetkendeı máıitti.   Kim aıta alsyn, «Shyrqaý shyńnyń Basyna men shyqtym!», dep. Keıbir sátte Eteginen qoshtasady «Qolbasylar» Áskerimen tutqyn bop...   Táńir jazsa – Osy joldy tańdaısyń. Ár kún saıyn alań bop, Ár kún saıyn Joq izdegen jandaısyń...   Joq izdegen pendedeı Jolǵa shyǵam İzin kesip. (Tabýǵa ony qumarmyn) Men óleńnen turǵyzdym, Bultpen kórshi – munar shyń.