Bazardan áıelim sala qulash bolmasa da, meniń bilegimdeı jylqynyń qazysyn ákelgen. Tábetimiz tárelke izdep ketti. Et asylyp, dastarhan basyndaǵy balalarymnyń jalanyp otyrǵan túrlerine bir qarap qoıyp, qazyny týraı bastadym. Shúberek shyqty. Áıelime qaradym. Áıelim ıyǵyn kóterdi.
– Má, shúberek jeńder!, – dep maıly shúberekti balapandarymnyń aldyna tastaı saldym.
– Shúberek jegimiz kelmeıdi! –dedi bári hormen.
Taǵy kese berip edim, ishinen tildeı qaǵaz shyqty. Hat eken. «Sálem!» dep jazylypty.
– Sálemetsiz be? –dedi áıelim mińgirlep.
– Áı, ne dep tursyń?–dep suradym men.
– Sálemdesip jatyrmyn ǵoı.
Ernimdi dúrdıtip, qazynyń taǵy bir bóligin kesip edim, taǵy bir paraq hat shyqty. Daýystap oqı bastadym: «Sálemetsiz be, kim bolsańyz da? Amal joq, kún kórý kerek, bizge et ótkizetin adam baǵany kóterip jiberdi, sosyn hat jazyp jatqanymyz ǵoı. Ózderińde ne jańalyq? Reseıde ushaq qulapty deıdi ǵoı? Ras pa? Obal bolypty... Aıtpaqshy, Reseı bizdiń elde synaq alańyn jalǵa alyp, bir zymyranyn synapty deıdi? Reseıdiń keń dalasy jetpegendeı. Qarańqalǵyr dese... Jynym keledi de... Ekologıany qurtyp... Basynyp... O nesi eı? Keshirińiz, saıasat meniń ne teńim...»
Men áıelime, áıelim jáýteńdep otyrǵan bala–shaǵasyna qarady. Balalarym maıly qazy jegisi kelip, jutynyp ólip barady. Kelesi bóligin kesip edim, balalar shulyǵy shyqty. Qýanyp kettim de, eki balama bólip berdim:
–Má, keptirip, kıip alyńdar! Iı, jeýge bolmaıdy, mynaý qaıtedi–eı?
–Shaınama deımin! Ashtan ólip barasyń ba?–degen áıelim balamyzdyń aýzynan maıly shulyqty julyp aldy.
–Máıki, ish kıim shyqsa bolar edi?–dep kekettim men.
24 myń teńgeni ǵana aınaldyratyn eń arzan aılyǵymdy alyp, bir toıyp qalaıyqshy dep edik, qarashy endi... Taǵy hat shyqty. Oqyp jatyrmyn: «Aıyp etpeńizder, qazyny osylaı toltyrmasam, qalaı kún kóremin? Aqsha arqalaǵan sheneýnikterdiń jemqorlyǵy aspanǵa jetti. Elbasy solaı dedi ǵoı. Búıte bersek, biz el bolmaımyz. Olar aqshany arqalap tasıdy! Kedeıler ıegin qasıdy...»
– Nemenege aqyl aıtyp ketti mynaý qatyn?–degen áıelim ernin tisteledi, –ákel beri, bazarǵa baryp, satýshy áıeldiń betine uraıyn!
Áıelim ashýlanyp, pisken qazyny, shúberekter men hattardy sómkesine saldy da, bazarǵa ketti. Sút pisirim ýaqyttan keıin, júzi jaınap, qaıta keldi. Aýystyryp beripti. Pisirmeı jatyp, ortasynan kesip kórip edim, ishinen topyraq tógildi. Jartysy qazy, jartysy topyraq...
– O, qasıetińnen aınalaıyn, qara jer!–dep kúbirledim men,–Sen satylmaısyń! Qazaq barda jer satylmaıdy!
Áıelim qazyny sómkesine salyp, bazarǵa qustaı ushty! Keshikpeı, entigip, et jegendeı bolyp, qýanyp qaıtty. Sóıtse, álgi satýshy áıel qasyna jumysqa alypty! Qazynyń ishine shúberek tyǵatyn jumys eken. Men hat jazyp áýremin: «O, qazaq eli, et jemeseń de, qaıǵyrma! Kóter eńseńdi! Jylama!»–dep jazyp jatyrmyn, jazyp jatyrmyn!
Muhtar Sherimniń feısbýk paraqshasynan
