Otbasylyq ómirdiń qyzyǵy men shyjyǵyn komedıa arqyly jetkizetin «Úılengender» («Jenatıkı») serıalynyń kezekti maýsymy 19 naýryzdan bastap 31 arnadan beriledi, dep habarlaıdy Qamshy.kz aqparat agenttigi. Búgin bes bólimdi serıaldyń alǵashqy bólimi jýrnalıserge kórsetildi.

«Qaladaǵy ańyzdar» («Gorodskıe legendy») jobasynyń avtorlary otbasylyq ómirge qadam basqan tórt dostyń ómirin «Úılengender» serıaly arqyly kórsetpek. Áıelimen, ata-anasymen aradaǵy kıkiljińder, sheshilmesteı kórinetin máseleler, alda tosyp turǵan tosynsyılar, otbasy aldyndaǵy jaýapkershilik – osynyń bári fılmde baıanadalady.

Serıaldyń rejıseri – Sanjar Omarov, prodúserleri – Sábıt Rahymbaev pen Dáýit Shaıhıslamov, atqarýshy prodúseri – Danıar Ormanbaev.

Prodúser Sábıt Rahymbaevtyń aıtýynsha, fılmdegi qyzyqty oqıǵalar ómirden oıyp alynǵan. Alǵashqy eki maýsymnan ereksheligi, avtorlar bul joly er men áıel arasyndaǵy qarym-qatynasqa aıryqsha mán bergen.

–Biz bala kúnimizden KVN-da oınap kelemiz. Ómirimiz shyǵarmashylyqpen tyǵyz baılanysty. Aınalamyzda kórgen dúnıemizden týyndy jasap shyǵaramyz. Máselen, alǵashynda stýdenttik ómir jaıly túsirip júrdik. Oqý bitirgen soń eseıip, jańa ómirge qadam basqan sátte boıdaq jigitterdiń ómiri jaıly «Gorodskıe legendy» serıalyn túsirdik. Keıin úılendik te, otbasylyq ómir taqyrybyna oıystyq. Buǵan deıin eki maýsymy shyqty. Endigisi 5 bólimnen turatyn «Úılengender Naýryzda» dep atalatyn komedıalyq serıal. Onda Naýryzdaǵy oqıǵalar sýretteledi, - dedi Sábıt Rahymbaev Qamshy.kz aqparat agenttiginiń tilshisine bergen suhbatynda.

–Birinshi bóliminde erlerdiń saýnaǵa baryp, ózge qyzdarmen áıelderine áshkere bolýy, olardan kek almaq bolǵan áıelderiniń qydyryp ketip, ózge erkekpen kúıeýlerine ustalyp qalýy kórsetilgen. Qazaq arasynda bul oqıǵalarǵa qatysty syn aıtýshylar kóbeıýi múmkin. Buǵan qatysty ózińiz ne aıtasyz?

–Syn aıtýshylardyń bolatynyn ózimiz de aldyn ala boljadyq. Biraq bizdiń serıal jańa aıtyp ótkenimdeı bes bólimnen turady. Besinshi bóliminde kórermen qalaǵan mereke de, patrıottyq sezim de bolady. Al jańaǵy oqıǵalar ómirde bolatyn jaǵdaılar. Onyń nesin jasyramyz? Er adam saýnaǵa baryp kóńil kóteredi, áıel adamdar da túrli klýbtarǵa qydyrady. Degenmen tym artyq kettik dep oılamaımyn. Biz senarıin jazý barysynda kórermen durys qabyldaıtyndaı oılanyp jazamyz,  dál sondaı oımen túsiremiz. Alaıda halyqtyń aýzyna qaqpaq bola almaısyń. Aıtatyndar da tabylýy múmkin. Tek bizdiń kórsetkimiz kelgeni: áıelder istiń mán-jaıyna barmaı, jón-josyǵyn bilmeı jatyp, aıǵaıǵa basyp jatady. Al olar er adamnyń ornynda bolyp kórse, bárin túsiner edi. Saýna, klýb – ol ómirdiń shyndyǵy.

Jalpy serıalda áıel men erdiń bar syry ashylady. Erlerdiń oıy qandaı bolady, dostar bolyp bas qosýlarda, otyrystarda qandaı oqıǵalar ornaıdy, neden qorqady, ne sezedi – bári derlik baıandalǵan.

–Siz osy ýaqytqa deıin tek komedıa túsirip keldińiz. Basqa janrda fılm túsirý josparyńyzda bar ma?

–Menińshe, adam bir baǵyttyń, bir salanyń mamany bolý kerek. Jalpy ózim trıller kórgendi, qorqynyshty, fantasıkalyq fılmderdi unatamyn.  Komedıalyq janrda jumys istegendikten, ondaı fılmderdi kórmeımin. Sebebi bir nárseden adam sharshaıtyn sátteri bolady. Al basqa janrlarda senarı jazý, fılm túsirý oıymda bar. Tek ony tereńinen túsinip, kásibıligine jete bilý kerek.

Kıno túsirý, senarı jazý óte úlken jaýapkershilikti talap etedi. Óz týyndyń kórermen suranysyna ıe bolý úshin ne isteý kerek? Munyń bárin oılanyp, tolǵanyp, birinshi kezekte óz kóńilińnen shyǵatyn senarı jazý – qıynnyń qıyny.