Qazaqstan Respýblıkasy Prezıdenti Ákimshiliginiń İshki saıasat bóliminiń meńgerýshisi Aıda Balaeva Almaty oblysyna jasaǵan jumys sapary aıasynda Jambyl aýdany týraly tyń derekterge toly «Qyzyr qonǵan qut meken» atty balalarǵa arnalǵan tanymdyq kitabynyń tusaýyn kesti. 

Jambyl aýdanyndaǵy árbir eldi meken, qonystar, onyń tabıǵaty men jer-sý ataýlarynyń shyǵý tarıhy, sonymen qatar osy óńirde týyp-ósken tarıhı tulǵalar jaıynda buryndary jarıalanbaǵan tyń derekter, ólketanýshylar men ǵalymdardyń zertteýleri, jazýshylar men tarıhshylardyń, sondaı-aq kónekóz qarıalardan jetken ańyzdar men shejireler 4 jyl boıy jınaqtalyp, atalmysh kitapqa engizilgen. Jazylý máneri balalardyń týǵan ólkesin tanyp-bilýge degen qyzyǵýshylyǵyn oıatyp, tanymyn keńeıtip, otansúıgishtik rýhyn shyńdaýǵa yqpalyn tıgizedi dep senemiz. Kitap mektep oqýshylary men ustazdar qaýymyna, sonymen qatar elin, jerin súıetin qalyń oqyrmanǵa arnalyp jazylǵan. 

Tanymdyq sıpatta jazylǵan eńbek Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy «Týǵan jer» jobasy aıasynda jaryq kórip otyr. Osy rette, saltanatty sharany ashyp, júrgizip otyrǵan oblys ákiminiń orynbasary Jaqsylyq Omar da kitap avtorynyń tusaýkeserdi kindik qany tamǵan kıeli mekende ótkizýdi jón sanaǵanyn atap ótti.

Jıynǵa qatysqan kópshilikke júrekjardy lebizin bildirgen Aıda Balaeva kitaptyń qolǵa alynýyna týǵan topyraqqa degen perzenttik mahabbatynyń túrtki bolǵanyn aıtty. Aqyny nóserlep jyr tókken, batyry baıandy jurt etken ólkeniń tarıhyn zerdelep, kóńil tebirenisin aq qaǵazǵa túsirýi aldaǵy úlken eńbektiń bastamasy dep biletinin jetkizdi.

– Ideıanyń ıi qanyp, ábden pisýi Elbasynyń «Rýhanı jańǵyrý» baǵdarlamasy júzege asyrylyp jatqan kezeńge sáıkes keldi. Munyń da úlken sımvoldyq máni bar dep bilemin. Elbasy aıtqandaı, árkim Týǵan jeriniń damýyna úles qosý arqyly, Týǵan eldiń órkendeýine eńbek etedi, – deıdi Aıda Balaeva.

Kitaptyń tusaýkeserine arnalǵan kezdesýdi Almaty oblysy ákiminiń orynbasary Jaqsylyq Omar júrgizdi. Keshte sóz alyp, kitap jaıynda oıymen bólisken Jambyl aýdanynyń ákimi Jandarbek Dalabaev, belgili jazýshy-jýrnalıst, QR eńbek sińirgen qaıratker, fılologıa ǵylymdarynyń doktory, profesor Ýálıhan Qalıjan, T.Júrgenov atyndaǵy Ulttyq akademıanyń profesory, belgili jazýshy Naǵashybek Qapalbekuly, belgili qoǵam qaıratkeri, Almaty qalasynda birqatar jaýapty qyzmetter atqarǵan fılologıa ǵylymdarynyń doktory, profesor Kenjehan Matyjanov, aýdandyq «Atameken» gazetiniń bas redaktory Rátbek Terlikbaev kitaptyń qurylymy jaıly tereńnen tolǵap, oqyrmannyń kitapqa degen qyzyǵýshylyǵyn arttyra tústi. 

– Bul – balalarǵa arnalǵan kitap. Sondyqtan, barynsha qarapaıym tilmen baıandalǵan.  Tarıhı derekterdiń mazmuny ashylyp, túsinikti jazylǵan. Kitap kishkentaı oqyrmandardyń boıyna týǵan jerine degen súıispenshilik darytýǵa az da bolsa úles qossa – meniń maqsatymnyń oryndalǵany. Ol oqýshylardyń týǵan jerin tereńirek zertteýge qulshynysyn da oıatar dep úmittenemin. Bolashaqta irgeli zertteýler jasalyp, kitaptaǵy málimetter ǵylymı turǵydan baı túserine senimdimin", - dep atap ótti Aıda Ǵalymqyzy.

Kezdesý keshi jetisýlyq óner ujymdarynyń konserttik baǵdarlamasymen jalǵasyp, sońynda jınalǵandarǵa jańa kitap syıǵa tartyldy. 

Otanshyldyqqa, patrıotızmge úndeý maqsatyndaǵy kólemdi kitap balalardyń talǵamyna saı kózge tartymdy, kóńilge qonymdy sapaly basylǵan. Onda kıeli jerler, tarıhı oryndar, osy óńirden shyqqan ult tulǵalary, jer-sý attarynyń shyǵý tórkini, eń aıaǵy shejire, ańyz-áńgimelerge deıin oryn berilgen. Aýdannyń ótkenimen qatar búgininen de mol maǵlumat qamtylyp, árbir aýyldyq aımaq pen eldi mekenge jeke-jeke toqtalǵan. Sharada aqyn Nadejda Lýshnıkova qalamger sińlisine arnap óleń oqydy.

Sahna tórinde jasalǵan tusaýkeser rásiminde Aıda Balaeva jınaqtyń alǵashqy danasyn tarıh páninen sabaq bergen súıikti ustazy Nurshagúl Abaevaǵa tapsyrdy. Kelgen jurtshylyqqa da kitabyn syılady. Kesh sońynda aýdandyq «Súıinbaı sazy» fólklorlyq-etnografıalyq ansambliniń ártisteri án-jyrdan shashý shashty.

Jerlesterimen emen-jarqyn júzdesken Aıda Ǵalymqyzy týǵan aýyly Jambylǵa baryp, murajaıdaǵy aqyn kesenesi men Nurǵısa Tilendıev eskertkishine gúl shoǵyn qoıdy. Osy kúni Aıda Balaeva ózi oqyǵan Jambyl atyndaǵy orta mektepke baryp, onda ustazdarymen jáne oqýshylarmen kezdesip, emen-jarqyn áńgime quryp, sońynda mektep ujymyna kitaptar men ınteraktıvti taqta syılady.