Búgin Aqparat jáne komýnıkasıalar mınıstri Dáýren Abaev halyqqa esep berý kezdesýin ótkizip, ózderiniń 2017 jyly atqarǵan jumystary men aldaǵy josparlaryn bólisti, dep habarlaıdy Qamshy.kz aqparat agenttigi.

Baıandama barysynda mınıstr mamyrdyń 6-sy kúni Aqparat jáne komýnıkasıalar mınıstrliginiń qurylǵanyna 2 jyl tolǵanyn atap ótti. Osy aralyqta memlekettik sektordyń aqparattyq jumys sapasy artyp, ondaǵan taraýlardyń ornyna biryńǵaı respýblıkalyq medıajospar qabyldanǵan. Memlekettik aqparattyq tapsyrystyń sapasyn arttyrý úshin de birneshe normatıvtik bastamalar qalyptasyp otyr.

– Mysaly, memlekettik aqparattyq tapsyrys zań boıynsha memlekettik satyp alýdan alynyp tastaldy. Alaıda, arnaıy qaǵıda qabyldandy. Osylaısha, BAQ-ty irikteý úderisi qoǵamdyq uıymdardyń ashyq baqylaý múmkindigin qalyptastyrdy. Al memlekettik aqparattyq tapsyrysqa joǵary talapqa saı BAQ ókilderi ǵana qatysa alady, – dedi Dáýren Abaev.

Taǵy bir aıta keterligi, 2017 jyly elimizde memlekettik aqparattyq tapsyrys aıasynda 40 serıal túsirilgen. Bul – 2016 jylǵy jaǵdaıdan 2 ese artyq kórsetkish. Onyń biregeılerin óz elderinde kórsetý quqyǵyn Qyrǵyzstan, Reseı, Qytaı, t.b. kórshi memleketter satyp alǵan. Sondaı-aq, elimizde tek qazaqstandyq kórkem jáne derekti fılmder kórsetetin «Elarna» telearnasy ashylyp, otandyq telearnalardy onlaın rejımde kórýge múmkindik beretin Galam.tv jobasy jańartylǵan. Oǵan qosa, Aqparat jáne komýnıkasıalar mınıstri bıyldan bastap aımaqtardaǵy anologtyq habar taratýdy kezeń-kezeńimen toqtatatynyn aıtty.

– 2018 jyldyń sońyna deıin Mańǵystaý, Jambyl, Ońtústik Qazaqstan oblystary tolyq sıfrlyq tele jáne radıohabar taratýǵa kóshedi. Al ózge aımaqtar sıfrlyq habar taratýǵa 2020 jyldyń sońyna deıin aýysady. Sonymen qatar, Otau tv otandyq spýtnıktik operatoryn damytý maqsatynda jańa Otau+ aqyly paketin iske qosýdy josparlap otyrmyz. Onyń quramynda sheteldik túrli janrda belgili 14 telearna bolady. Otau+ tamashalaǵysy keletinder aıyna 500 teńge tóleıdi, – dedi Dáýren Abaev.

Conymen qatar, Aqparat jáne komýnıkasıalar mınıstrligi tarapynan «Ashyq úkimet» jobasyna erekshe nazar aýdarylatyny da aıtyldy. Dáýret Abaevtyń sózinshe, ashyq derekter portaly arqyly el azamattary aldaǵy ýaqyttarda 2 myń 800-ge jýyq derekke qol jetkize alady eken. Bul kórsetkish arta túsýi de tıis jáne atalmysh portalda 25 myń normatıvtik quqyqtyq akt pen dál sondaı kólemdegi búdjettik baǵdarlamalardyń jobalary ornalasatyn bolady.

– Kez kelgen azamat memlekettik organdardyń birinshi jetekshileriniń blogplatformasy arqyly ózin qyzyqtyrǵan suraqtarǵa jaýap taýyp, ashyq dıalog portaly arqyly ınternet-konferensıalarǵa qatysa alady. Bul quraldardyń barlyǵy el turǵyndary men memleket arasyndaǵy kópirdi nyǵaıtý úshin qolǵa alynyp otyr, – dedi mınıstr jáne elimizdiń aqparattyq naryǵyn yntalandyrý maqsatynda ótip jatqan ımıjdik is-sharalarǵa da toqtalyp ótti.

– Bıyl televızıadaǵy jýrnalıser arasynda «Tumar» baıqaýy ekinshi ret ótti. Bul shara qazaq televızıasynyń 60 jyldyǵy aıasynda uıymdastyryldy. Osy jyldyń maýsym aıynda, ıaǵnı BAQ qyzmetkerleriniń kásibı merekesi qarsańynda «Úrker» premıasy saltanatty túrde tabystalady. Sonymen qatar, qazaqstandyq BAQ úshin Astana Media Week aptasyn ótkizý dástúrge aınaldy. «Rýhanı jańǵyrý» baǵdarlamasy aıasynda mınıstrlik «Qazaqstannyń 100 jańa esimin» de júzege asyrýda. Ashyq daýys berý nátıjesinde, óz eńbekterimen úlken áleýmettik tabysqa jetken elimizdiń jańa esimderi belgili boldy. Ótken jyldyń 1 jeltoqsanynda olar Elbasymen kezdesti. Osy oraıda, «100 jańa esimniń» qoǵamǵa paıdaly jobalary memlekettiń qoldaýyna ıe bolatynyn atap ótkim keledi, – dedi Dáýren Abaev.

Baıandama barysynda zorlyq-zombylyq kórgen nemese basqa da quqyq buzýshylyqtardan zardap shekken balalardy qorǵaý maqsatynda, olardyń bet-álpeti men balaǵa qatysty aqparattardy jarıalaýǵa tyıym salynǵany aıtyldy. Balalardy ınternettegi destrýktıvti aqparattardan qorǵaý úshin de ótken jyly mınıstrlik baılanys operatorlary jáne «Bolashaq» qaýymdastyǵymen birlese otyryp, bilim berý ınternet jobasyn iske qosqan. Bul jobada balalarǵa arnalǵan qaýipsiz ınternet-servıster, tanymdyq jáne oıyn túrindegi baǵyttar qarastyrylǵan 3 myń 500-den astam saıt bar eken. Budan bólek, memlekettik organdar men uıymdarǵa endi kópshilik shoǵyrlanǵan jerlerde tek otandyq arnalardy kórsetý qajettiligi týraly mindetteme belgilengen.

Eseptik baıandamadan keıin Aqparat jáne komýnıkasıalar mınıstrine onlaın-rejımde baılanysqa shyǵyp otyrǵan aımaqtardyń turǵyndary men zaldaǵy jurt birneshe suraq qoıdy. Endi solardyń ishindegi eń mańyzdylaryna toqtalyp ótsek...

BAQ ókilderiniń biri mınıstrden baspanamen qamtý baǵdarlamalary aıasynda jýrnalıserdiń jekeleı qarastyrylý-qarastyrylmaýy jóninde surady.

– Elimizdegi buqaralyq aqparat quraldarynyń 95 paıyzy – jekemenshik kompanıalardyń enshisinde. Sol sebepti, jekemenshik BAQ baspanamen qamtý máselesin ózderi sheshýi tıis. Mysaly, muǵalimderdiń barlyǵy búdjettik qyzmetkerler desek, jýrnalıserdiń basym bóligi bul sanatqa jatpaıdy. Al biz ár vedomstvoǵa baǵynyshty uıymnyń basshysyna osy máseleni qoıamyz. Bul másele bir jerde sheshiledi, endi bir jerde sheshilmeı jatady. Bir jerde jataqhana bar degendeı. Eger vedomstvoǵa baǵynyshty uıymdardyń basshylary maǵan usynyspen kelse, biz olardy mindetti túrde qoldaımyz. Sondyqtan BAQ jetekshilerinen usynystar kútemin, – dedi Dáýren Abaev.

Kelesi suraq uıaly baılanys operatorlaryna qatysty boldy. Oǵan jaýap bergen mınıstrdiń aıtýy boıynsha, qazaqstandyqtar uıaly telefondaryn 2018 jyldyń aıaǵyna deıin tirkep úlgerýi kerek. Óıtpegen jaǵdaıda, oǵan 2019 jyldyń 1 qańtarynan bastap qyzmet kórsetilmeıtin kórinedi.

Mınıstr baıandamasynda da, suraq-jaýap kezinde de eldegi ınternet ınfraqurylymyn damytý barysyn basa aıtty. Onyń sózinshe, «Sıfrlyq Qazaqstan» memlekettik baǵdarlamasy aıasynda, búginde jyldamdyǵy joǵary ınternetti 13 mıllıon turǵyn paıdalanady. Tarqatyp aıtqanda, turǵyn sany 10 myńnan bastalatyn eldimekender 3G, al 50 myńnan joǵary turǵyny bar eldimekender 4G baılanys standartymen qamtylǵan. Al byltyr elimizdegi barlyq aýdan ortalyǵy baılanystyń 4-býynymen qamtamasyz etilipti. Mınıstrliktiń endigi mindeti – aýyldyq jerlerge keń jolaqty ınternet jetkizý. Muny memlekettik-jekeshelik seriktestik baǵdarlamasy arqyly júzege asyrý josparlanǵan.

– Ol úshin joba aıasynda 2021 jylǵa deıin 2 mıllıonnan astam turǵyny bar 1 myń 249 eldimekendi jyldamdyǵy joǵary ınternetpen qamtımyz. Jyldamdyǵy joǵary ınternet aýyl sharýashylyǵyn sıfrlandyrý, bilim berý men medısına salasynyń sapasyn arttyrý, sondaı-aq, memlekettik qyzmet kórsetý salasyn damytý syndy aýyldaǵy keshendi máselelerdi sheshetin bolady, – dedi Aqparat jáne komýnıkasıalar mınıstri Dáýren Abaev.