Pavlodar oblysynda 12 jasar qyzǵa azǵyndyq jasamaq bolǵan er adam quryqtaldy. 39 jastaǵy kúdikti oqýshyny lıft ishinde zorlaýǵa árekettengen, dep jazady Qamshy.kz aqparat agenttigi ktk.kz-tiń málimetine súıenip.

Oqıǵa tapa-tal túste Ekibastuz shaharyndaǵy turǵyn úılerdiń birinde bolǵan. Ondaǵy beınebaqylaý kamerasyna túsip qalǵan myna kadrlarda mektepten qaıtyp kele jatqan oqýshy qyzdyń dúkenge kirgeni baıqalady. Jetkinshekti ańdyǵan kúdikti de osynda taırańdap júr. Keıin úıine qaraı bet alǵan oqýshynyń sońynan podezge birge erip kirgen. Aqyry lıft ishinde qyzdy sheshindirýge árekettenipti. Esik ashylǵan sátte qashyp qutylǵan jetkinshek muny birden anasyna aıtyp bergen eken. Kúdikti bolsa, oqıǵa ornynan dereý izin sýytqan. Dese de, polıseıler kóp uzamaı 39 jastaǵy ekibastuzdyqty qolǵa túsirdi.

Baıan Maǵzumova, Pavlodar oblysy İİD baspasóz hatshysy:

-Kámeletke tolmaǵanǵa qatysty azǵyndyq áreket jasaýǵa oqtalǵan degen kúdikpen 39 jasar er adam anyqtalyp ustalyndy. Qazirgi kezde osy fakt boıynsha qylmystyq is qozǵalyp, sotqa deıingi tergeý jalǵasýda. Sot saraptamalary taǵaıyndaldy. Al kúdikti ýaqytsha qamaý ızolátorǵa qamaýǵa alyndy.