Búgin Astana ekonomıkalyq forýmy sheńberinde Qazaqstan Respýblıkasy Energetıka mınıstrligi, Astana qalasynyń ákimdigi, «Nazarbaev zıatkerlik mektepteri» derbes bilim berý uıymy jáne «Shell» kompanıasy arasynda Memorandýmǵa qol qoıyldy, dep habarlaıdy Qamshy.kz aqparat agenttigi. 

Memorandýmnyń maqsaty – «Mektepterge kún energıasy» pılottyq jobasyn iske asyrý. Joba sheńberinde Astana, Almaty, Aqtaý, Atyraý jáne Oral qalalaryndaǵy Nazarbaev zıatkerlik mektepterinde kún fotoelektr júıelerin ornatý kózdelgen.    

Memorandýmǵa QR Energetıka mınıstri Q. Bozymbaev, Astana qalasynyń ákimi Á. Isekeshev, «NZM» DBU Basqarma tóraǵasy K. Shámshıdınova jáne Qazaqstandaǵy «Shell» konserniniń vıse-prezıdenti jáne tóraǵasy Olıve Lazar myrza qol qoıdy. 

«Mektepterge kún energıasy» jobasyna 2016 jyly Qazaqstan Respýblıkasy Energetıka mınıstrligimen qol qoıylǵan Yntymaqtastyq týraly memorandým sheńberinde «Shell» kompanıasy bastamashylyq jasady.

Atalǵan pılottyq joba Qazaqstan úshin biregeı joba bolyp tabylady. Joba jalpyulttyq masshtabta bólingen energıany óndirýdiń shaǵyn jobalary salasyn damytýǵa baǵyttalǵan. Onyń maqsaty – Respýblıkanyń «jasyl ekonomıkaǵa» kóshýi boıynsha is-qımyldaryn odan ári qoldaý. Joba sonymen qatar kishi jáne orta bıznestiń áleýetin damytýǵa járdemdesýge, sondaı-aq naqty ǵylymdardy (STEM: ǵylym, tehnologıalar, ınjınırıń jáne matematıka)  zerdeleý baǵdarlamalaryna jas urpaqtyń qyzyǵýshylyǵyn yntalandyrýǵa baǵyttalǵan.

Memorandýmǵa qol qoıý rásiminen soń taraptardyń ókilderi Qazaqstanda jańartylatyn energıa kózderin damytýda atalǵan bastamanyń erekshe mańyzdylyǵyn atap ótti.

«Mektepterge kún energıasy» bastamasy Qazaqstanda jańartylatyn energıa kózderin damytýǵa baǵyttalǵan QR Energetıka mınıstrligi men «Shell» kompanıasy arasyndaǵy tabysty yntymaqtastyq nátıjesinde týyndady. Osy Jobany iske asyrý elimizdiń aımaqtarynda qýaty az jańartylatyn energıa kózderin paıdalanatyn qondyrǵylardy odan ári paıdalaný úshin ózindik platformaǵa aınalatyndyǵyna senemiz jáne osylaısha elde parnıktik gazdardyń shyǵaryndylaryn azaıtý men jańartylatyn energıa kózderi salasynda nysanaly ındıkatorlarǵa qol jetkizý boıynsha Úkimettiń jumysyna óz úlesin qosady dep úmittenemiz», - dedi QR Energetıka mınıstri Qanat Bozymbaev.

“Biz kompanıamyzdyń Qazaqstandaǵy 25 jyldyq jumys barysynda «Shell» jáne Qazaqstan Respýblıkasy arasynda qalyptasqan áriptestik ózara qarym-qatynasty joǵary baǵalaımyz. Bizdiń kompanıa Qazaqstan Respýblıkasymen óziniń strategıalyq alánsyn odan ári tereńdetýge nıetti. Qol qoıylǵan memorandýmnyń nátıjesinde Respýblıkanyń «Jasyl ekonomıkaǵa» ótý nıetin qoldaý múmkindigine ıe bolǵandyǵymyzǵa qýanyshtymyz jáne atalǵan maqsattarǵa jetýde osy joba laıyqty úles qosatyndyǵyna senimdimin», - dep atap ótti Qazaqstandaǵy «Shell» konserniniń vıse-prezıdenti jáne tóraǵasy Olıve Lazar.

«Osy Memorandým sheńberinde biz kún fotoelektr júıelerin mektep shatyrlaryna qondyrý boıynsha yntymaqtastyq jasaıtyn bolamyz. Atalǵan joba jańartylatyn energıa kózderin tıimdi paıdalanýdyń jaqsy úlgisi bolady jáne bolashaqta elimizdiń ózge aımaqtarynda da keńinen taraýy múmkin»,- dedi Astana qalasynyń ákimi Áset Isekeshev.

«Mektepterge kún energıasy» jobasy STEM-bilim berý tásilderi belsendi engizilip jatyrǵan Zıatkerlik mektepter úshin úlken mańyzǵa ıe. Zıatkerlik mektepter turaqty damýdyń barlyq basymdyqtaryn, sonyń ishinde jańartylatyn energıa kózderin taratýdy qoldaıdy. Oqý oryndarynda kún fotoelektr júıelerin engizý – strategıalyq durys bolyp tabylady, sebebi tabıǵı resýrstarǵa uqypty qaraýdy jáne ekologıalyq jaýapkershilikti mektepter qalyptastyrady», - dep aıtty «Nazarbaev zıatkerlik mektepteri» DBU Basqarmasynyń tóraǵasy Kúlásh Shámshıdınova.

Aıta keteıik, «Shell» – energetıkalyq jáne munaı-hımıalyq kompanıalardy biriktiretin halyqaralyq konsern. Onyń shtab-páteri Gaagada (Nıderland) ornalasqan. Qazirgi ýaqytta «Shell» Qazaqstan ekonomıkasyndaǵy iri sheteldik ınvestorlardyń biri bolyp tabylady. «Shell» konserni tórt jobaǵa qatysady. Olar – Soltústik Kaspıı boıynsha ónimdi bólý týraly kelisim (qatysý úlesi 16.81%), Kaspıı teńiziniń qazaqstandyq sektoryndaǵy «Jemchýjına» lısenzıalyq ýchaskesin ıgerý boıynsha ÓBK (qatysý úlesi 55%), Qarashyǵanaq ken ornynyń ónimin bólý týraly túpkilikti kelisim, jáne qazaqstandyq munaıdy álem naryǵyna jetkizetin Kaspıı qubyr konsorsıýmy (qatysý úlesi 7.4%).