"Qazaq handyǵyna 550 jyl" shyǵarmashylyq báıgesine! 

Ǵunnyń qyzy Ǵunnyń qyzy, kúnniń qyzy tákappar, Qus jolyndaı qos burymyn tarqatar. Kerik qasy ásem anaý qıylǵan, Bar sulýlyq bir ózine buıyrǵan.   Altyn zermen Aıshyqtalǵan sholpysy, Syńǵyrlaıdy sybyzǵynyń únindeı. Mańdaıyna aı týǵandaı jarqyrap, Shat-shadyman júredi ylǵı kúlimdeı.   Marjan tisi, gúl erini úlbirep, Tańǵy shyqtaı qos janary móldirep. San shaıqasta jeńilmegen batyryń Basyn ıgen et-júregi eljirep...   Sanasynda sulý qyzdyń erkindik, Altaı taýdyń aq qaryndaı dıdary. Seneri tek Jaratýshy bir Alla, Kámil bolǵan jastaıynan ımany.   Qynaı belge qup jarasqan beshpeti, Oıýlanǵan myń san túrli órnekpen. Jer betinen kezikpep ed mundaı jan Estigenmin atam aıtqan ertekten.   Qulyn músin kinásiz hám bulyqsyp, Kúlkisimen ún qosady bulaqqa. Gúl terýge shyǵady ózi qyratqa, Qaraýyl joq qasyna ergen biraqta.   Qaraýyldy qasyna ertip almaýy, Tektiliktiń kórinisi ǵoı ol-daǵy. Sert etetin serilerdi izdeı me? Al ázirge jumbaq bolǵan ol jaǵy...   Atajurt - aıbynym (Qazaq handyǵyna 550 jyl )      Dala baıtaq, peıili sondaı keń edi, Tóńiregi tórt qubyla teń edi. Alty qanat aq boz úıi barynda Qaıran qazaq qaısy hannan kem edi. Kúshi emes, bir Alla edi seneri, Yrys qonǵan sodan bolar sebebi.   Salqyn samal qońyr dóńnen esetin, Ómir jolyn keńesýmen sheshetin. Qara atanǵa júgin artyp malshylar, Qara qospen kóktemede kóshetin. Jazyǵynda mal myńǵyryp dalanyń, Jynys orman, jasyl shópter ósetin.   Túıe bozdap, qoıy qozdap qorada, Oǵylan eldiń ómiri qut bolatyn. Qara qazan, sar balanyń tileýi, Tús mezgilde Apam etin salatyn. It basyna maı tógiler zaman ed, Saýmal qymyz sary sabadan aǵatyn.   Tórimde keń Ata-Ana jaıdary, Qyzyqty edi sábılerdiń oınaýy. Baıashat el tabıǵatyn aıtqyzbaı, Jetkizetin samaýrynnyń qaınaýy. At aǵashta súlik músin sáıgúlik, Aǵytylǵan qozylardyń baılaýy.   Keshki mezgil, shubat, qymyz býyńdy ap, Atam shertken dombyra úni qońyrlap. İrgedegi aına-kólge ol kezde, Aqqý-qazdar qonatyn-dy mamyrlap. Túrli qustar jatatyn-dy shýyldap, Kól tolqysa qaıta ushatyp pyryldap...   Tentek, tolyq aǵalar da etjeńdi, Sham túbinde keńesetin ótkendi. Otqa jaqqan qıdyń ıisi juparlap, Iisine mas qylatyn bókterdi.   Ótirik, urlyq, arazdasý bolmaıtyn, Rýhsyzdyq jeńe almaıtyn tekti eldi.   Mine, osyndaı dýman bolyp jatatyn, Kún de qımaı uıasyna batatyn. (Attyń basqan batpaqtaǵy izine, Sary shymshyqtar jumyrtqalap jatatyn). Túnde aıdyń sorǵalap sút sáýlesi, Jazdyń tańy al erterek atatyn...   İİ   Mamyrstan bul zamanǵa qyzyǵyp, Jaýyzdardyń nıetteri buzylyp. Túlen túrtip soqyr daýyl qutyrdy, Syrttan  kirdi aspan kózdi qubyjyq. Qaımana el esi ketip egildi, Omyraýy kóz jasyna jýylyp.   Kele sala keń dalaǵa suqtandy, Artyq kórdi aq ordany jyqqandy. Baýyryna basty olar buqqandy... Alastady zulymdyǵyn uqqandy. Ana tildi joǵaltpaq bop aldymen, Oqqa tyqty el serkesin ultjandy.   Tildi qorlaý, dildi qorlaý degendik, Jerdi jaýlaý namysyńdy tómen qyp. Reńińdi aınaldyryp ózine, Máńgúrt qylyp tastamaqshy kereń qyp. Tarıhtan zorlyqpenen óshirip, Jerdy alyp qurtpaq boldy kóshirip.   Keń dalaǵa aldymenen qol saldy, Qol salsa da aıamastan mol saldy. Aq boz úıdiń jylan oınap tórine, Jez buıdaly kósh kerýenin qańtardy. Eki dosty bir-birine qaırap sap, Týǵyzdy olar neler sumdyq daý-shardy.   Bılep-tóstep tildi joımaq boldy olar, Mádenıet jazýdy aldy burmalap. Qara túnek aspandy bult torlady, Kózden jasy analardyń sorǵalap. Mal soıǵannan ońaı boldy olarǵa, Eger kenet bas kóterse bir qazaq. Zamanynyń taqıasy tar boldy, İsher sýǵa, jeıtin asqa zar boldy. Otarshylar oıranynyń syıy osy, Taý shaǵylyp, baıraq qulap qor boldy. Syrtqa aýyp qońyr ańdar aǵylyp. Jerde qaqpan, al aspanda tor boldy.   Suraý-jylaý boldy adamdar ermegi, Setinedi kil namystyń órnegi. Azǵyndardyń baǵasy artyp asyldan, Soıyldaryn ońǵa-solǵa sermedi. Ultym degen jandy ózekke tepkilep, Tiri aparyp qara jerge jerledi.   Endi tyńda jeter bolsa dármeniń, Sarǵaıtty olar esilderin záýrenin. Tarıhtyń qaınaǵan bul qazany, Shaqyrǵam joq jaǵasyna áýreniń. Mekem aǵaı jazǵan kitap oı saldy, Sum zamannyń elestetip az-kemin.   Jalqy kúshik, jetim bala qý tegesh, Terezeden bir úzim nan surap tur. Aqyl aıtar aǵalar da joǵalǵan, Shoıyn qoldyń salmaǵyna qulapty ul. Tyrjalańash kúpisinen tonalǵan, Sábı-qazaq qaıyr tilep jylap tur.   İİİ   Jo...jo...joq! Ol sábıdiń kóz jasyna gúl óner, Qara taýlar, qalǵymańdar, túregel. Kúnnen týǵan ekendigi shyn bolsa, Basyn ıip qanshalyqty júredi el, Atqa qonsa namysyna ot berip, Aıtpasam da arǵy jaǵyn bile ber.   Ker zamannyń jaryp shyǵyp qursaǵyn, Kúlip týdy shyǵysynan kún saǵym. Jetim kúshik arlan boldy er jetip, Bastyrmaıdy jat tabanǵa jýsanyn. Eldi ózine qaratatyn kez keldi, Mesheýlikti kórge jerlep bir saryn. Kúnnen týǵan aspan tústi baıraǵy, Ár qazaqtyń namysynyń aıǵaǵy...            Epılog   Kıesi  nurdan Alla saqtaǵan, Qasıetti edi meniń Saq Babam. Tektiligi dúr namysy asqaq, Jetimdi jylatyp jerin satpaǵan. Kógimde qyran erkin qalyqtap Baıraǵym jelbirep, úzilmes asqaq án.   Juldyz shahar   Myń san ǵasyr Úreı, úmit arbasyp, Jez buıdasyn jel úze almaı, Jetti kerýen jalǵasyp.   Baıraǵyn jel jyǵa almaı, Tómendemeı eńsesi. Altyn shynar butaǵynda, Beıbitshilik jyr keshi.   Aq semserdi sertke ustap, Oǵlan erler máńgi dúr. Yrysty ólke keýdesine, Saýyldaǵan tańǵy nur.   Gúldeı jaınap juldyz shahar, Asylady aspanǵa. Astanany jyrlaý úshin, Syımaıdy bir dastanǵa.   Uly jibek jer ústinde, Qus jolynyń sýreti. Qalyń eldiń shejiresi, Tarıhtyń ol bir beti.   Tynyshtyqpen terbeledi, Yntymaqtyń besigi. Jabylmaıdy esh ýaqyt, Darhan quttyń esigi.   Máńgilik te azdyq eter, Adal nıet baǵytqa. Shynar bolý jarasady, Shynshyl uly halyqqa.