Dúnıejúzi qazaqtarynyń qaýymdastyǵy  Aqsaqaldar alqasy músheleriniń Qazaqstan Respýblıkasynyń barlyq azamattaryna, Táýelsizdik jyldary  shetelderden atajurtqa oralǵan aǵaıyndarǵa

Ú  N  D  E  Ý  İ

Búgingi tańda alys jáne jaqyn shetelderde 5 mıllıonǵa jýyq qazaq dıasporasynyń ókilderi turady. Bul aǵaıyndarymyz qaı jerde, qaı elde tursa da qazaq halqynyń quramdas bir bóligi. Soǵan oraı, olar Qazaqstan Respýblıkasynyń ataq-abyroıynyń asqaqtap, ósip-órkendeı berýine bir kisideı tilektes. Qazaq eliniń búgini men bolashaǵyna baılanysty qolǵa alynǵan kez-kelgen is-sharalarǵa da  aıryqsha kóńil bólip, bul jónindegi jańalyqtarǵa erekshe nazar aýdarady. Mine, osy turǵydan kelgende, sheteldegi aǵaıyndar úshin  Qazaqstandaǵy bıylǵy  kezekten tys Prezıdent saılaýy – asa mańyzdy ýaqıǵalardyń biri. Iaǵnı, aldaǵy ýaqytta Qazaq eliniń tizginin kim ustaıdy, Memleket basshysy bolyp kim saılanady degen  másele olardy da erekshe oılandyrady ári alańdatady. Óıtkeni, Tarıhı Otanynyń Táýelsizdigi, baq-berekesi, ıgi jeńisteri dúnıejúziniń túkpir-túkpirindege búkil  qandastarymyz úshin bárinen de qymbat.

Dúbiri mol dúnıe dál qazir dúrbeleń shaqty bastan ótkizýde. Kóńilge alań salarlyq jaıttar búgingi kúni tym kóbeıip barady. Bárinen de qaýiptisi, geosaıasat atty alyp ajdahanyń oıanyp, qaıta bas kóterýi, álemniń jaǵrafıalyq kartasy betine ózgerister engizý áreketiniń órshýi bolyp otyr. Álemdik ekonomıkalyq qurylymdy árkim óz múddesine saı qaıta qurýǵa umtylýshylyq ta baıqalýda. Bul rette álemniń alpaýyt elderiniń nazary shıkizat kózderine baı Qazaqstan tárizdi elderge eń aldymen túsip otyrǵandyǵy da jasyryn emes. Munyń syrtynda, jer baýyrlap jyljyp, jer betin tegis jaılaı bastaǵan álemdik ekonomıkalyq daǵdarys taǵy bar. Qalaı degende de, aldaǵy kezeń kóptegen memleketter úshin, onyń ishinde súıikti Qazaqstanymyz úshin de aýyr synaqtar mezgili bolǵaly tur. İshtegi, syrttaǵy barsha qazaq pen barlyq qazaqstandyqtar kózdiń qarashyǵyndaı saqtaýǵa tıisti el Táýelsizdigine, irgeli memlekettigine nuqsan kelmeý úshin áreket eter kez keldi. Árıne, eldiń birligi, yntymaǵy qajet mundaıda. Shırek ǵasyr ýaqyt boıy nebir qıyn-qystaý kezeńderden qazaqstandyqtardy súrindirmeı ótkizgen, búgingi bıik tabystarǵa qoldaryn jetkizgen Elbasy tóńiregine tyǵyz toptasý qajet mundaıda. Osyǵan baılanysty bizder, tarıhı Otanyna shetelden oralǵan qazaqtar Astanada ótken «Nur-Otan» partıasynyń kezekten tys HVI sezi jumysyna úlken qyzyǵýshylyqpen kóńil aýdardyq. Táýelsizdik jyldarynda atajurt topyraǵyna oralǵan mıllıonǵa jýyq (tabıǵı ósimin eskersek, jan sany 1,5 mıllıon adamǵa jetedi) qazaqtyń qaı-qaısysy da osyndaı sezimdi bastan keshti.   Sheteldegi jalpy sany 5 mıllıonǵa jýyq  qazaq dıasporasy ókilderi de osynaý ultymyzdyń uly jıynyna eleńdeı qulaq túrgendiginen habardarmyz. Bárimiz qazirgideı dúrbeleń shaqta tájirıbeli de bilikti, talaı synaqty bastan ótkizgen N.Á.Nazarbaevtyń kandıdatýrasyn sezd delegattary biraýyzdan QR Prezıdenttigine usynǵandyǵyn qýanyshpen qarsy aldyq.

Qazaq topyraǵynan tys jerlerde  almaǵaıyp ǵumyr keshken, talaı saıası naýqandarǵa kýá bolǵan bizderge qazirgi kezeńniń kúrdeliligin, onyń synyna Elbasymyz Nursultan Ábishuly Nazarbaevtyń tóńiregine tyǵyz toptasý arqyly ǵana tótep bere alýǵa bolatyndyǵyn  aıtý – paryz. Óıtkeni, Qazaqstan Respýblıkasynyń jıyrma jyldan sál ǵana asqan ýaqyt ishinde búkil álem tanyp, moıyndaǵan, jáne áleýmettik-ekonomıkalyq, mádenı-rýhanı salada barynsha tez qarqynmen damyǵan táýelsiz memleketke aınalýy eń aldymen el tizginin berik ustap kele jatqan Tuńǵysh Prezıdentimiz, Elbasynyń eren eńbeginiń  nátıjesi. Bul rette Elbasy táýelsizdik alǵannan bergi kezeńde  ótkizilgen Álem qazaqtarynyń tórt quryltaıynda da Dúnıejúzi qazaqtary qaýymdastyǵynyń Tóralqa Tóraǵasy retinde dúnıeniniń túkpir-túkpirinen jınalǵan aǵaıyndarǵa Qazaq elin damytý jóninde júzege asqan jaqsy isterdi, qolǵa alynýǵa tıis bıik maqsat-mindetterdi jan-jaqty taldap ortaǵa salǵan edi. Soǵan oraı, alys-jaqyndaǵy aǵaıyndar Nursultan Nazarbaevty Qazaqstan Respýblıkasynyń Prezıdenti ǵana emes, jer júzindegi búkil qazaqtyń kóshbasshysy retinde baǵalap, qadir tutady.

Qadirli otandastar! Sizderdi osy aıtylǵan jaıttardy eskerip jáne el bolashaǵy aldyndaǵy óz jaýapkershilikterińizdi tereń sezinip aldaǵy Prezıdent saılaýynda Nursultan Ábishuly Nazarbaevtyń kandıdatýrasyna  bir kisideı daýys berýge shaqyramyz.

Talǵat Mamashev, Dúnıejúzi qazaqtary qaýymdastyǵy Tóralqa tóraǵasynyń birinshi orynbasary

Sultanáli Balǵabaev, Dúnıejúzi qazaqtary qaýymdastyǵy Tóralqa tóraǵasynyń  orynbasary

Ýaqap Qydyrhan, jazýshy, Dúnıejúzi qazaqtary qaýymdastyǵy janyndaǵy aqsaqaldar alqasynyń tóraǵasy

Arystan Tosyn, qajy, Eýropadan oralǵan

Aıathan Turysbek, kásipker, Mońǵolıadan oralǵan

Beldeýbaı Qypshaqbaı, zeınetker, Mońǵolıadan oralǵan

Saǵıdolda Álı, dáriger-zeınetker, QHR-dan oralǵan

Zeınel Rýstem, zeınetker, Aýǵanstannan oralǵan

Mellat Rámetuly, jazýshy, QHR-dan oralǵan

Dına Bóleshova, ǵylym kandıdaty, Ózbekstannan oralǵan

Qabden Altaı, Halıfa Altaı abyzdyń balasy, Túrkıadan oralǵan

Qambar Óztemir, kásipker, Aýǵanstannan oralǵan