Elimizdegi sot salasyn gýmanızasıalaý men sıfrlandyrý Halyqaralyq prokýrorlar qaýymdastyǵynyń qyzyǵýshylyǵyn oıatty. Bul jaıynda Qamshy.kz aqparat agenttigi digitalkz.kz saıtyna silteme jasap habarlaıdy.
17-shi shildede Qazaqstan Respýblıkasynyń Bas prokýratýrasynda Halyqaralyq prokýrorlar asosıasıasynyń prezıdenti Gerhard Iaroshpen kezdesý ótti. Basqosýdaǵy negizgi maqsat - elimizdegi qylmystyq sot tóreligi salasyndaǵy reformalarmen tanystyrý.
Kezdesý barysynda qylmystyq prosesti sıfrlandyrý baǵdarlamasyn júzege asyrý máselesi talqylandy. Sonymen qatar, aǵymdaǵy jyldyń basynan beri 4 myńnan astam qylmystyq is elektorondyq formatta tergelip jatqandyǵy týraly aıtyldy. Qazirgi tańda 1,8 myń is sotqa elektrondy túrde joldanǵan. Onyń ishinde 1,3 myńy qarastyrylyp, tıisti sheshimder shyǵarylypty.
QR Bas prokýratýrasynyń baspasóz qyzmetiniń málimetinshe, túrmelerdiń halyqaralyq reıtıńisinde Qazaqstannyń 3-ten 82-deńgeıge kóterilgen. Osy kórsetkishke baılanysty elimizdiń qylmystyq saıasatty kúsheıtý máseleleri álemdik prokýrorlardyń qyzyǵýshylyǵyn oıatypty.
Sońǵy kezeńde sot salasynda jasalyp jatqan ońtaılandyrý jumystarynan elimizde túrmede otyrǵandardyń sany 66 myńǵa azaıǵan (100 myńnan 34 myńǵa). Bul sońǵy 27 jyl boıynsha kórsetkish. Buǵan qosa, 8 kolonıa jabylyp, jyl saıynǵy búdjet qarajaty 12 mlrd teńgege únemdeldi.
Al, túrmedegiler sanynyń azaıýy krımınogendi jaǵdaıdy nasharlatqan joq, kerisinshe jyl saıyn qylmystardyń qaıtalanýy 7-10 paıyzǵa tómendep jatyr.
Qazaqstandyq prokýrorlardyń pikirinshe, isterdi jańa formatta tergeý qylmystyq proseste azamattardyń quqyqtaryn saqtaý kepildigin berip, dálelderdi burmalaý men san túrli zańnamany buzý faktilerin azaıtady. Otandyq prokýrorlardyń osy paıymymen sheteldik quqyq qorǵaý qyzmetkerleri tolyqtaı kelisti.
Kezdesý sońynda Halyqaralyq prokýrorlar qaýymdastyǵynyń prezıdenti Gerhard Iarosh qazaqstandyq tarapty jyly qabyldaý jáne konstrýktıvti tájirıbe almasqandary úshin alǵysyn jetkizdi. Sonymen qatar, yntymaqtastyqtyń odan ári jalǵasatynyna senim bildirdi.
Aıta keteıik, elimizdegi sot júıesin sıfrlandyrý nátıjesinde sońǵy jyldary bul salaǵa aqparattyq tehnologıalar engizile bastady. Iaǵnı, sot zaldary qazirgi zamanǵa saı sapaly aýdıo-beınejazba júrgizýge arnalǵan tehnıkalarmen jabdyqtalyp, barlyq is-qaǵazdar men qujat aınalymdary elektrondyq formatqa aýysty. Sonymen qatar, birqatar elektrondyq servıster jumys isteıdi. Atap aıtsaq, «Tórelik» aqparattyq júıesi, «Sot kabıneti», dybys beıne jazba qurylǵysy, beıne-konferens-baılans júıesi, «Elektrondy qylmystyq is» jobasy, elektrondyq sıfrlyq qoltańba, «Vırtýaldy sot» jobasy, «quqyqtyq qyzmet ortalyǵy» men «tergeý soty» jobasy jumys isteıdi.
