Batys Qazaqstan oblysynda úsh jyldyń ishinde 45 İT-synyp ashý kózdelse, alǵashqy 15-i bıylǵy oqý jylynda paıdalanýǵa berilmek. Jańa oqý jyly qarsańynda Oral qalasyndaǵy úsh bilim ordasynda jáne ár aýdan ortalyǵynda ashatyn mundaı synyptardy jabdyqtaýǵa oblystyq búdjetten 49 mln. 800 myń teńge qarjy bólinip, qajetti mamandardyń bilimin jetildirý kýrsy uıymdastyryldy.

Jýyrda Mahambet Ótemisov atyndaǵy BQMÝ bazasynda Astana qalasyndaǵy «STEM» akademıasynyń ǵylymı qyzmetkerleri qalalyq jáne aýdandyq mektepterdiń otyzdan astam muǵalimine oqýshylardyń tehnıkalyq pánderge degen qyzyǵýshylyǵyn oıatý tásilderin, robottehnıka jáne 3D modeldeý negizderin úıretti.

– Kýrsqa qatysýshylardyń bilim deńgeıi ár túrli boldy. Sondyqtan ár muǵalimge jeke-jeke kóńil bólýge tyrystyq. Jalpy alǵanda, jergilikti mamandardyń kópshiligi Pascal baǵdarlamalaý tilin qoldanady eken. Qazirgi tańda bul júıe biraz eskirdi, onyń ornyn zamanaýı Stretch tili almastyra bastady. Munda balalar qyzyqty múltfılm qarap otyryp, qajetti aqparatqa qanyǵady. Sonymen qatar 3D modeldeýde nysandardy qurastyrýǵa jáne óńdeýge arnalǵan AutoDesk baǵdarlamasynda kezeń-kezeńimen jumys isteýdi úırettik, – deıdi «STEM» akademıasynyń ǵylymı qyzmetkeri Ádil Aıapbergen.

Shyńǵyrlaý aýdanyndaǵy L. Qlyshev atyndaǵy JBBOM ınformatıka jáne robottehnıka pániniń muǵalimi Marat Jumaǵalıevtiń aıtýynsha, aýyl balalarynyń robottehnıkaǵa, sonyń ishinde lego qurastyrýǵa qyzyǵýshylyǵy joǵary. Jas ustazdyń oıynsha robottehnıka páni mektep pánderiniń arasynda eń úzdik tórttikke enip úlgergen. İT salasyndaǵy zamanaýı baǵdarlamalar men keń suranysqa ıe ónimder týraly jańalyqty oqýshylarǵa sapaly ári ýaqtyly usyný úshin eń aldymen pán muǵalimi myqty, bilimdi bolýy kerek. Osy oraıda «Nur Otan» partıasynyń bastamasymen iske asqan oqytý kýrsynyń paıdasy orasan zor.

Jánibek aýylyndaǵy T. Jarokov atyndaǵy JBBOM fızıka-ınformatıka pániniń muǵalimi Maqsat Ótepbergenov kúndelikti qoldanyp júrgen EV3 negizgi jınaǵyna qosa, Arduino apparatty esepteýish platformasy týraly bilimin jetildirgenine qýanyshty. «Endigi maqsat bilgenimmen bólisý, shalǵaı aýyldardaǵy balalardyń qyzyǵýshylyǵyn oıatyp, robottehnıkamen aınalysýyna jaǵdaı týǵyzý» deıdi ol.

IT-synyp jetekshileri bilim jetildirý kýrsynan ótken soń «STEM» júıesi boıynsha oqý kýrsynan ótkendigin rastaıtyn sertıfıkattarǵa ıe boldy.