Almaty oblysynda shaǵyn jáne orta kásipkerlik sýbektileri  úshin jer ýchaskileriniń qoljetimdi bolýy,kóterme jáne taratý ortalyqtarynyń qurylysy jáne uzaq merzimdi kelisimsharttar engizý máseleleri talqylandy.

Óńirge jumys saparymen QR Prezıdentiniń Bes áleýmettik bastamasyn júzege asyrý boıynsha respýblıkalyq Qoǵamdyq keńestiń músheleri – «Atameken» Ulttyq kásipkerler palatasynyń Basqarma Tóraǵasy Abylaı Myrzahmetov pen QR Parlamenti Májilisiniń depýtaty Nurtaı Sábılánov bardy.

Sapar aıasynda Óńirlik palata alańynda kásipkerlermen kezdesý ótti.

Kezdesý barysynda talqylanǵan basty máselelerdiń biri – jer ýchaskeleri týraly aqparattyń qoljetimdiligi. UKP Basqarma Tóraǵasynyń aıtýynsha, Almaty oblysy qoldanystaǵy bas jospardyń  materıaldary men egjeı-tegjeıli josparlaýdy qamtıtyn qala qurylysy jobalary boıynsha geoaqparattyq derekter bazasyn qurý jumysyn bastady. Mundaı jumys Qyzylorda oblysy, Astana jáne Almaty qalalarynda júrgizilýde.

«Ákimdikterdiń bas josparlar týraly, egjeı-tegjeıli josparlaý jáne bos jatqan jer ýchaskeleri týraly aqparatty onlaın qoljetimdi etý úshin qarajat bólýi óte mańyzdy. Mysaly, 5-6 sıyry bar «Bastaýdyń» túlegi óz isin keńeıtip, taǵy 10-15 sıyr satyp alýǵa nıetti. Oǵan jaıylym qajet. Jer ýchaskesi izdegen ol jer ýchaskesiniń joqtyǵyn nemese bos jatqan jer ýchaskesi týraly aqparattyń joqtyǵyn biledi. Kásipker izdemeýi kerek. Barlyq aqparat onlaın rejımde qoljetimdi bolýy tıis. Kásipkerler barlyq esikterdi qaqpaı, barlyq qyzmetti bir jerden alýy úshin bul alańdy Óńirlik palatalar arqyly qurý qajet», – dedi Abylaı Myrzahmetov.

Ulttyq kásipkerler palatasynyń Basqarma Tóraǵasy qarjy resýrstaryna qoljetimdilikti qamtamasyz etý, memlekettik satyp alýlardy jetildirý, otandyq taýar óndirýshilerdi qoldaý jáne kadrlardy oqytý týraly atqarylǵan jáne josparlanǵan jumystar barysy týraly áńgimeledi.

«Aımaqtardaǵy fermerlerdiń taǵy bir mańyzdy máselesi – saýda jelilerine qoljetimdilik. Búgingi tańda áleýmettik-kásipkerlik korporasıalar  eldi mekenderde fermerler óz ónimderin ótkizýge bolatyn kóterme jáne taratý ortalyqtarynyń júıesin  qurýda. Osyndaı ortalyqtardyń joqtyǵynan olar óndiristiń 30% -yn joǵaltady. Fermerler naryqqa shyǵý máselesin ózderi sheshpeýi kerek. Olar tek ónimdi qoımaǵa ótkizip, tıesili qarajatty alýǵa mindetti. Qazirgi ýaqytta KTO júıesi boıynsha Aýyl sharýashylyǵy mınıstrligimen birlesip jumys atqarylýda», - dedi Abylaı Myrzahmetov.

Kezdesý barysynda Almaty oblysy Kásipkerler palatasynyń Óńirlik keńesiniń tóraıymy Rımma Salyqova kásipkerlikke uzaq merzimdi kelisimsharttardy engizý qajettiligi týraly máseleni kóterdi.

«Bizdiń zaýyt jol qurylysy materıaldaryn óndirýmen aınalysady. Naryqqa shyqqanymyzǵa 10 jyl boldy. Tenderler jeltoqsan aıynda, keıde qańtarda nemese aqpan aıynda ótedi, al tapsyrýshy ónimdi naýryz aıynda talap etedi. Osy az ýaqyt ishinde men kelisimge qol qoıyp, shıkizat satyp alyp, ónimdi daıyndap, búkil Qazaqstan boıynsha jetkizip berýge mindettimin. Qazirgi jaǵdaıda bul múmkin emes. Sondyqtan bızneske uzaq merzimdi kelisimsharttar berý óte mańyzdy. Sonda ǵana bıznes óz jumysyn josparlaı alady. Bul másele mende ǵana emes, bul júıeli másele. Mektep asqanalarynda, aýrýhanalarda da osyǵan uqsas jaǵdaı, olar da jyl saıyn satyp alýdy jarıalaýǵa májbúr bolady», – deıdi kásipker.

Óz kezeginde Abylaı Myrzahmetov «Samuryq-Qazyna» ulttyq ál-aýqat qorymen bes jyl merzimge uzaq merzimdi kelisimsharttar jasaý týraly kelisimge qol jetkizilgenin atap ótti.

«Bul kásipker úshin de, tapsyrys berýshi úshin de yńǵaıly. Búginde biz iri jobalar boıynsha memlekettik satyp alýdy júzege asyrýdy josparlap otyrmyz. Meniń oıymsha, mektepter men aýrýhanalarda konkýrstar ótkizý durys emes. Munda qoǵamdyq jáne áleýmettik múddeler turǵysynan kelý kerek. Biz osy bastamany qolǵa alýǵa daıynbyz», – dep atap ótti UKP Basqarma Tóraǵasy.

Taǵy erekshe talqylanǵan taqyryp – jumyssyzdar men ózin-ózi jumyspen qamtyǵandardyń «Bastaý» jobasyna qatysýy. Jobanyń túlekteri ózderiniń alǵashqy oqý nátıjelerimen jáne kezdesken qıyndyqtarymen bólisti.

Qazaqstan Respýblıkasy Parlamenti Májilisiniń depýtaty Nurtaı Sábılánov óńirlik bıznestiń máseleleri men usynystary Parlamenttiń sesıalarynda jarıalanatyn bolady dep málimdedi.

«Prezıdent bıznesti qoldaýǵa erekshe kóńil bóledi. Bul jaqynda kásipkerlik qyzmeti týraly qol qoıylǵan zańda kýálandyrylǵan. Jalpy, barlyq Bes áleýmettik bastama kásipkerlikpen tyǵyz baılanysty. Búginde biz «Atamekenmen», salalyq qaýymdastyqtarmen birlesip kásipkerlik salany jetildirý boıynsha normatıvtik-quqyqtyq aktilerge ózgertýler engizý boıynsha jumystardy jalǵastyrýdamyz», – dedi depýtat.

Sondaı-aq Nurtaı Sábılánov Kásipkerler palatasynyń keńsesi Kásipkerlerdiń úıi ekenin aıtyp ótti. Ol Almaty oblysy ákimdiginiń qoldaýymen qurylǵan bolatyn. Ol ózge óńirler úshin bıznes pen bılik arasyndaǵy ózara qarym-qatynastyń tabysty úlgisi.

QR Prezıdentiniń Bes áleýmettik bastamasyn júzege asyrýdy qadaǵalaý úshin respýblıkalyq qoǵamdyq keńestiń músheleri – «Atameken» Ulttyq kásipkerler palatasynyń Basqarma Tóraǵasy Abylaı Myrzahmetov,  QR Parlamenti Májilisiniń depýtaty Nurtaı Sabılánov jumys sapary aıasynda oblys ákiminiń qatysýymen ótken otyrysqa qatysty, Óńirlik kásipkerler palatasynyń keńsesinde boldy, kásipkerlerge tolyq formatty qyzmet kórsetý ortalyǵy jumysyn baıqap,  Taldyqorǵan qalasyndaǵy 16-qabatty úsh turǵyn úıdiń qurylysymen tanysty. Sondaı-aq, sapar barysynda «Taldyqorǵan» avtomattandyrylǵan gaz taratý stansıasyna jáne «Sarymsaqov R.J.» sharýa qojalyǵyna barý da josparlanyp otyr.