2018 jyldyń 4-5 qyrkúıek kúnderi Qazaqstan Respýblıkasy Mádenıet jáne sport mınıstrligi Til saıasaty komıteti Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy Qazaqstan Halqy tilderi kúnine oraı Oqytýshylar arasynda A.Baıtursynuly atyndaǵy respýblıkalyq baıqaý ótkizdi.
Baıqaýdyń maqsaty – Alash kósemi, ult ustazy Ahmet Baıtursynuly qaldyrǵan rýhanı jáne ǵylym-bilim salasyndaǵy mol muralar sabaqtastyǵyn jalǵastyrý. Oqytýshylardyń oqytý sheberligin nasıhattaý, eresekterge memlekettik tildi oqytyp júrgen shyǵarmashylyqpen aınalysatyn oqytýshylardy anyqtaý, qoldaý, oqytýshylardyń kásibı-pedagogıkalyq shyǵarmashylyǵyn jáne memlekettik tildi oqytý úderisin yntalandyrý, ozyq tájirıbelerdi taratý.
Shara respýblıkalyq baıqaý qatysýshylarynyń tájirıbelik sabaq úlgisin kórsetý, elektrondyq portfolıony tanystyrý jáne pedagogıkalyq-psıhologıalyq jaǵdaıattarǵa arnalǵan tapsyrmalar kezeńderinen turdy.
Baıqaý bıyl alǵash uıymdastyrylmasa da, ataýy tuńǵysh ret ult ustazynyń qurmetine oraı aýystyryldy. QR Úkimetiniń 2017 jyldyń 31 qazandaǵy №689 qaýlysy boıynsha 5 qyrkúıek - Qazaqstan Halqy tilderi kúni bolyp belgilengen bolatyn.
Bul kún - "Ulttyń saqtalýyna da, joǵalýyna da sebep bolatyn nárseniń qýattysy - til" dep ulaǵatty sóz qaldyrǵan, qazaq halqynyń taǵdyry, tili úshin kúresken Alash arysy, Ult ustazy Ahmet Baıtursynulynyń týǵan kúni. Qazaqtyń ádebıet zertteýshi ǵalymy, túrkitanýshy, pýblısıs, pedagog, aýdarmashy, qoǵam qaıratkeri Ahmet Baıtursynuly 1872 jyly 5 qyrkúıekte qazirgi Qostanaı oblysy, Jangeldın aýdany, Sarytúbek eldi mekeninde dúnıege kelgen bolatyn.
Baıqaý ult ustazy Ahmet Baıtursynulynyń ómiri men shyǵarmashylyǵyna arnalǵan kitaptyń tusaýkeserimen bastaldy.
Elbasy Nursultan Ábishuly Nazarbaev óziniń «Bolashaqqa baǵdar: rýhanı jańǵyrý» baǵdarlamalyq maqalasynda: «Men halqymnyń taǵylymy mol tarıhy men yqylym zamannan arqaýy úzilmegen ulttyq salt-dástúrlerin aldaǵy órkendeýdiń berik dińi ete otyryp, árbir qadamyn nyq basýyn, bolashaqqa senimmen bet alýyn qalaımyn. Jańa turpatty jańǵyrýdyń eń basty sharty – sol ulttyq kodyńdy saqtaı bilý. Onsyz jańǵyrý degenińizdiń qur jańǵyryqqa aınalýy op-ońaı»-degen bolatyn. Olaı bolsa, jańashyl baǵyttarymyzdy anyqtaıtyn oqytýdyń zamanaýı tehnologıalaryn paıdalaný mańyzdy. Búgingi oqytýshylar arasyndaǵy baıqaý - jasampazdyq pen jan-jaqtylyqtyń jańasha kórinisi.
Baıqaýǵa elimizdiń on tórt óńirinen bilikti til úıretýshi oqytýshylar keldi. Qatysýshylar til úıretýdiń san alýan ádis-tásilderin paıdalana otyryp, ózge tildegi qazaq tilin úıretýdiń tıimdi joldaryn usyndy.
Respýblıkalyq baıqaý jeńimpazdaryn ádisker-ǵalymdardan quralǵan qazylar alqasy anyqtady. Jeńimpazdar arnaıy dıplomdar, alǵysqattarmen jáne qarjylaı syılyqtarmen marapattaldy. Yntalandyrý syılyǵy Baıanaýyl aýdanynan kelgen Tanat Ahatov pen atyraýlyq Gúlaıym Uǵybaevaǵa buıyrdy. Al júldeli 3-oryndy Almatydan kelgen Sholpan Ábdilda men araldyq Perızat İzbasarova ıelendi. 2-oryndy Batys Qazaqstan oblysynan kelgen Ádilhan Sultanov aldy. 1-oryn qostanaılyq Toty Aıtmaǵanbetovaǵa buıyrsa, al bas júldeni qaraǵandylyq sheber oqytýshy Dınara Qýanbaeva ıelendi.
