Ádette, er kisiniń áıelin maqtaýy nemese áıeldiń kúıeýin maqtaýy qulaqqa ersi estiletin sıaqty. Qala berdi, qazaqı bolmysqa saı kele bermeıtindeı kórinedi. Solaı da shyǵar. Alaıda, keıde erli-zaıyptylardyń biri óziniń baqytsyz ekenine shaǵymdanyp, áý basta basqa bireýmen shańyraq kóterse, áldeqaıda baqytty bolaryn aıtyp jatady. Menińshe, kóp adam ózin jábirlenýshiniń keıpinde kórsetkisi keledi. Oǵan tıesili baqytty basqa bireý ıelenip ketken syńaıly kóńilde júrýdi qalaıdy. Alaıda, Qurandaǵy:
وَلَا تَنْسَوُا الْفَضْلَ بَيْنَكُمْ
«...Sondaı-aq aralaryńda keshirimdilikti umytpańdar...[1]», -degen aıat ajyrasqan erli-zaıyptylarǵa qatysty túsken. Olaı bolsa, aralaryn neke sıaqty kıeli baılanys ustap turǵan juptar budan kóp ǵıbrat alýy kerek emes pe?
Osylaısha, men ózimniń otbasym, jubaıymmen ara-qatynasymyz haqynda oılanyp kórdim. Árıne, meılinshe, aramyzdaǵy qarym-qatynasqa ádil baǵa berýge tyrystym. Bul meniń ımanym men namysym aldynda óte mańyzdy. Nátıjesinde, jubaıymnyń súıispenshiligi men ony jaqsy kórgennen áldeqaıda artyq ekenin eriksiz moıyndaýǵa týra keldi. Óıtkeni, kıim-keshegim, as-sýymnan bastap, jumysqa kóterińki kóńil-kúıde shyǵýyma, keshke jaıdary bop kúndizgi sharshaǵanymdy umytýym úshin quraq bop ushyp-qonyp júredi eken. Tipti, aradaǵy usaq-túıek urystyń ózi meniń durys tamaqtanýym, ýaqytyly uıyqtaýym úshin bolady eken. İshteı rıza bop qaldym. Keıde, josparlarymdy muqıat tyńdap, utymdy usynystar da aıtady eken. Usynystarynyń jaqsy ekenin áıelime aıtpasam da, paıdasyn kórip júrmin.
Al, úı sharýasy men bala-shaǵa kútimi jaıly ózderińiz de bilesizder. Tórkindep ketip bir kún úıde bolmasa, úı ishinde shulyq turmaq, ózińdi joǵaltyp ala jazdaısyń. Balalardyń sabaǵyn tekseremin dep birshama júıkemdi juqarttym. Qanym qaraıyp, mańdaıynan súıip júrgen balamdy ura jazdadym. Al, shesheleri bolsa, kúnde ún-túnsiz (keıde aıqaı-shýmen) sabaqtaryn oqytyp jatady. Onyń nátıjesin ata-analar jınalysyna barǵan men kórip kelemin. Bar maqtaýdy ózim estip kelemin.
Sonymen qatar, keıde qurbylary arasynda kúıeýge qurmet kórsetý, qoldaý bildirý sıaqty áńgimeler qozǵap júrgenin qulaǵym shalyp qalady. Mine, osydan keıin óz ar-ojdanym aldynda ózim tańdap alǵan áıelime narazy bolýym pendeshilik ekenin túsindim. Mundaıdy paıǵambarymyz (ﷺ) quptamaıtynyn da ishteı bilip turmyn. Endeshe, dostar, «Tazy ashýyn tyrnadan alypty» degendeı, bolǵanǵa da, bolmaǵanǵa da áıeldi kinálaı berýdi qoıý kerek. Barymyzdy baǵalaıyq.
Derekkóz: nurgasyr.kz
Avtory: Musa Erbatyr
[1]"Baqara súresi", 237-aıat
