Otandyq óndiristegi kópirshiktelgen kaýchýk, sondaı-aq alúmını men mys jaqyn arada Qazaqstannan Grýzıa naryǵyna jetkizilýi múmkin. Buǵan Tbılısıde ótken saýda-ekonomıkalyq mısıa barysynda grýzındik tarap qyzyǵýshylyq tanytqan bolatyn.
Qyrkúıek aıynyń sońynda Qazaqstan – Grýzıa bıznes-forýmy ótip, ony Grýzıa Respýblıkasyndaǵy QR Elshiliginiń kómektesýimen Grýzıa Saýda-ónerkásip palatasymen birlesip Qazaqstannyń Syrtqy saýda palatasy uıymdastyrdy, dep habarlaıdy SSP baspasóz qyzmeti.
Bıznes-forým taý-ken, qurylys jáne mashına jasaý salalarynyń iri qazaqstandyq kásiporyndarymen jáne áleýetti grýzındik satyp alýshylarmen tikeleı baılanys ornatqan negizgi dıalog alańy boldy. Onyń qorytyndysy boıynsha eki eldiń saýda palatalary arasyndaǵy yntymaqtastyq týraly Memorandýmǵa qol qoıyldy.
Qazirgi ýakytta qazaqstandyq «IT&M» kompanıasynyń Grýzıaǵa kópirshiktelgen kaýchýk jetkizýi týraly kelissózder júrgizilýde. Sondaı-aq kóshpeli kezdesýlerdiń aıasynda «DIO» kompanıasy Qazaqstandaǵy zamanaýı az shyǵyndy taý-ken óndirisin damytýǵa baǵyttalǵan «KazMinerals» kompanıasynan alúmını men mys satyp alýǵa qyzyǵýshylyq bildirdi.
Qazirgi tańda Qazaqstan Grýzıaǵa munaı ónimderin, azotty tyńaıtqyshtar, makaron ónimderin, temir prokattaryn, temeki, tońazytylǵan balyq, dári-dármekti eksporttaýda. Grýzıadan biz sharap, alkogólsiz sýsyndar men mıneraldy sýlar, metal qubyrlar, vaksınalar, sút ımporttap otyrmyz.
2018 jyldyń qańtary men shildesi aralyǵynda elder arasyndaǵy syrtqy saýda aınalymy 2017 jylǵy osyndaı kezeńmen salystyrǵanda 67%-ǵa ulǵaıyp, 77 mln AQSH dollaryn qurady.
