Qazaqstanda tuńǵysh ret halal ıpoteka beriledi. «Al Hilal» Islam banki» AQ ıslam ıpotekasyn iske qosty.
Islam qarjy prınsıpterimen qurylǵan jańa ónimdi Almaty, Astana jáne Shymkent qalalarynyń turǵyndary baspana alý úshin buryn alǵan ıpotekany qaıta qarjylandyrý úshin qazirden bastap alýyna bolady.
Sonymen qatar, ıpotekany dinı senimine qaramaı, kez kelgen adam ala alady.
Banktiń habarlaýynsha, Islam ıpotekasynyń basty quraly Mýrabaha dástúrli paıyzdyq mólsherlemeniń joqtyǵymen erekshelenedi, sebebi sharıǵatta buǵan tyıym salynǵan. Ipoteka qurylymy mynadaı: bank turǵyn úı satyp alady da, ony klıentke ústeme baǵamen bólip tóleýge beredi, ústeme baǵany klıent aldyn ala biledi jáne qarjylandyrý barysynda ol turaqty bolady. Munyń negizi ashyqtyq jáne paıda: klıent turǵyn úıdiń aqyrǵy baǵasyn naqty biledi.
Bul ónimniń taǵy bir ereksheligi – qolaıly tólem jasaý tásili. Klıentterdiń basym kópshiligi dástúrli banktiń aqshalaı tólemin (anýıtet) ońtaıly sanaıdy, biraq ony tańdaǵan kezde ıpotekanyń aqyrǵy quny ıpotekanyń merzimine qaraı aıtarlyqtaı ulǵaıyp ketedi. Al Hilal bankiniń ıslam ıpotekasy boıynsha tólem jasaý sqemasy qarjylandyrý merzimi barysynda teń tólem jasaýdy qarastyrady, bul anýıtetke uqsaıdy, biraq dástúrli bankterge tán artyq tólem bolmaıdy.
«Qazaqstandaǵy ıslam bankıngin damytýda ıslam ıpotekasyn iske qosý mańyzdy qadam. Bul jeke tulǵalardy qarjylandyrý baǵdarlamasynyń alǵashqy ónimi. Klıentter bizdiń ónimimizdiń artyqshylyqtaryn, erekshe jáne tıimdi sharttaryn baǵalaıdy dep úmittenemiz»,-dedi «Al Hilal» Islam banki» AQ Basqarma tóraǵasynyń orynbasary Eltaı Muhamedjanov.
Negizgi sharttar:
- Qoljetimdi qalalar: Almaty, Astana jáne Shymkent (paıdalanýǵa berilgen úıler);
- Alǵashqy jarna: 30%-dan bastap;
- Qarjylandyrý merzimi: 3 jyldan 15 jylǵa deıin;
- Qarjylandyrý somasy: 3 mln teńgeden 100 mln teńgege deıin;
- Eń tómengi rastalǵan eńbekaqy: 200 000 teńge;
- Jasy: 23 jastan joǵary (qarjylandyrý merzimi aıaqtalǵan sátte zeınetkerlik jastan úlken bolmaýy kerek);
- Ótinishti qaraý komısıasy – 0 teńge;
- Kelisimdi rásimdeý komısıasy – qarjylandyrý somasynyń 0,5%-y (eń tómengi 150 000 teńge, biraq 300 000 teńgeden aspaýy qajet). Qaıta qarjylandyrý kezinde komısıa ustalmaıdy.
